Matewu
4 Kuhiñahu, spiritu yamutwalili Yesu mwisaña kulonda amweseki kudi Diyabolu. 2 Chelili nashakami dehi chakadi kuda hadi mafuku 40 mwaana niwufuku, watiyili nzala. 3 Nawa Mukwakweseka wenjili kudi yena nakumuleja nindi: “Neyi wudi mwana kaNzambi, ilaku awa malola abalumuki mankendi.” 4 Ilaña yena wamwakwili nindi: “Chasonekewa nawu: ‘Muntu hatela kuhanda namankendi hohuku, ilaña namazu ejima afumaña mukanwa kaYehova.’”
5 Kuhiñahu Diyabolu wamutwalili mumusumba wajila, wamwimikili hewulu dambañu yatembeli* 6 nawa wamulejeli nindi: “Neyi wudi mwana kaNzambi, dinatili heseki, muloña chasonekewa nawu: ‘Wakaleja añelu jindi hadi eyi,’ nawa ‘akakwaka mumakasa awu kulonda idatilu deyi dikabuli kuhuma kwilola.’” 7 Yesu wamwilili nindi: “Cheñi chasonekewa nawu: ‘Bayi wumweseka Yehova Nzambi yeyiku.’”
8 Cheñi nawa, Diyabolu wamutwalili hampidi yayilehi nankashi, wamulejeli mawanta ejima amukaayi nikumuleja kulema kwawu. 9 Nawa wamwilili nindi: “Neyi wukudibuka heseki nakudifukula kudi ami kamu hohu, nukukwinka yuma yejimiyi.” 10 Dichi Yesu wamwakwili nindi: “Fumaku aha, eyi Satana! Muloña chasonekewa nawu: ‘Watela kudifukula kudi Yehova Nzambi yeyi nawa yena hohu diyi iwatela kukalakela mudimu wajila.’” 11 Dichi Diyabolu wamushiyili, añelu enjili nawa atachikili kumukalakela.
12 Chatiyiliyi nawu Yowanu anamukasi, wafumini kwadiñayi nakuya kuÑaliliya. 13 Cheñi nawa, chafuminiyi kuNazareta wayili nakushakama kuKaperinamu kwakwihi nakaluñalwiji mujinkambi jaZebuluni niNafwatali, 14 kulonda mazu ahosheliwu kuhitila mudi kaprofwetu Isaya ashikijewi, wahosheli nindi: 15 “Enu antu amuZebuluni niamuNafwatali, mwekala munjila yaya kukaluñalwiji, kwishinadi daYodana, muÑaliliya yawakwanyuza! 16 Antu ashakamineña mumwidima amweni chejeji chacheni nawa ana ashakamineña mwiluña damwevulu wakufwa, chejeji chayitoñekeleli.” 17 Kufuma tuhu hayina mpinji, Yesu watachikili kushimwina nindi: “Balumukenu munyichima, muloña Wanta wamwiwulu wunaswini dehi kwakwihi.”
18 Hampinji yendeleñayi kuchikumu chaKaluñalwiji kaÑaliliya, wamweni amayala ayedi evumu dimu, Shimona ateneneñawu nawu Petulu nimanakwindi Anderi anakulalumwina kaleñi mukaluñalwiji, muloña adiña ayibinda janshi. 19 Yena wayilili nindi: “Nlondelenuña, nukuyibalumuna mwiikali ayibinda awantu.” 20 Hohenohu ashiyili tuleñi twawu nakumulondela. 21 Chaswininiyi hambidi chanti, wamweni cheñi amayala ayedi evumu dimu, Yakoba mwana kaZebedewu nimanakwindi Yowanu. Adiña muwatu natata yawu Zebedewu nakutuñulula tuleñi twawu, wayitambikili. 22 Hohenohu ashiyili watu nitata yawu hiyakumulondela nikumulondela.
23 Kuhiñahu wayili mwahita Ñaliliya mwejima, nakutañisha mumasinagogi awu,* kushimwina nsañu yayiwahi yaWanta, kuuka nyisoñu niyikatu yeñi-nayeñi yadiña nawantu. 24 Mpuhu yindi yatiyakeni muSiriya mwejima nawa amuleteleli antu akabakeneña nanyisoñu niyikatu yeñi-nayeñi, adiña nawandemoni, akwachinkonya niakwakalepa nawa wayuukili. 25 Dichi, mazaza amaneni awantu amulondeleli, afumini kuÑaliliya, kuDekapoli,* kuYerusalema, kuYudeya nikwishinadi daYodana.