Matewu
9 Dichi wakandamini muwatu nakuzambukila kwishinadi nawa wayili mumusumba wawu. 2 Antu amutwalilili iyala wakata kalepa akaamikiliwu hachileyi.* Chamweniyi chikuhwelelu chawu, Yesu wamulejeli wakata kalepa nindi: “Mwanami, bayi wakamaku! Nshidi jeyi anakwanakeniju.” 3 Dichi ansoneki amakwawu atachikili kudihoshesha nawu: “Iwu muntu nakuhosha kasawuntu.” 4 Yesu chelukiliyi yitoñojoka yawu, wayilili nindi: “Munakutoñojokeladi yuma yatama munyichima yenu? 5 Chakutalilahu, komana chuma chaswayi chidihi, kuhosha nami, ‘Nshidi jeyi anakwanakeniju,’ tahindi kuhosha nami, ‘Nyamukaku wendi’? 6 Dichi, hakwila mwiluki nenu Mwana kamuntu wukweti wuswa wakwanakena nshidi hamaseki,” wamulejeli wakata kalepa nindi: “Nyamukaku, nonaku chileyi cheyi* wuyi kwitala.” 7 Nawa wanyamukili nakuya kwitala. 8 Mazaza awantu chamweniwu chumichi, atiyili woma nawa amulemesheli Nzambi wenkeli antu wuswa wamuchidiwu.
9 Kuhiñahu, Yesu chafumineñayi kwadiñayi, wamweni iyala wejina daMatewu nashakami mukasanji mwakutambwila nyisonku, wamwilili nindi: “Ikalaku mukwakunlondela.” Hohenohu wanyamukili nakumulondela. 10 Chimwahitili mpinji, henohu Yesu nakuda* yakuda mwitala, akwakutambula nyisonku amavulu niakwanshidi enjili nakudiila* hamu naYesu niatumbanji twindi. 11 Ilaña aFwarisi chamweniwu chumichi, ayihwili atumbanji twindi nawu: “Muloñadi ntañishi yenu chadiilañayi hamu nawakwakutambula nyisonku niakwanshidi?” 12 Chayitiyiliyi, wahosheli nindi: “Antu akola hiyakeñaña ndotoluku, chiña akata hohu. 13 Dichi, yenu mwakadizi mwatalisha awa mazu akwila nawu: ‘Nakeñi luwi, bayi mulambuku.’ Muloña nenjili nakutambika akwanshidi, bayi aloñaku.”
14 Dichi atumbanji twaYowanu enjili nakumwihula nawu: “Muloñadi etu nawaFwarisi chitwashakaminaña chakadi kuda, ilaña atumbanji tweyi hiyashakamaña chakadi kudaku?” 15 Dichi Yesu wayakwili nindi: “Komana amabwambu jakalemba anateli kuneña neyi kalemba wudi hamu nawu? Ilaña mpinji yakashika yakamufumishawu kalemba kudi wena nawa diyi mpinji yakashakamawu chakadi kuda. 16 Kwosi muntu wachiminaña chikamba* chehina dadiha hachakuvwala chahewulu chachikuluku, muloña chitabu chachiha chikudikoka nawa chakuvwala chikusweja kutabuka. 17 Nawa antu hiyaloñaña vinyu yayiha mumapakumuna avinyu amakuluku. Neyi aloñamu, mapakumuna avinyu abusikaña nawa vinyu yamwañikaña nimapakumuna avinyu akisikaña. Ilaña antu aloñaña vinyu yayiha mumapakumuna avinyu amaha nawa jejima jiyedi hijikukisikaku.”
18 Chayilejeleñayi yumiyi, kutala, kwenjili nyuuli wumu hakudifukula* kudi yena, nakuhosha nindi: “Chayinu mpinji mwanami wamumbanda watela nafwi dehi, hela chochu, tuyi wakamunañiki chikasa cheyi nawa wukwikala nawumi cheñi.”
19 Dichi Yesu niatumbanji twindi anyamukili nakumulondela. 20 Kukashimuka, mumbanda wakabakeni namusoñu wakupweka mashi hadi yaaka 12 hakwinjila kunyima yindi nakukwata kunzombu yachakuvwala chindi chahewulu, 21 muloña wadiña nakudihoshesha mumuchima windi nindi: “Neyi nikwata hohu kuchakuvwala chindi chahewulu, nukukola.” 22 Yesu washetumukili, chamumweniyi, wamulejeli nindi: “Mwanami, bayi wakamaku! Chikuhwelelu cheyi chinakukoleshi.” Dichi owu mumbanda wakoleli hayoyenoyu mpinji.
23 Chashikiliyi, weñilili mwitala danowu nyuuli nawa wamweni akwakwimba mapeleli niizaza dawantu daleteleña ipumba, 24 Yesu wahosheli nindi: “Idikenumu, muloña iwu mwana wamumbanda nafwi wanyi, wudi mutulu.” Chatiyiliwu awa mazu, atachikili kumuseha nakumusupisha. 25 Chelili izaza dawantu dinediki dehi hanji, weñilili nawa wamukwatili hachikasa, owu mwana wamumbanda wahindukili. 26 Kafwampi, nsañu yachuma cheliliyi yatandili munodu iluña dejima.
27 Yesu chafumineñayi kwenoku, amayala ayedi amputamesu amulondeleli nakubilela nawu: “Mwana kaDavidi, tutiyili luwi.” 28 Cheñililiyi mwitala, amputamesu enjili kudi yena nawa wayihwili nindi: “Komana munakuhweleli nenu nateli kutonesha mesu enu?” Amwakwili nawu: “Eña Mwanta.” 29 Kuhiñahu, wakwatili hamesu awu nakuyila nindi: “Muloña wachikuhwelelu chenu, chiikali mwomwenomu.” 30 Dichi mesu awu atoneni. Cheñi nawa, Yesu wayikonkomweneni chikupu nindi: “Bayi muleja muntu hela wumuku.” 31 Ilaña wena chedikiliwu hanji, atandishili nsañu yindi munodu iluña dejima.
32 Chayileñawu, antu amuleteleli kamama weyala wadiña nandemoni; 33 chelili ndemoni anamufumishi dehi, owu iyala kamama watachikili kuhosha. Dichi mazaza awantu ahayamini nakuhosha nawu: “Chuma chamuchidiwu kanda achimoneñahu dehi muIsarela.” 34 Ilaña aFwarisi ahosheleña nawu: “Wafumishaña andemoni nañovu yakufuma kudi nyuuli wawandemoni.”
35 Dichi Yesu wayili nakuhitañana munyisumba nimunyikala yejima, nakuyitañisha mumasinagogi awu nikushimwina nsañu yayiwahi yaWanta nikuuka nyisoñu niyikatu yeñi-nayeñi. 36 Chamweniyi mazaza awantu, wayitiyilili wushona, muloña ayikabishileña nikuyidiwula neyi anyikoku akadi kabiña. 37 Kuhiñahu, walejeli atumbanji twindi nindi: “Chalala, mudimu wakwaañula weneni, ilaña akwakukalakala anakehi. 38 Dichi, mulembelelenu Mwini mudimu wakwaañula kulonda yatemeshi akwakukalakala kumudimu windi wakwaañula.”