Matewu
8 Chelili nakunkumuki dehi hampidi, mazaza amaneni awantu amulondeleleli. 2 Kukashimuka, mukwambumba wenjili nawa wadifukwili* kudi yena nakuhosha nindi: “Mwanta, neyi wunakeñi, wunateli kuntookesha.”* 3 Dichi, cholweliyi chikasa chindi, wamukwatili nakuhosha nindi: “Nakeñi! Tookaku.” Hohenohu mbumba yindi yamufumini. 4 Dichi Yesu wamulejeli nindi: “Kulejaku muntu nehi, ilaña yaña wakadimwekeshi kudi kapristu nawa wulambuli mulambu wayilejeliwu kudi Mosi kulonda wukayilili wunsahu kudi wena.”
5 Cheñililiyi muKaperinamu, mukulumpi wamashidika wenjili kudi yena nakumulembelela 6 nindi: “Mukulumpi, ñamba yami nakaami mwitala muloña wakata musoñu wakalepa nawa nakukabakana chikupu.” 7 Yesu wamwakwili nindi: “Neyi nashiki kudiyi, nukumuuka.” 8 Mukulumpi wamashidika wamwilili nindi: “Mukulumpi, ami hinnateleli kukutambwila eyi mwitala damiku, ilaña kuminaku dakuhosha hohu izu nawa ñamba yami wukukola. 9 Muloña ninami nidi nawantu akweti wuswa hadi ami, ilaña ninami nikweti mashidika inatalaña, nalejaña iwu nami, ‘Yaña!’ hakuya, mukwawu nami, ‘Twaya!’ hakwinza nawa nduñu yami nami, ‘Ilaku ichi!’ hakuchiila.” 10 Yesu chatiyiliyi chumichi, wahayamini nawa walejeli adiña nakumulondela nindi: “Inakuyileja chalala nami, kanda niwaneñahu dehi muntu wudi nachikuhwelelu cheneni muIsarela neyi ichiku. 11 Ilaña inakuyileja nami antu amavulu akenza kufuma kumusela nikumujika nawa akashakama kaheña kumesa hamu naAbarahama, Isaka niYakoba muWanta wamwiwulu; 12 hakwila anyana kaWanta akayinatila hanji mumwidima. Mwenomu dimu mwakadililañawu nikudisumona kumazewu.” 13 Kuhiñahu, Yesu wamulejeli iwu mukulumpi wamashidika nindi: “Yaña. Chuma chiwunakuhweleli chikuzatika.” Dichi owu ñamba wakoleli hayoyenoyu mpinji.
14 Nawa Yesu cheñililiyi mwitala daPetulu, wamweni muku waPetulu wamumbanda nakaami muloña wakatili mashika. 15 Dichi wamukwatili kuchikasa, mashika amumanini nawa wahindukili nakutachika kumuloñeshela yakuda. 16 Chikwelili melela, amuleteleli antu amavulu adiña nawandemoni; nawa wafumishili aspiritu nezu nikuuka ejima adiña akata, 17 kulonda mazu ahosheleliwu kuhitila mudi kaprofwetu Isaya ashikijewi, akwila nawu: “Yena watambwili yikatu yetu nawa wasendeli nyisoñu yetu.”
18 Dichi Yesu chamweniyi izaza dawantu dinamunyeñumuki, walejeli atumbanji twindi nindi asendi watu kulonda azambukili mwishinadi. 19 Nsoneki wumu wenjili nakumwila nindi: “Ntañishi, nukukulondela kwejima kuwukuya.” 20 Ilaña Yesu wamulejeli nindi: “Anyumbu ekala namena nawa atuda amuluzwizu ekala nayisakala,* hakwila Mwana kamuntu hakweti nihakushachila mutu windiku.” 21 Kuhiñahu kambanji mukwawu wamwilili nindi: “Mwanta, ñiteji nisambili kuya nakujiika tata yami.” 22 Yesu wamulejeli nindi: “Twalekakuhu kunlondela, lekaku afu ajiiki afu awu aweni.”
23 Chakandaminiyi muwatu, atumbanji twindi amulondeleleli. 24 Kuhiñahu, kwenjili mpepela yeneni hakaluñalwiji chakwila mankanda atachikili kwinzesha watu namenji; ilaña yena wadiña mutulu. 25 Dichi ayili nakumuhindwisha nawu: “Mwanta, twamwini, keña tufwi!” 26 Ilaña wayilejeli nindi: “Munakutiyiladi woma, enu mukweti chikuhwelelu chantesha?” Kuhiñahu wahindukili nakuzuwila mpepela nikaluñalwiji nawa hawundili chikupu. 27 Dichi awa amayala ahayamini nawa ahosheli nawu: “Yeniwu himuntu wamuchidinyi anakwovwahilawu nikudi mpepela nikaluñalwiji?”
28 Chazambukililiyi kwishinadi dikwawu mwiluña dawaGadara, wadibulakeni nawamayala ayedi afumineña kumajamu* adiña nawandemoni. Adiña asweja kuzuwa chikupu chakwila kwosi muntu niwumu wadiña nawulobu wakuhitila munoyu njilaku. 29 Dichi hiyakubilela nakuhosha nawu: “Mwana kaNzambi, chumanyi chiwunakukeña kudi etu? Wunenzi nakutukabisha henohu mpinji yatoñolawu kanda yishiki tahindi?” 30 Kuswinaku hambidi yawu, hadiña mukanka wawangulu* adiileña. 31 Andemoni atachikili kumulembelela nawu: “Neyi wukutufumisha, tutemeshi twiñili mudi angulu.”* 32 Wayilejeli nindi: “Yenu!” Dichi afumini nawa ayili nakwiñila mudi angulu,* hohenohu mukanka wejima watakumukilili kuchikumu kwakunkumuka nankashi nimukaluñalwiji chu-u nawa afwili mumenji. 33 Ilaña atubiña atemukili nakuya mumusumba, ashimwini yuma yejima kushilahu ninsañu yawamayala adiña nawandemoni. 34 Dichi musumba wejima wavwakukili nakuya nakumuwana Yesu, chamumweniwu, amulembeleleli nawu yafumi mwiluña dawu.