Luka
24 Hela chochu, hefuku datachi mumulungu, enjili nabudidi yayeni kwijamu,* aleteli yuma yevumba dadiwahi yaloñesheliwu. 2 Ilaña awanini ilola anadilañumuniku kwijamu,* 3 nawa chiyeñililimu, mujimba waMwanta Yesu hiyawuwaniniku. 4 Henohu achidi kuhayama chumichi, amweni amayala ayedi avwalili yakuvwala yatoñeka chejeji anemani kwakwihi nawena. 5 Owu ambanda atiyili woma nawa anoñamini chamesu heseki, dichi owu amayala ayilejeli nawu: “Muloñadi chimunakukeñela muntu wamumi mudi afu? 6 Munu mwosiyi, anamusañuli dehi. Anukenu chayilejeliyi hampinji yadiñayi muÑaliliya, 7 nindi Mwana kamuntu atela kumuhana mumakasa awakwanshidi nakumujahila hamutondu nawa hefuku damuchisatu akamusañula.” 8 Hohenohu, anukili mazu ahosheliyi, 9 dichi afuntili kufuma kwijamu* nawa alejeli atumbanji 11 niakwawu ejima yuma yejimiyi. 10 Adiña Mariya Mandaleni, Yowana niMariya mama yaYakoba. Niambanda amakwawu adiñawu nawu alejeleña apostolu yumiyi. 11 Hela chochu, awa mazu amwekeni neyi amukunkulwayi kudi wena, nawa hiyayikuhweleleli owu ambandaku.
12 Ilaña Petulu wanyamukili nakuya lufuchi kwijamu,* wabandamini nakutalamu, wamweni hohu mahina iyamuvuñilililimu. Dichi wafuminiku nakuya iku nadihayamini nankashi hayuma yamwekeni.
13 Dichi hadodenodu ifuku, atumbanji ayedi ayileña mumukala wateneneñawu nawu Emawusi, haleheli kwakwihi namamayilu 7* kufuma kuYerusalema, 14 nawa ahanjekeleña mulwawu hayuma yejimiyi yamwekeni.
15 Chahanjekeleñawu nikudihujola hayumiyi, Yesu wayiwanini nawa watachikili kwendela hamu nawu, 16 ilaña wena amwilukili wanyi. 17 Dichi yena wayihwili nindi: “Komana yumanyi yimunakudihujola munjila enu ayedi?” Wena emeni kuka-a iku anadihombi. 18 Dichi Kilopa wamwakwili nindi: “Komana eyi wudi mwenyi wunakushakama nkaweyi muYerusalema wunabuli kwiluka* yuma yinamwekani mumusumba munanu mafuku tahindi?” 19 Yena wayihwili nindi: “Yumanyi yenoyu?” Wena amwakwili nawu: “Hiyuma yinakundami kudi Yesu wakuNazareta, owu wadiña kaprofwetu wañovu kumesu aNzambi nikudi antu ejima muyuma yelileñayi niyahosheleñayi; 20 nawa nichamuhaniniwu kudi akulumpi jetu jawatupristu nianlomboli nawu amujahi nichamupopeleliwu hamutondu. 21 Ilaña tunakuhweleli netu iwu muntu diyi wadi kwamwina aIsarela. Kubombela hayumiyi, dalelu dinekali ifuku damuchisatu kufuma hamwekeni yumiyi. 22 Kubombelahu nawa, ambanda amu hakachi ketu niwena atuhayamisha, muloña amenekela kwijamu* budidi nankashi 23 nawa chawanawu mujimba windi mwosi, enza nakushimuna nawu niwena anamoni chuma chakuhayamisha, amona añelu ayileja nawu Yesu wamumi. 24 Kuhiñahu, amakwawu adiña nanetu aya kwijamu,* nawa niwena awana neyi chochahosha owu ambanda, ilaña hiyamumonaku.”
25 Dichi Yesu wayilejeli nindi: “Enu antu abula maana nawa ashimbulaña kwiteja munyichima yuma yejima yahosheli atuprofwetu! 26 Komana Kristu hateleleli kukabakana nayumiyi nikwiñila mukulema kwindiku?” 27 Nawa wayilumbulwilili yuma yahoshawu hadi yena muNsona jejima, kutachikila kumazu aMosi nimazu awaTuprofwetu ejima.
28 Nkumininaku, ashikili kwakwihi namukala kwayileñawu, nawa yena welili neyi kwiji nakukeña kupandakana. 29 Ilaña wena amushinjilili nakumuleja nawu: “Shakamaku nanetu, muloña kuneli dehi melela nawa itena* keña dihumi.” Dichi chatiyiliyi mwenimu, weñilili mwitala nawa washakamini nawu. 30 Chadiileñayi hamu nawu yakuda,* wanoneli mankendi, wayikiswilili, nawa wayihumwini nakutachika kuyinka. 31 Hohenohu mesu awu atoneni chikupu nawa amwilukili; ilaña yena wajimañeni kumesu awu. 32 Nawa adihoshesheli mulwawu nawu: “Komana nyichima yetu hiyatatashanaña chahoshañayi nanetu munjila nichadiña nakutulumbulwilayi chikupu muNsonaku, tahindi?” 33 Dichi hayoyenoyu ora anyamukili nakufunta kuYerusalema, nawa awanini owu 11 ninowu antu apompeli hamu nawu, 34 ahosheli nawu: “Chalala Mwanta amusañula, nawa wamwekana kudi Shimona!” 35 Kuhiñahu, ashimwini yuma yamwekeni munjila ninochu chamwilukiliwu hampinji yahumwineñayi mankendi.
36 Hampinji yadiña nakuhoshawu yumiyi, Yesu wemeni mukachi kawu nakuyileja nindi: “Kuwunda kwiikali nanenu.” 37 Ilaña hamuloña wakwila atiyili woma nankashi, atoñojokeli nawu anamoni spiritu. 38 Dichi yena wayilili nindi: “Muloñadi wumunakwakamina, nawa munakujinokeladi munyichima yenu? 39 Talenu makasa ami ninyendu yami, kulonda mwiluki nenu iyami; nkwatenu muntiyi, muloña spiritu hiyekala namusunyi nimafwaha neyi chimunakummona amiku.” 40 Chahosheliyi mwenimu, wayimwekesheli makasa indi ninyendu yindi. 41 Ilaña chachidiñawu kanda eteji chumichi muloña wamuzañalu wasweja nikuhayama, wayihwili nindi: “Mukwetihu yakuda kunu?” 42 Dichi amwinkeli chiketu chanshi wakwocha, 43 nawa yena wachinoneli nakuchida hamesu awu.
44 Kuhiñahu wayilejeli nindi: “Awa diwu mazu ami inahosheli nanenu hampinji yinachidiña nenu nami, yuma yejima yasonekawu hadi ami muNshimbi jaMosi, mumazu awaTuprofwetu nimuMasamu atela kushikijewa.” 45 Dichi wenzunwini yitoñojoka yawu chikupu kulonda atiyishi mwalumbulukila Nsona, 46 wayilejeli nindi, “Ichi dichasonekawu nawu: Kristu wakakabakana nikusañuka kufuma mudi afu hefuku damuchisatu, 47 nawa hamuloña wejina dindi, nsañu yakubalumuka munyichima yakwanakena nshidi akayishimwina mwahita nyuza yejima, kutachikila muYerusalema. 48 Enu mwakekala ayinsahu ayumiyi. 49 Nawa tiyenu, ami inakuyitemeshela chuma chashikiliyi Tata. Ilaña enu, shakamenuña mumusumba sampu munatambwili ñovu kufuma mwiwulu.”
50 Kuhiñahu, wayitwalili kushika kwakwihi naBetani, nawa wolweli makasa indi nakuyikiswila. 51 Chadiña nakuyikiswilayi, wadaambwili nawu, nawa yena amutwalili mwiwulu. 52 Dichi adifukwili* kudi yena nawa afuntili kuYerusalema namuzañalu chikupu. 53 Atwalekelihu kwikala mutembeli hefuku-hefuku nakumushimeka Nzambi.