Matewu
21 Chashikiliwu kwakwihi naYerusalema, emeni muBetefwaji haMpidi yaMaolivi, Yesu watemesheli atumbanji ayedi, 2 nakuyileja nindi: “Yenu mumukala wudi hambidi, mukuwana chimbulu wakukasa nimwanindi. Muyikasununi, muyileti kudi ami. 3 Neyi kudi muntu wukuyihula, mumuleji nenu, ‘Mwanta diyi wunakuyikeña.’ Chimwamuleja mwenimu, hohenohu wukushikena dakuyinka.”
4 Chumichi chamwekeni kulonda mazu ahosheleliwu mudi kaprofwetu ashikijewi, wahosheli nindi: 5 “Lejenu mwana kaZiyona wamumbanda nenu: ‘Tiyaña! Mwanta weyi nakwinza kudi eyi, wawunda nawa nakandami hachimbulu, eña, nakandami hamwana kachimbulu, mwana kakanyama wasendaña yiteli.’”
6 Dichi atumbanji ayili nawa elili mwomwayilejeliwu kudi Yesu. 7 Aleteli chimbulu nimwanindi, ashilihu yakuvwala yawu yahewulu nawa yena washakaminihu. 8 Antu amavulu alili yakuvwala yawu yahewulu mumukwakwa, ilaña amakwawu atachikili kukotola nyitayi yanyitondu nakuyala mumukwakwa. 9 Kubombelahu, mazaza awantu adiña hambidi yindi ninowu amulondeleleña abidikileña nawu: “Tunakukulomba netu mwamwini Mwana kaDavidi! Wakiswilewa yowu muntu wenjilaña mwijina daYehova! Eyi wekala mwiwulu, tunakulomba netu mwamwini!”
10 Kuhiñahu, cheñililiyi muYerusalema, mumusumba wejima mwadiña ipumba dawantu ahosheleña nawu: “Indi iwu muntu hinyi?” 11 Awa mazaza awantu atwalekelihu kuhosha nawu: “Iwu muntu diyi kaprofwetu Yesu, wakuNazareta yakuÑaliliya!”
12 Yesu weñilili mutembeli nakuhañamu antu ejima alandishileña nikulanda yuma mutembeli, wahinwini nijimesa jawakwakuhimpa mali niyitwamu yawantu alandishileña tupompa.* 13 Nawa wayilejeli nindi: “Chasonekewa nawu, ‘Itala dami akaditena nawu itala dakulombelamu,’ ilaña enu munakudibalumuna kwikala iyeñu dawatupondu.” 14 Amputamesu niakwakubalakata niwena enjili kudi yena mutembeli nawa wayuukili.
15 Chelili akulumpi jawatupristu niansoneki amoni yuma yakuhayamisha yakoñeliyi, nianyana anyanya awamayala abidikileña mutembeli nawu, “Tunakukulomba netu mwamwini Mwana kaDavidi!” wena atiyili kutama 16 nawa amwihwili nawu: “Wunatiyi awa antu chinakuhoshawu?” Yesu wayakwili nindi: “Eña. Komana awa mazu akwila nawu, ‘Wunaleteshi mutunwa twanyana yanyanya ninyikeki mufumeña mazu akukuhameka,’ kanda muyitañeñahu dehi?” 17 Chayishiliyi, wafumini munowu musumba nakuya kuBetani nawa dikwakaaminiyi.
18 Chafuntileñayi mumusumba nabudidi, watiyili nzala. 19 Wamweni mutondu wachikuyu wadiña kwakwihi nanjila nawa wayiliku, ilaña hawaniniku nyikabuku, kwadiña hohu mafu, dichi walejeli owu mutondu nindi: “Bayi wakasoña cheñi nyikabuku.” Hohenohu mutondu wachikuyu washikeneni dakuuma. 20 Atumbanji chamweniwu chumichi, ahayamini nakuhosha nawu: “Indi iwu mutondu wachikuyu nashikeni ñahi dakuuma?” 21 Yesu wayakwili nindi: “Inakuyileja chalala nami, neyi mukweti chikuhwelelu nawa mubula kujinoka, bayi neyi mukwila hohu chinneli ami naniwu mutondu wachikuyuku, ilaña hela muleja iyi mpidi nenu, ‘Fumaku aha wudinatili mukaluñalwiji,’ yikwila mwomwenomu. 22 Dichi neyi mukweti chikuhwelelu, yuma yejima yimukulomba, mukutambwila.”
23 Chelili neñili dehi mutembeli, akulumpi jawatupristu niakulumpi jawantu enjili kwadiñayi hampinji yatañishileñayi nakumwihula nawu: “Yuma yejimiyi wayikoñaña nawuswa wanyi? Nawa hinyi wakwinkeli iwu wuswa?” 24 Yesu wayakwili nindi: “Ninami nawa niyihuliku chuma chimu. Neyi mukunleja, ninami nukuyileja kunafumishaña wuswa wunakoñaña nachu yumiyi: 25 Indi Yowanu wafumishili kudihi ñovu yakupapatisha? Wafumishili mwiwulu tahindi kudi antu?” Dichi wena atachikili kuhanjeka mulwawu nawu: “Neyi tuhoshi netu, ‘Mwiwulu,’ yena wukutwihula nindi, ‘Hanu dinu, muloñadi chimwabulilili kumukuhwelela?’ 26 Cheñi neyi tuhoshi netu, ‘Yafumini kudi antu,’ izaza dawantu dikutuleka wanyi, muloña wejima wawu amwiluka Yowanu nawu hikaprofwetu.” 27 Dichi amwakwili Yesu nawu: “Tuneluki wanyi.” Niyena wayilejeli nindi: “Ninami nawa nukuyileja wanyi kunafumishaña wuswa wunakoñaña nachu yumiyi.
28 “Mukutoñojokahu nenudi? Muntu wumu wadiña nawanyanindi ayedi. Wayili kudi mwanindi wamukulumpi nakumwila nindi, ‘Mwanami, yaku wakazati mwitempa danyivinyu dalelu.’ 29 Owu mwana waakwili nindi, ‘Nukuya wanyi,’ ilaña kwashaliliyi, watiyili kutama namazu ahosheliyi nawa wayili mwitempa danyivinyu. 30 Wayili cheñi kudi mwanindi wakansi nakumuleja mazu wowamu. Yena waakwili nindi, ‘Nukuya Tata,’ ilaña hayili mwitempa danyivinyuku. 31 Hakachi kanawa anyana ayedi, wumu yodihi welili nkeñelu yatata yindi?” Wena amwakwili nawu: “Wamukulumpi.” Yesu wayilili nindi: “Inakuyileja chalala nami, akwakutambula nyisonku niayivumbi anatwaminiku dehi muWanta waNzambi. 32 Muloña Yowanu wenjili kudi enu munjila yaloña, enu himwamukuhweleleliku. Ilaña akwakutambula nyisonku niayivumbi amukuhweleleli, dichi enu hela mwamweni chumichi, himwahimpili yitoñojoka yenu kulonda mumukuhweleliku.
33 “Tiyenu chakutalilahu chikwawu: Kwadiña iyala wumu wadiña nampata, munoyu mpata wadiminimu itempa danyivinyu, wakolekeliku ikoli nawa wapundili muwukamwinu wavinyu, watuñiliku nikaposhi; nkumininaku wadishiyili mumakasa awakwakudima nawa yena wayili kwituña dacheñi. 34 Chashikili chilaaka chanyikabu, watemesheli anduñu jindi kudi akwakudima kulonda akamutambwili nyikabu yindi. 35 Ilaña owu akwakudima akwatili anduñu jindi, wumu amweteli, mukwawu amujahili nawa mukwawu amwasili malola. 36 Cheñi, watemesheli anduñu amakwawu amavulu kubadika akusambila, niwena ayikoñeli mwomumu. 37 Nkumininaku, watemesheli mwanindi kudi akwakudima, nawa watoñojokeli nindi, ‘Mwanami yena dinu akumulemesha.’ 38 Chamumweniwu iwu mwana, akwakudima ahosheli mulwawu nawu, ‘Iwu diyi nswana. Tumujahenu kulonda tutambuli wuswana windi!’ 39 Dichi amukwatili nakumunatila hanji yetempa danyivinyu nawa amujahili. 40 Hanu dinu, neyi mwini itempa danyivinyu yenza, chumanyi chakayilayi awa akwakudima?” 41 Wena amwakwili nawu: “Chineli hiyantu atama, wakayijilumuna chatama nawa wakahana itempa dindi danyivinyu kudi akwakudima acheñi akamwinkaña nyikabu yindi neyi yinahi dehi.”
42 Yesu wayilejeli nindi: “Nsona yahosha nawu, ‘Ilola dadiwiliwu akwakutuña, dinekali dehi ilola damwiwombu dahewulu.* Idi ilola dinafumi kudi Yehova nawa dakuhayamisha kumesu etu. Komana iyi Nsona kanda muyitañeñahu dehi’? 43 Diwu muloña waweni wunukuyilejela nami, Wanta waNzambi akayitambulawu nakuwuhana kumuza wasoñaña nyikabu. 44 Cheñi, muntu wejima wakaholokela hanidi ilola, wakakotoka. Nawa muntu wejima akaholokelawu kudi idi ilola, dikamuchika.”
45 Akulumpi jawatupristu niaFwarisi chatiyiliwu yakutalilahu yindi, elukili nawu nakutena wena. 46 Hela chakwila akeñeleña nawu amukwati* ilaña atiyili woma wamazaza awantu, muloña awa antu amwilukili nawu hikaprofwetu.