Luka

23 Dichi izaza deneni dawantu dejima danyamukili nakumutwala kudi Pilatu. 2 Kuhiñahu, atachikili kumwinka muloña nawu: “Iwu muntu twamuwana nakuluwañesha muza wetu nikukaanisha antu kufweta nyisonku kudi Kesari, nawa waditenaña nindi diyi Kristu mwanta.” 3 Dichi Pilatu wamwihwili nindi: “Yeyi Mwanta wawaYudeya tahindi?” Yena wamwakwili nindi: “Mwomwenomu muwunahoshi.” 4 Kuhiñahu, Pilatu walejeli akulumpi jawatupristu nimazaza awantu nindi: “Ami kwami iwu muntu hinnamuwani namuloñaku.” 5 Ilaña wena atwalekelihu nakuhosha nawu: “Yuma yatañishañayi antu muYudeya mwejima, kutachikila kuÑaliliya kushika nikunu yaletaña kukala nankashi.” 6 Pilatu chatiyiliyi mwenimu, wehwili kulonda amuleji neyi Yesu wadiña wakuÑaliliya. 7 Chelukiliyi nindi wafumini mumpata yaHerodi, wamutemesheli kuya kudi Herodi, owu wadiña niyena muYerusalema mumafuku wenowu.

8 Herodi chamumweniyi Yesu, wazañaleli nankashi. Muloña hampinji yayilehi, wafwilileña kumumona Yesu muloña wampuhu yatiyiliyi hadi yena, nawa wakuhweleleli kumona chihayamisha chadi kukoñayi. 9 Dichi watachikili kumwihula malwihu amavulu, ilaña yena hamwakwiliku. 10 Hela chochu, akulumpi jawatupristu niansoneki atwalekelihu nakwimana nakumwinka muloña iku anahili nankashi. 11 Kuhiñahu, Herodi hamu namashidika indi amusawili nikumuseha kuhitila mukumuvwika chakuvwala chachiwahi nankashi nakumufuntisha cheñi kudi Pilatu. 12 Dichi hadodenodu ifuku, Herodi niPilatu ekalili amabwambu, muloña henohu chumichi kanda chimwekani adiña adihela.

13 Kuhiñahu, Pilatu wapompesheli hamu akulumpi jawatupristu, anyuuli niantu 14 nakuyileja nindi: “Mwaleta iwu muntu kudi ami nenu nakuleja antu kudikaña. Ilaña tiyenu! Namwihujola hamesu enu, ilaña hinnamuwani namuloña wumunakumwinkaku. 15 Kafwampi, Herodi niyena hamuwanahu namuloñaku, muloña niyena wamufuntisha cheñi kudi etu, tiyenu! kwosi chuma chanakoñiyi chakumujahilahuku. 16 Dichi ami nukumubabesha hohu, nimuumbiku.” 17 —— 18 Ilaña izaza dawantu dejima dabidikili nawu: “Mujahi iwu muntu,* ilaña wutuumbiliku Baraba!” 19 (Iwu iyala amushili mukaleya muloña wakudikaña nanfulumendi munowu musumba nihamuloña wakujahañana.) 20 Pilatu wahosheli nawu cheñi, muloña yena wakeñeleña kumuumbaku Yesu. 21 Kuhiñahu, atachikili kubidika nawu: “Mujahilenu hamutondu! Mujahilenu hamutondu!” 22 Wahosheli nawu cheñi kamuchisatu nindi: “Muloñadi? Chumanyi chatama chinakoñiyi iwu muntu? Hinamuwana namuloña wakumujahilahuku; Dichi ami nukumubabesha hohu, nimuumbiku.” 23 Hohenohu, antu akolelihu nakulomba namazu atiyakana nawu amujahi,* nawa mazu awu amuzeyesheli. 24 Dichi Pilatu wafuukwili kwila mwakeñeleñawu antu. 25 Wombiliku owu iyala akeñeleñawu, ashiliwu mukaleya muloña wakudikaña nanfulumendi nikujahañana, ilaña Yesu wamuhanini kulonda amujahi kwesekeja nachakeñeleñawu.

26 Dichi chamutwalileñawu, akwatili iyala wumu wejina daShimona wakuKireni wafumineña mwiluña damukamwihi, nawa amusendesheli mutondu wakuyandishila* nakumulondela Yesu hanyima. 27 Antu amavulu nankashi adiña nakumulondela, kubombelahu niambanda atwalekelihu nakudishona nikumudila makumbu. 28 Yesu washetumukili, wayitalili owu ambanda nakuhosha nindi: “Enu anyana kaYerusalema awambanda, lekenu kundila. Ilaña didilenu enu aweni nianyanenu; 29 muloña tiyenu! mafuku anakwinza hakahoshawu antu nawu, ‘Adi namuzañalu wowu ambanda anshinta, nimavumu abulili kuvwala anyana nimayeli abulili kwamusha!’ 30 Kuhiñahu, akatachika kuleja jimpidi nawu, ‘Tuhinukilenu!’ nawa akaleja tupidi-pidi nawu, ‘Tubutenu!’ 31 Neyi elaña yumiyi henohu mutondu wuchidi wutuuta, hanu dinu, chumanyi chakamwekana neyi mutondu wunomi dehi?”

32 Amayala ayedi atupondu, niwena ayitwalileña kulonda akayijahili hamu nayena. 33 Chashikiliwu kwiluña datenañawu nawu Chaañu, amupopeleli hamutondu hamu nanowu atupondu, wumu kuchidiilu chindi, mukwawu nawa kuchimunswa chindi. 34 Ilaña Yesu wahosheleña nindi: “Tata, yanakeni, muloña hiyaneluki chuma chinakwilawuku.” Kubombelahu, asakwili nachinjikijilu hakudanzañena yakuvwala yindi. 35 Dichi antu emeni nakutalaku. Ilaña, anyuuli amusupishileña nakuhosha nawu: “Wamwinineña akwawu; mulekenu yadaamwini yomweni neyi diyi Kristu waNzambi, Watondewa.” 36 Mashidika niwena adiña nakumusupisha nawa amwinkeleña vinyu yabatuka 37 nakuhosha nawu: “Neyi wudi Mwanta wawaYudeya, daamwini eyi aweni.” 38 Nawa hewulu damutu windi asonekelihu nawu: “Iwu diyi Mwanta wawaYudeya.”

39 Kuhiñahu, kapondu wumu akudikiliwu kwenoku watachikili kumusupisha nindi: “Iyeyi Kristu, hidimuku? Daamwini eyi aweni ninetu kumu!” 40 Kapondu mukwawu wamwakwili owu mukwawu nakumuzuwila nindi: “Komana eyi niwoma wakumutiya Nzambi kwosi? Kutoña nineyi anakukusompeshela hamu naniwu muntu. 41 Etu tunateleli kutusompesha, muloña tunakutambula wufwetu wayuma yitwakoñeli; ilaña iwu muntu hanakoñihu chuma chatamaku.” 42 Dichi wamwilili nindi: “Yesu, wakañanukaña neyi wuneñili dehi muWanta weyi.” 43 Yena wamulejeli nindi: “Inakukuleja chalala dalelu nami, wakekala nanami muParadisa.”

44 Hanoyu mpinji yadiña hiora yamu 6,* ilaña kwelili mwidima munodu iluña dejima kushika nihaora yamu 9,* 45 muloña itena* hidatoñekeliku; kuhiñahu ihina dakujika mwiluña dajila databukili hakachi kufuma kwiwulu nakushika kwishina. 46 Dichi Yesu wabidikili nezu datiyakana nindi: “Tata, nashi wumi wami mumakasa eyi.” Chamanishiliyi kuhosha mwenimu, wafwili.* 47 Mukulumpi wamashidika chamweniyi chuma chamwekeni, watachikili kumulemesha Nzambi, nakuhosha nindi: “Chalala, iwu muntu wadiña waloña.” 48 Dichi mazaza awantu ejima apompeli kwenoku nakutala chumichi, chamweniwu yuma yamwekeni, afuntili kumatala awu iku anakudeta hantulu jawu. 49 Niantu ejima amwilukili emeneni hahalehi chanti. Kwenoku kwadiña cheñi ambanda enjili hamu nindi kufuma kuÑaliliya nawa niwena amweni yumiyi.

50 Dichi kwadiña iyala wamuwahi nawa waloña wejina daYosefu, chilolu wamuChota chaSanihedirini. 51 (Iwu iyala hetejeli mpuña yakasiliwu akwawu niyuma yeliliwuku.) Wafumini kuAramateya musumba wawaYudeya, nawa wadiña nakutalila Wanta waNzambi. 52 Iwu iyala wayili kudi Pilatu nakulomba mujimba waYesu. 53 Yosefu wafumishili mujimba hamutondu nakuwuvuñila hehina dadiwahi, nawa wawushili mwijamu* dapokweliwu mwilola, omu mwadiñi kanda akaamikeñamu dehi mufu hela wumu. 54 Dichi dadiña ifuku Dakuloñesha* Sabata, nawa yadiña kwakwihi nakutachika. 55 Ilaña ambanda enjili hamu nindi kufuma kuÑaliliya niwena alondeleli munyima, amweni odu ijamu* nichawukaamikiliwu mujimba windi, 56 nawa ayili nakuloñesha yuma yevumba dadiwahi nimanji evumba dadiwahi. Hela chochu, anookeli hefuku daSabata kwesekeja nanshimbi.