Matewu

19 Yesu chamanishiliyi kuhosha yumiyi, wafumini kuÑaliliya nakuya kujiñinza jaYudeya mwishinadi daYodana. 2 Nawa mazaza amaneni awantu amulondeleli kwenoku nawa wayuukili.

3 Dichi aFwarisi enjili kudi yena kulonda amweseki nawa amwihwili nawu: “Komana nshimbi yeteja iyala kuseña ñodindi hamuloña wudi wejima?” 4 Yena wayakwili nindi: “Enu komana kanda mutañeñahu dehi nawu owu wayileñeli kufuma kukutachika, wayileñeli iyala nimumbanda? 5 Cheñi nawa kanda mutañeñahu dehi nawu: ‘Hamuloña wachumichi, iyala wakashiya tata yindi nimama yindi nakukakela ñodindi, nawa wejima wawu ayedi akekala mujimba wumu’? 6 Dikwila nawu hiyadi cheñi ayediku, ilaña adi mujimba wumu. Dichi, chuma chinabombiyi Nzambi hamu, muntu bayi yachaambulaku.” 7 Wena amwihwili nawu: “Hanu dinu, muloñadi Mosi chahosheleliyi nindi iyala wejima wukuhaña ñodindi yamwinki mukanda wakumuseñelahu wunakumwekesha nawu namuseñi?” 8 Yena wayilejeli nindi: “Hamuloña wakukola kwanyichima yenu, dichaleñeleli Mosi yeteji nindi mwatela kuseña añodi jenu, ilaña kufuma hakutachika dichichadiña wanyi. 9 Inakuyileja nami muntu wejima wukuseña ñodindi hakadi muloña wawuvumbi* nakusumbula wacheñi, neli dehi wujila.”

10 Atumbanji amwilili nawu: “Komana neyi wulu dichiwekala, chikuwaha kubula kusumbula.” 11 Yena wayilili nindi: “Bayi neyi antu ejima akutwesha kushakama wujikiku, chiña hohu antu akweti ichi chawaana. 12 Antu amakwawu hiyasumbulañaku muloña nyijimba yawu hiyazatikañaku, amakwawu niwena hiyasumbulañaku muloña ayituñuna* kudi antu, amakwawu nawa hiyasumbulañaku hamuloña waWanta wamwiwulu. Dichi muntu wukutwesha kushakama chakadi kusumbula, yeli mwomwenomu.”

13 Kuhiñahu, Yesu amuleteleli anyana anyanya kulonda yayinañiki makasa nakuyilombelaku, ilaña atumbanji ayizuwilili. 14 Hela chochu, Yesu wayilili nindi: “Yilekenu anyana anyanya, nawa bayi muyilekesha kwinza kudi amiku, muloña Wanta wamwiwulu wawantu adi neyi awa.” 15 Dichi wayinañikili makasa nawa wafuminiku kunodu iluña.

16 Hohenohu, kwenjili muntu nakumwihula nindi: “Ntañishi, chumanyi chachiwahi chinatela kwila kulonda nakekali nawumi wahaya nyaaka?” 17 Wamwilili nindi: “Muloñadi chiwunañihwili hayuma yayiwahi? Kwosi muntu mukwawu wamuwahi, chiña Nzambi hohu. Dichi neyi wunakukeña kwikala nawumi, twalekakuhu kuhemba nshimbi.” 18 Yena wamwihwili nindi: “Nshimbinyi?” Yesu wamulejeli nindi: “Bayi wujaha muntuku, bayi wila wujilaku, bayi wiyaku, bayi wushimuna wunsahu wakutwambaku, 19 lemeshaku tata yeyi nimama yeyi, nawa keñaku mukwenu neyi chiwadikeña eyi aweni.” 20 Owu mukwenzi wamwilili nindi: “Oju nshimbi jejima najihembaña; yumanyi yikwawu yinatela kwila?” 21 Yesu wamulejeli nindi: “Neyi wunakukeña kwikala wawanina,* yaku wakalandishi yuma yiwukweti wuyinki atuzweñi mali; kulonda wiikali neheta mwiwulu; kuhiñahu dinu winzi wiikali mukwakunlondela.” 22 Owu mukwenzi chatiyiliyi awa mazu, wayili iku naneñi muloña wadiña namaheta amavulu. 23 Dichi Yesu wayilejeli atumbanji twindi nindi: “Inakuyileja chalala nami, chakamukalila samaheta kwiñila muWanta wamwiwulu. 24 Inakuyileja cheñi nami, chaswayi ngameli kuhanuka mudisu dandoñu kubadika samaheta kwiñila muWanta waNzambi.”

25 Atumbanji chatiyiliwu awa mazu, ahayamini nankashi nakuhosha nawu: “Komana dinu hinyi anateli kwamwinawu?” 26 Yesu chayishinshikiliyi, wayilejeli nindi: “Kudi antu chumichi chakala, ilaña kudi Nzambi kwosi chuma chakalaku.”

27 Hakumwakula, Petulu wamulejeli nindi: “Talaña! Tunashiyi yuma yejima nakukulondela; dichi yumanyi yitukatambwila?” 28 Yesu wayilejeli nindi: “Inakuyileja chalala nami, hakuleña yuma chachiha hakela Mwana kamuntu nashakami dehi hetanda dindi dakulema, enu munanlondeli mwakashakama hamatanda 12 nakusompesha nyichidi 12 yaIsarela. 29 Dichi muntu wejima wunashiyi matala hela amanakwindi hela ahelindi hela tata yindi hela mama yindi hela anyanindi hela maha kukoola ijina dami, wakatambwila nkulakaji yayumiyi nawa wakekala nawumi wahaya nyaaka.

30 “Dichi antu amavulu anasambiliku, akekala akukumininaku, nawa anakumininiku, akekala akusambila.