Matewu

12 Hayina mpinji Yesu wahitili mumaha atidiku haSabata. Atumbanji twindi atiyili nzala nawa atachikili kukotola nyitu yatidiku nakuda. 2 Chamweniwu chumichi, aFwarisi amwilili nawu: “Talaña! Atumbanji tweyi anakwila chuma chakaanishawu munshimbi kwila haSabata.” 3 Yena wayilili nindi: “Enu komana kanda mutañeñahu dehi chuma chakoñeliyi Davidi helili yena niamayala adiñayi nawu atiyi nzala? 4 Nicheñililiyi mwitala daNzambi yena niamayala adiñayi nawu nakuda mankendi akutenteka kumesu aNzambi, mankendi akaanishiliwu munshimbi yena niakwawu adiñayi nawu kuyiida, chiña hohu atupristuku? 5 Nawa kanda mutañeñahu dehi muNshimbi nawu hajiSabata atupristu mutembeli ajilolaña Sabata, ilaña hiyayinkaña muloñaku? 6 Ilaña ami inakuyileja nami muntu wudi hanu walema kubadika tembeli. 7 Hela chochu, neyi mwelukili mwatalisha awa mazu akwila nawu, ‘Nakeñi luwi, bayi mulambuku,’ himwadi kufwisha namuloña antu akadi muloñaku. 8 Muloña Mwana kamuntu diyi Mwanta waSabata.”

9 Chafuminiyi kunodu iluña, wayili musinagogi yawu, 10 nawa mwenomu mwadiña iyala walepa chikasa! Dichi hakwila nawu amwinki muloña, amwihwili Yesu nawu, “Komana nshimbi yeteja kuuka haSabata?” 11 Wayakwili nindi: “Neyi wukweti mukoku wumu nawa owu mukoku yaholokela mwibuku haSabata, komana hakachi kenu hadihu muntu wukubula kumukwata nakumufumisha mwibuku? 12 Muntu walema chikupu kubadika mukoku! Dichi nshimbi yeteja kwila chuma chachiwahi haSabata.” 13 Kuhiñahu, wamulejeli owu iyala nindi: “Ololaku chikasa cheyi.” Dichi wacholweli nawa chakoleli nakwikala neyi chadiña chikasa chindi chikwawu. 14 Ilaña aFwarisi edikili nakuya nakumushakamina hampuña kulonda amujahi. 15 Yesu chelukiliyi chumichi, wafuminiku. Antu amavulu niwena amulondeleleli nawa wayuukili wejima wawu, 16 ilaña wayikonkomweneni chikupu nindi bayi amushimuna kudi antuku, 17 kulonda mazu ahosheleliwu kuhitila mudi kaprofwetu Isaya ashikijewi, wahosheli nindi:

18 “Tiyenu! Kambuñami inatondeli, inakeña, inatiyaña kuwaha! Nakasha spiritu yami hadi yena nawa wakaleja akwanyuza mwaya wuñaji walala. 19 Hamba kabobola hela kubilelaku nawa kwosi muntu wakatiya izu dindi munyikwakwa yamaneniku. 20 Hamba kakotola iteti dachikekaku nawa hamba kajima wanda wunakufwinda wishiku, sampu naleti wuñaji. 21 Chalala, kuchiñeja kwawakwanyuza kukashindamena mwijina dindi.”

22 Kuhiñahu, amuleteleli iyala waputamesu nawa kamama wadiña nawandemoni, wamuukili chakwila owu iyala kamama watachikili kuhosha nikumona. 23 Dichi mazaza awantu ejima ahayamini nakutachika kuhosha nawu: “Komana iwu hidiyi Mwana kaDavidiku?” 24 Chatiyiliwu chumichi, aFwarisi ahosheli nawu: “Iwu muntu wafumishaña andemoni nañovu yakufuma kudi Belezebuli,* nyuuli wawandemoni.” 25 Chelukiliyi yitoñojoka yawu, wayilejeli nindi: “Wanta wejima wadaambulaña waweni wakisikaña, nawa musumba wejima hela itala dadaambulaña dadeni dakolaña wanyi. 26 Chochimu, neyi Satana yafumisha Satana, dikwila nawu nadaambuli yomweni; indi dinu wanta windi wukukola ñahi? 27 Cheñi nawa, neyi nafumishaña andemoni nañovu yakufuma kudi Belezebuli, indi anyanenu ayifumishaña nañovu janyi? Ichi dichikayisompeshelawu kudi atumbanji twenu nawu mwaluwa. 28 Ilaña neyi nafumishaña andemoni nañovu yaspiritu yaNzambi, dikwila nawu Wanta waNzambi chalala wunenzi chakadi enu kwiluka. 29 Nawa, muntu nateli kulukuka ñahi itala damuntu wukweti ñovu nakumubuwa maheta indi? Watela kusambila kumukasa yeniwu muntu wukweti ñovu. Neyi namukasi dehi, dihanateliyi dinu kubuwa* mwitala dindi. 30 Muntu wejima wabula kwikala kukabadi kami, hichilumbu chami, nawa muntu wejima wabulaña kuzatila hamu nanami kulonda yakwashi antu enzi kudi ami, wapalañeshaña antu kufuma kudi ami.

31 “Muloña wachumichi inakuyileja nami, antu akayanakena nshidi yejima nimazu akasawuntu ejima ahoshañawu, ilaña muntu wejima wukusawula spiritu hiyakamwanakenaku. 32 Chakutalilahu, muntu wejima wukusawula Mwana kamuntu akamwanakena; ilaña muntu wejima wasawulaña spiritu yajila, akamwanakena wanyi, chili munshakaminu yamakonu* hela yakumbidi.

33 “Hela chakwila munateli kwilisha mutondu kwikala wawuwahi ninyikabu yindi kwikala yayiwahi, chili kwilisha mutondu kwikala watama ninyikabu yindi kwikala yatama, mutondu awilukilaña kunyikabu yindi. 34 Enu anyana katubandayula, munateli kuhosha ñahi yuma yayiwahi henohu mwatama? Muloña yuma yidi mumuchima diyi yahoshañayi muntu. 35 Muntu wamuwahi wahoshaña yuma yayiwahi, muloña mumuchima windi mwenzala yuma yayiwahi. Ilaña muntu watama wahoshaña yuma yatama, muloña mumuchima windi mwenzala yuma yatama. 36 Inakuyileja nami Hefuku daKusompesha antu akalumbulula kudi Nzambi hayuma yejima yamukunkulwayi yahoshañawu; 37 muloña akakutena kuloña namazu iwahoshaña, akakufwisha namazu iwahoshaña.”

38 Hakumwakula, ansoneki amu nawaFwarisi ahosheli nawu: “Ntañishi, tunakukeña kumona chinjikijilu chakufuma kudi eyi.” 39 Wayakwili nindi: “Ikiñu datama nawa dabula kushinshika dakeñaña kumona chinjikijilu, ilaña kwosi chinjikijilu chakadimwekeshelawuku, chiña chinjikijilu chakaprofwetu Yona hohu. 40 Neyi chochadiñayi Yona mwivumu danshi muneni mafuku asatu mwaana niwufuku, niMwana kamuntu wakekala mwijamu mafuku asatu mwaana niwufuku. 41 Antu amuNiniva akasañuka hamu nanidi ikiñu hakusompesha* nawa akadifwisha idi ikiñu namuloña, muloña abalumukili munyichima nansañu yashimwininiyi Yona. Ilaña tiyenu! muntu wamubadika Yona wudi hanu. 42 Mwanta wamumbanda wakukabeta kachidiilu wakasañuka hamu nanidi ikiñu hakusompesha* nawa wakadifwisha namuloña, muloña yena wafumini kwakulehi chikupu nakwinza nakutiya maana aSolomoni. Ilaña tiyenu! muntu wamubadika Solomoni wudi hanu.

43 “Neyi ndemoni yafuma mudi muntu, wahitañanaña mumaluña akadi menji nakukeñakeña iluña dakunookela. Neyi nadiwani wanyi, 44 wahoshaña nindi, ‘Nukufunta mwitala dami munafumini,’ nawa neyi nashiki, wukuwana mwitala mwosi wunakushakamamu, ilaña anakombimu nikuwahishamu chiwahi. 45 Kuhiñahu, iwu ndemoni wukuya nakusenda akwawu andemoni 7 atama chikupu kubadika yena, neyi aneñilimu dehi, akushakama mwenomu; nawa chihandilu chaniwu muntu chakukuminina chikusweja kutama kubadika chichadiña hatachi. Dichi chichakekala nikunidi ikiñu datama.”

46 Chadiña nakuhoshayi namazaza, mama yindi nianakwindi emeni hanji, akeñeleña kuhosha nindi. 47 Dichi muntu wumu wamwilili nindi: “Talaña! mama yeyi nianakweyi anemani hanji, anakukeña kuhosha neyi.” 48 Yena wamwakwili iwu muntu wahosheleña nayena nindi: “Indi mama yami hinyi nawa anakwami hiyanyi?” 49 Dichi wolweli chikasa chindi nakwinyika atumbanji twindi nindi: “Talaña! Mama yami nianakwami! 50 Muloña muntu wejima welaña nkeñelu yaTata yami wekala mwiwulu, yenowu diyi manakwami, diyi muhelami nawa diyi mama yami.”