Luka

11 Hampinji yimu, Yesu wadiña kwiluña dimu nakulomba, chalekeliyi, wumu wahadi atumbanji twindi wamulejeli nindi: “Mwanta, tuleji chakulomba neyi chochalejeliyi Yowanu atumbanji twindi.”

2 Dichi wayilejeli nindi: “Neyi himukulomba, hoshenuña nenu: ‘Tata, ijina deyi diikali dajila.* Wanta weyi winzi. 3 Twinkeña yakuda hefuku-hefuku kwesekeja nayuma yitunakaankili hanodu ifuku. 4 Nawa twanakeni nshidi jetu, muloña ninetu twanakenaña antu ejima ekalaña nanyikudi yetu;* nawa tukwashi kulonda kweseka kubuli kutuzeyesha.’”

5 Kuhiñahu, wayilejeli cheñi nindi: “Tuhoshi netu, hakachi kenu hadi wumu wudi nebwambu dindi nawa yaya kudiyi mukachi kawufuku nakumwila nindi, ‘Ibwambu, nkongweshiku* mankendi asatu, 6 muloña ibwambu dami mukwawu dihanashikiyi kufuma halwendu nawa hinikweti yakuda yakumwinkaku.’ 7 Ilaña owu ibwambu dindi wudi mwitala hakumwakula nindi: ‘Lekaku kunkabisha. Kuchiisu anakiyiku dehi nawa ami nianyanami anyanya tudi dehi mukadidi. Hinukutwesha kuhinduka nakukwinka chumaku.’ 8 Inakuyileja nami, muloña wanyikoyu yindi,* iwu muntu wukuhinduka nakumwinka yuma yejima yinakukeñayi, bayi neyi muloña wakwila hibwambu dindiku. 9 Dichi inakuyileja nami, twalekenuhu kulomba, akayinkachu; twalekenuhu kukeñakeña, mwakawana; twalekenuhu kudondomwena, akayenzunwinaku. 10 Muloña muntu wejima walombaña, watambwilaña, muntu wejima wakeñakeñaña, wawanaña, nimuntu wejima wadondomwenaña, amwenzunwinañaku. 11 Kuhosha hohu chalala, tata yawantwinyi wukwila neyi mwanindi namulombi inshi, yena yamwinka kapela chatela yamwinki inshi? 12 Hela neyi yamulomba iteta, yena yamwinka kanjimbu? 13 Dichi neyi enu akwanshidi mweluka kwinka anyanenu yawaana yayiwahi, dikwila nawu Tata wekala mwiwulu wukubadikahu kwinka antu amulombaña spiritu yajila.”

14 Kuhiñahu, wafumishili ndemoni wawumama. Owu ndemoni chafuminiyi, muntu wadiña kamama watachikili kuhosha nawa mazaza awantu ahayamini. 15 Ilaña antu amu ahosheli nawu: “Wafumishaña andemoni nañovu yakufuma kudi Belezebuli,* nyuuli wawandemoni.” 16 Antu amakwawu niwena, hakumweseka, atachikili kumwila nawu yayimwekesheli chinjikijilu chakufuma mwiwulu. 17 Chelukiliyi yitoñojoka yawu, wayilejeli nindi: “Wanta wejima wadaambulaña waweni wakisikaña, nawa itala dadaambulaña dadeni dahumukaña. 18 Chochimu, neyi Satana niyena yadaambula yomweni, indi wanta windi wukukola ñahi? Muloña mwahoshaña nenu nafumishaña andemoni nañovu yakufuma kudi Belezebuli. 19 Neyi nafumishaña andemoni nañovu yakufuma kudi Belezebuli, indi anyanenu ayifumishaña nañovu janyi? Ichi dichikayisompeshelawu kudi atumbanji twenu nawu mwaluwa. 20 Ilaña neyi nafumishaña andemoni namunu waNzambi, dikwila nawu Wanta waNzambi chalala wunenzi chakadi enu kwiluka. 21 Neyi muntu wukweti ñovu wunadimanyeki chiwahi nayitwa, yahemba chipañu chindi, yuma yindi yikwikala yayiweni. 22 Ilaña neyi muntu wamubadika ñovu yamulukuka iwu muntu nawa yamwimika mushindu, wukumutambula yitwa yanjita yejima mwakuhwelelayi owu muntu nakwanzañana nawakwawu oyu yuma yinamutambuliyi. 23 Muntu wejima wabula kwikala kukabadi kami, hichilumbu chami, nawa muntu wejima wabulaña kuzatila hamu nanami kulonda yakwashi antu enzi kudi ami, wapalañeshaña antu kufuma kudi ami.

24 “Neyi ndemoni yafuma mudi muntu, wahitañanaña mumaluña akadi menji nakukeñakeña iluña dakunookela, neyi nadiwani wanyi, wahoshaña nindi, ‘Nukufunta mwitala dami munafumini.’ 25 Nawa neyi nashiki, wukuwana mwitala anakombimu nikuwahishamu chiwahi. 26 Kuhiñahu, iwu ndemoni wukuya nakusenda akwawu andemoni 7 atama chikupu kubadika yena, neyi aneñilimu dehi, akushakama mwenomu. Dichi, chihandilu chaniwu muntu chikusweja kutama kubadika chichadiña hatachi.”

27 Chahosheleñayi yumiyi, mumbanda wumu wadiña hanodu izaza dawantu wabidikili nindi: “Ivumu dakusendeli nikumayeli kuwaamwini jakiswilewa!” 28 Ilaña Yesu wahosheli nindi: “Inehi, adi namuzañalu wowu antu atiyaña izu daNzambi nikudihemba!”

29 Mazaza awantu chiyadipompesheleña hamu, watachikili kuhosha nindi: “Idi ikiñu hiikiñu datama; dakeñaña kumona chinjikijilu, ilaña kwosi chinjikijilu chakadimwekeshelawuku, chiña chinjikijilu chaYona hohu. 30 Neyi chochekaliliyi Yona chinjikijilu kudi akwaNiniva, niMwana kamuntu dichakekalayi kunidi ikiñu. 31 Mwanta wamumbanda wakukabeta kachidiilu wakasañuka hamu nanidi ikiñu hakusompesha* antu amunidi ikiñu nawa wakayifwisha namuloña, muloña yena wafumini kwakulehi chikupu nakwinza nakutiya maana aSolomoni. Ilaña tiyenu! muntu wamubadika Solomoni wudi hanu. 32 Antu amuNiniva akasañuka hamu nanidi ikiñu hakusompesha* nawa akadifwisha idi ikiñu namuloña, muloña abalumukili munyichima nansañu yashimwininiyi Yona. Ilaña tiyenu! muntu wamubadika Yona wudi hanu. 33 Neyi muntu nabutuli inoñu, hadishaña mwiluña mwaswamanyika hela kudibutila mwibañuku,* ilaña waditentekaña hatentekañawu inoñu kulonda antu anakwiñila mukapeka amoni chejeji. 34 Inoñu damujimba hidisu deyi. Neyi disu deyi datala mumu hohu,* nimujimba weyi wejima wukutoñekaña;* ilaña neyi disu deyi didi nalwisu,* nimujimba weyi wejima wukwikala mwidima. 35 Dichi, babalaku kulonda chejeji chidi mudi eyi chibuli kwikala mwidima. 36 Muloña, neyi mujimba weyi wejima wukutoñekaña chakadi nihamu hadi mwidima, dikwila nawu mujimba weyi wukutoñekaña to-o neyi inoñu chidayitoñekelaña chejeji.”

37 Chahosheliyi awa mazu, kaFwarisi wamutambikili nindi yadiili nindi hamu yakuda. Dichi weñilili mwitala nawa washakamini kumesa. 38 Ilaña, kaFwarisi wahayamini chamumweniyi Yesu nakuda chakadi kwisuka.* 39 Mwanta wamulejeli nindi: “Enu aFwarisi, mwatookeshaña hanji yakaapu* nicheña, ilaña mukachi kenu mwenzala ntuuya* nikutama. 40 Enu antu abula maana! Komana muntu waleñeli mukachi hidiyi waleñeli nihanjiku? 41 Ilaña, hanenuña yawaana yaluwi* yayuma yidi munyichima yenu, dichi yuma yejima yikekala yitooka kudi enu. 42 Ilaña, oyihuñu yimwakamona enu aFwarisi, muloña mwahanaña yamwikumi yaminti, nipeganoni* nimafu amakwawu ejima amavumba amawahi adimañawu mumatempa, ilaña mwadiwulaña wuñanji nikumukeña Nzambi! Yumiyi mwateleleli kuyihana, ilaña himwateleleli kudiwula wuñanji nikumukeñaku. 43 Oyihuñu yimwakamona enu aFwarisi, muloña mumasinagogi mwakeña kushakama hayitwamu yakumbidi* nawa mwakeñaña nenu ayimusheña muyisankanu! 44 Oyihuñu yimwakamona enu, muloña mudi neyi ana majamu* abulaña kumwekana chikupu,* hahitañawu antu chakadi kwiluka nawu anakuhitahu!”

45 Muntu wumu wahadi owu antu elukili Nshimbi chikupu wamulejeli nindi: “Ntañishi, chiwunahoshi yumiyi, wunatutuki ninetu nawa.” 46 Yena wahosheli nindi: “Oyihuñu yimwakamona ninenu mweluka Nshimbi chikupu, muloña enu mwatwikaña akwenu yiteli yalema yakala kusenda, ilaña enu aweni himwatweshaña nikuyiswija oyu yiteli hela namunu wenu wumuku!

47 “Oyihuñu yimwakamona enu, muloña mwatuñaña majamu* awatuprofwetu ajahiliwu kudi ankakulula jenu! 48 Chakadi nikujina, mweluka nyidimu yawankakulula jenu ilaña mwayitejaña, muloña wena ajahili atuprofwetu, ilaña enu munakutuña majamu awu. 49 Dihafumini Nzambi mumaana indi niyena yahoshi nindi: ‘Nakayitemeshela atuprofwetu niapostolu nawa hakachi kawu amu akayijaha, amakwawu niwena akayikabisha, 50 kulonda mashi awatuprofwetu ejima apwekeli kufuma haaliliwu chikuku chakaayi* akayikeñeli kunidi ikiñu, 51 kutachikila kumashi aAbeli kushika nikumashi aZekariya ajahililiwu hakachi kakameña netala.’* Inakuyileja chalala nami, awa mashi akayikeñela kunidi ikiñu.

52 “Oyihuñu yimwakamona enu mweluka Nshimbi chikupu, muloña mwafumishiliku nsapi yakwiluka.* Enu aweni himweñililimuku nawa antu anakukeña kwiñilamu, himwayitejañaku!”

53 Dichi, chafuminiyi kwenoku, ansoneki nawaFwarisi atachikili kumukanjikija nankashi nikumwihula malwihu amavulu, 54 kulonda amudi kwizu amoni hakumwinkela muloña namazu akuhoshayi.