Chimwekeshu

16 Kuhiñahu, natiyili izu datiyakana dafumini mwiluña dajila dalejeli añelu 7 nadu: “Yenu muhuñunwini hamaseki kuzuwa kwaNzambi kudi muyeña yakunama 7.”

2 Kañelu watachi wayili nawa wahuñunwinini hamaseki yuma yadiña mucheña chindi chakunama. Kuhiñahu, maboñola asweja enjili hadi antu adiña nachinjikijilu chakanyama wamwisaña chisumi nawa adifukwileña kudi chifwikija chindi.

3 Kañelu wamuchiyedi wahuñunwinini mukaluñalwiji yuma yadiña mucheña chindi chakunama. Kuhiñahu, kaluñalwiji kabalumukili nakwikala mashi neyi mashi amuntu wafwa, nawa yileñaleña yejima yayumi* yamukaluñalwiji yafwili.

4 Kañelu wamuchisatu wahuñunwinini mutuloña nimutuseloki twamenji yuma yadiña mucheña chindi chakunama. Kuhiñahu, jejima jabalumukili mashi. 5 Natiyili kañelu wadiña nawuswa hamenji nakuhosha nindi: “Eyi wudiku nawa wadiñaku, Eyi washinshika, waloña nanochu chiwunasompi muniyi njila, 6 muloña apwekesheli mashi awakwakujila niawatuprofwetu, nawa wunayinki mashi kulonda anwi; chumichi chinayiteleli wena.” 7 Nawa natiyili izu dafumini mukameña nadu: “Eñañi, Yehova Nzambi, Wañovu Jejima, kusompesha kweyi kwalala nawa kwaloña.”*

8 Kañelu wamuchiwana wahuñunwinini hetena* yuma yadiña mucheña chindi chakunama, nawa itena adinkeli ñovu yakwocha antu nakesi. 9 Dichi iyena dasweja dayocheli antu, ilaña asawili ijina daNzambi wukweti wuswa haniyi yipupu, nawa antu wenawa hiyabalumukili munyichima yawu nakumulemeshaku.

10 Kañelu wamuchitanu wahuñunwinini hetanda dakanyama wamwisaña chisumi yuma yadiña mucheña chindi chakunama. Kuhiñahu, wanta windi weyilili bwi-i, nawa antu atachikili kutafunya madimi awu muloña wakutiya kukata, 11 ilaña amusawili Nzambi wamwiwulu muloña wakukata kwatiyileñawu nimaboñola awu, nawa hiyabalumukili munyichima yawu nakuleka nyidimu yawuku.

12 Kañelu wamu 6 wahuñunwinini hakaloña weneni Yufurati yuma yadiña mucheña chindi chakunama, kuhiñahu, menji amuniwu kaloña ominimu chawu-u kulonda aloñesheli chadimu njila yawanyanta akafumina kwaselelaña itena.*

13 Namweni mazu onenawu* asatu amwekeneña neyi yuula anakufuma mukanwa kachanzañombi nimukanwa kakanyama wamwisaña chisumi nimukanwa kakaprofwetu wakutwamba. 14 Kafwampi, awa mazu, himazu onenawu kudi andemoni nawa akoñaña yihayamisha, ayaña kudi anyanta ahanu hamaseki hejima nakuyipompeshela hamu kunjita yefuku deneni daNzambi Wañovu Jejima.

15 “Tiyenu! Inakwinza neyi chenzañayi ikombi. Wudi namuzañalu yowu muntu watonaña nikuhemba yakuvwala yindi yahewulu kuchiina wakenda nzekesi kulonda antu amoni nsonyi yindi.”

16 Nawa ayipompesheli hamu kwiluña datenañawu muchiHeberu nawu Amagedoni.*

17 Kañelu wamu 7 wahuñunwinini hampepela yuma yadiña mucheña chindi chakunama. Hohenohu mwiluña dajila mwatiyakeni izu datiyakana dafumini mwitanda nadu: “Ichi dinu kunahu!” 18 Dichi kwekalili kukena kwanzaji, mazu nikudidima nawa kwenjili mutentanshi weneni wabadikili nyitentanshi yejima yamwekanahu dehi kufuma hampinji yaleñeliwu antu hamaseki, iwu mutentanshi wadiña weneni nawa wañovu chikupu. 19 Musumba weneni wabalukili muyibalu yisatu, nawa nyisumba yawakwanyuza yahumokeli; Nzambi wamwanukili Babiloni Muneni kulonda yamwinki kaapu* mwadiña vinyu yandulu yakuzuwa kwindi yanwi. 20 Nawa yituutu yejima yatemokeli, mpidi nijena hiyajiwaniniku. 21 Kuhiñahu, nvula yamalola yeneni yenjili kufuma mwiwulu nakunokela antu, ilola dimu dalemeni neyi ntalenta* yimu, dichi antu amusawili Nzambi muloña wachipupu chanvula yamalola yayinokeleli, muloña chipupu chenochu chatoheli chikupu.