Maku
14 Kwashalili mafuku ayedi hakwila nawu kwiikali Chipandakenu niChawija chaMankendi Akadi Iluñi. Nawa akulumpi jawatupristu niansoneki akeñeleña njila yakumukwatilamu* Yesu kuhitila mukumutwambila kulonda amujahi; 2 muloña ahosheleña nawu: “Bayi tumukwatila hachawijaku; hadaha hakenda kekala ipumba dawantu.”
3 Hampinji yadiileñayi* muBetani mwitala daShimona wadiña nambumba hatachi, kwenjili mumbanda wasendeli ibotolu* mwadiña manji evumba dadiwahi, naradi* yayeni, manji awuseya nankashi. Dichi washinkwili kwibotolu nakutachika kumuhuñunwina Yesu manji kumutu. 4 Atumbanji amu chamweniwu chumichi, azuwili nakuhosha kudi wumu namukwawu nawu: “Muloñadi awa manji evumba dadiwahi chinakukisikilawu? 5 Muloña awa manji evumba dadiwahi adi kuyilandisha namadenari akubadika ha 300 nakuyinka atuzweñi mali!” Dichi, iwu mumbanda amuhililili* nankashi. 6 Ilaña Yesu wahosheli nindi: “Mulekenu kwindi. Munakumukabishiladi iwu mumbanda? Nanzatili mudimu wawuwahi. 7 Muloña enu mwekalaña nawatuzweñi mpinji yejima nawa munateli kuyilila yuma yayiwahi mpinji yejima yimunakeñi, ilaña ami hinakekalaña nenu mpinji yejimaku. 8 Neli chuma chatela kwilayi; nanhuñunwini chadimu manji evumba dadiwahi hamujimba wami kulonda yawahishili chadimu mujimba wami chakunjiika. 9 Inakuyileja chalala nami, kwejima kwakashimwinawu nsañu yayiwahi mwahita kaayi kejima, nichuma chinakoñiyi iwu mumbanda akachihoshañahu hakumwanuka.”
10 Kuhiñahu, wumu hakachi kawapostolu 12, Yudasi Isakaroti, wayili kudi akulumpi jawatupristu kulonda yamufukejeli kudi wena. 11 Chachitiyiliwu, atiyili kuwaha nankashi nawa amukanini kumwinka mali asiliva. Dichi watachikili kukeñakeña njila yakumufukejelamu.
12 Hefuku datachi daChawija chaMankendi Akadi Iluñi, hefuku dalambwileñawu mulambu waChipandakenu neyi chelileñawu dikalu, atumbanji twindi amwilili nawu: “Kudihi kuwunakukeña tuyi nakukuloñeshela kulonda wudiiliku Chipandakenu?” 13 Hohenohu watemesheli atumbanji twindi ayedi nakuyileja nindi: “Yenu mumusumba, mukudibulakana neyala wunasendi nsaba yamenji. Mumulondeli, 14 nawa mwejima mukwiñilayi, mumuleji mwini itala nenu, ‘Ntañishi nahoshi nindi: “Indi kapeka mwakukaama enyi munukudiila Chipandakenu nawatumbanji twami kadi kudihi?”’ 15 Wukuyileja kapeka keneni kadi hewulu, kanawahishiwu chadimu. Mutuloñesheli Chipandakenu mwenomu.” 16 Dichi atumbanji ayili, eñilili mumusumba nawa awanini yuma yejima neyi chochayilejeliyi nawa aloñesheli jaChipandakenu.
17 Chikwelili melela, wenjili nawapostolu 12. 18 Nawa chashakaminiyi kaheña kumesa nakuda, Yesu wahosheli nindi: “Inakuyileja chalala nami, wumu hakachi kenu innakuda nindi wukunfukejela.” 19 Chatiyiliwu awa mazu, aneñeli nawa hamuntu-hamuntu atachikili kumwila nawu: “Yami tahindi?” 20 Yena wayilejeli nindi: “Iwu muntu wudi hakachi kawapostolu 12, yowu wunakutanta nanami mucheña. 21 Mwana kamuntu nakuya nakufwa neyi chochasonekawu hadi yena, ilaña oyihuñu yikumonayi muntu wukumufukejela Mwana kamuntu! Chadi kuwaha neyi owu muntu havwalikiliku.”
22 Chadiileñawu, wanoneli dinkendi, chalombeliyi, wadihumwini nakuyinka, nakuyila nindi: “Tambulenu; idi dinkendi dinakwimenaku mujimba wami.” 23 Kuhiñahu, wanoneli kaapu,* chalombeliyi nakusakilila, wayinkeli nawa wejima wawu anwinimu. 24 Yesu wayilejeli nindi: “Aka kaapu kanakwimenaku* ‘mashi ami achitiyañenu,’ akupweka kukoola antu amavulu. 25 Inakuyileja chalala nami, hinamba kanwa cheñi vinyuku, sampu niifuku dinakanwa vinyu yayiha muWanta waNzambi.” 26 Nkumininaku, chamanishiliwu kwimba tumina twakumuhameka* Nzambi, ayili kuMpidi yaMaolivi.
27 Nawa Yesu wayilejeli nindi: “Wejima wenu mukunshiya,* muloña chasonekewa nawu: ‘Nakatapa kabiña, nawa anyikoku akapalañana.’ 28 Dichi hanyima yakunsañula, nakayañahu dehi kuÑaliliya.” 29 Ilaña Petulu wamulejeli nindi: “Hela neyi ejima akukushiya, ami nukukushiya wanyi.”* 30 Hohenohu Yesu wamwilili nindi: “Inakukuleja chalala nami, dalelu, wunu wufuku henohu ikombu kanda yeteli kayedi, wukunkaana mapampa kasatu.” 31 Ilaña Petulu wakoleliku chikupu nakuhosha nindi: “Hela tuhu kufwa hamu naneyi, ami nukukukaana wanyi.” Dichi niakwawu ejima niwena atachikili kuhosha mwomumu.
32 Kuhiñahu, ayili kwiluña datenañawu nawu Ñesemani, nawa wayilejeli atumbanji twindi nindi: “Shakamenu hanu, ami nayi nakulomba.” 33 Dichi wasendelihu Petulu, Yakoba niYowanu nawa waneñeli* chikupu nikutiya kumuchima kutama nankashi. 34 Wayilejeli nindi: “Naneñi nankashi chakwila inakukeña nikufwa. Shalenu hanu nawa tonenuña.” 35 Chaswininiyi hambidi chanti, wadibukili heseki nakutachika kulomba nindi neyi chinatwesheki, ayina mpinji yihitili kwakulehi nayena. 36 Wahosheli cheñi nindi: “Aba,* Tata, kudi eyi yuma yejima yatweshekaña; fumishaku aka kaapu* kudi ami. Ilaña, bayi neyi chinnakukeña amiku, chiña chiwunakukeña eyi.” 37 Chafuntiliyi wayiwanini anakaami mutulu, nawa wamwilili Petulu nindi: “Shimona, wunakaami tahindi? Wakañanya kwikala nañovu yakutona hadi ora yimu tahindi? 38 Dichi tonenuña nawa lombenuña kulonda mubuli kwiñila mukweseka. Chalala spiritu yinakukeña,* ilaña mujimba wunazeyi.” 39 Wayili cheñi nakulomba nawa wahosheli yuma yoyimu. 40 Wenjili cheñi nawa wayiwanini anakaami, muloña mesu awu alemeni natulu, dichi akañenyi nichakumwakula. 41 Wenjili cheñi kamuchisatu nawa wayilejeli nindi: “Munakukaama nikunooka hampinji yamuchidiwu! Kunahu! Ora yinashiki dehi! Talenu! Mwana kamuntu hiyakumufukeja nakumuhana mumakasa awakwanshidi. 42 Nyamukenu, tuyenu. Talenu! Mukwakunfukejela nashiki dehi kwakwihi.”
43 Nawa hohenohu, iku wuchidi kuhosha, Yudasi, wumu wahadi apostolu 12, wenjili nezaza dawantu datemesheliwu kudi akulumpi jawatupristu, ansoneki niakulumpi, iku anasendi mpoku jatubali nitubama. 44 Mukwakumufukejela wadiña wayileja dehi owu antu chinjikijilu nindi: “Yowu muntu inukufufwa, diyi yowenowu; mumukasi kulonda muyi nakumuhemba.” 45 Dichi wenjili kwadiñayi nakumwila nindi, “Rabi!” nawa wamufufwili. 46 Dichi amukwatili nawa amukasili. 47 Hela chochu, wumu hakachi kanowu emeni kukamwihi, waholeli mpoku yindi yakabali nakutapa nduñu yakapristu muneni nakumuketula itu dindi. 48 Ilaña Yesu wayilili nindi: “Munenzi nampoku jatubali nitubama nakunkwata neyi kwiji munenzi nakukwata kapondu tahindi? 49 Hefuku-hefuku, nashakamineña nanenu mutembeli nakutañisha, enu himwankasiliku. Hela chochu, yumiyi yinamwekani kulonda Nsona yishikijewi.”
50 Dichi atumbanji ejima amushiyili nakumutemuka. 51 Hela chochu, kansi weyala wavwalili hohu chakuvwala chehina dadiwahi hamujimba windi watachikili kumulondela hanyima mukamwihi nawa esekeli nawu amukwati, 52 ilaña wasubukili muchakuvwala chindi chehina nakutemuka nzekesi.*
53 Kuhiñahu, Yesu amutwalili kudi kapristu muneni nawa akulumpi jawatupristu niakulumpi niansoneki ejima apompeli. 54 Ilaña Petulu wamulondeleleña hahalehi chanti kushika nimulubanza lwetala dakapristu muneni; nawa washakamini hamu nawañamba amwitala nakwota kesi. 55 Hampinji yeniyi, akulumpi jawatupristu niakwaSanihedirini* ejima amukeñeleleña Yesu wunsahu wakutwamba kulonda amujahi, ilaña hiyawaninihu wunsahu wakutwamba hela wumuku. 56 Mwamweni, antu amavulu adiña nakushimuna wunsahu wakumutwambila, ilaña wunsahu wawu wadiña nakwambokelamu. 57 Cheñi, antu amakwawu emeneña nakushimuna wunsahu wakumutwambila nawu: 58 “Twamutiya nakuhosha nindi, ‘Nukusanda iyi tembeli yatuñiliwu namakasa nawa mumafuku asatu, nukutuña yacheñi bayi yakutuña namakasaku.’” 59 Hela chakwila ashimwini iyi nsañu, hohamu wunsahu wawu wambokelelimu.
60 Kuhiñahu, kapristu muneni wemeni mukachi kawu nawa wamwihwili Yesu nindi: “Indi eyi wukuhoshahu neyidi? Wunatiyi wunsahu wunakushimunawu awa amayala hadi eyi tahindi?” 61 Ilaña yena wamweneni kwanzo-o nawa hakwiliku. Cheñi kapristu muneni wamwihwili nindi: “Komana yeyi Kristu Mwana kaWakiswilewa tahindi?” 62 Kuhiñahu Yesu wamwakwili nindi: “Eña yami; nawa mwakamona Mwana kamuntu nashakami kuchikasa chachidiilu chañovu nawa nakwinza namavu amwiwulu.” 63 Hohenohu, kapristu muneni watabwili yakuvwala yindi nakuhosha nindi: “Wunsahu wamuchidinyi cheñi wutukukeña? 64 Munatiyi kasawuntu kanahoshiyi. Munatoñojokihu nenudi?” Wejima wawu asompeli nawu watela kufwa. 65 Dichi antu amu atachikili kumufwijila mazeñi nikumubuta kumesu nikumweta jinkonyi nawa amwilili nawu: “Profwetaku!” Hanyima yakumweta jimbañala kumesu, atupasu amusendeli.
66 Hampinji yadiñayi Petulu mulubanza lwetala, ñamba wumu wakansi wamumbanda wakapristu muneni wenjili. 67 Chamumweniyi Petulu nakwota kesi, wamushinshikili nakumwila nindi: “Nineyi nawa wadiña hamu naniwu Yesu wakuNazareta.” 68 Ilaña yena wakaanini nakuhosha nindi: “Ami kwami iwu muntu hinamwilukaku nawa ninsañu yiwunakuhosha, ami kwami nayiluki wanyi,” hohenohu wayili hanji kuchiisu chakwiñilila. 69 Kwenoku ñamba wamumbanda wakansi wamumweni nawa watachikili cheñi kuleja antu emeni mukamwihi nindi: “Iwu niyena wudi hakachi kawatumbanji twindi.” 70 Yena wakaanini cheñi. Chihahitili kapinji kanti, antu emeni kwakwihi atachikili cheñi kumuleja Petulu nawu: “Kuhosha hohu chalala, nineyi wudi hakachi kawatumbanji twindi, muloña wudi wakuÑaliliya.” 71 Ilaña watachikili kudishiña nikusanyika nindi: “Ami kwami iwu muntu imunakutena, hinamwilukaku!” 72 Hohenohu ikombu yetela nikamuchiyedi nawa Petulu wanukili mazu amulejeliwu kudi Yesu nindi: “Henohu ikombu kanda yeteli kamuchiyedi, wukunkaana mapampa kasatu.” Dichi waneñeli nankashi nawa watachikili kudila.