Luka
20 Ifuku dimu chadiña nakutañishayi antu mutembeli nikushimwina nsañu yayiwahi, akulumpi jawatupristu, niansoneki niakulumpi enjili, 2 nawa amwihwili nawu: “Tuleji, yuma yejimiyi wayikoñaña nawuswa wanyi? Hela hinyi wakwinkeli iwu wuswa?” 3 Yena wayakwili nindi: “Ninami nawa niyihuliku lwihu, nawa munleji: 4 Komana ñovu yaYowanu yakupapatisha, yafumini mwiwulu tahindi kudi antu?” 5 Dichi wena atachikili kuhanjeka mulwawu nawu: “Neyi tuhoshi netu, ‘Mwiwulu,’ yena wukutwihula nindi, ‘Hanu dinu, muloñadi chimwabulilili kumukuhwelela?’ 6 Cheñi neyi tuhoshi netu, ‘Yafumini kudi antu,’ antu ejima akutwasa malola, muloña eluka chikupu nawu Yowanu wadiña kaprofwetu.” 7 Dichi amwakwili nawu elukili wanyi kwafumishiliyi oyu ñovu. 8 Yesu niyena wayilejeli nindi: “Ninami nawa nukuyileja wanyi kunafumishaña wuswa wunakoñaña nachu yumiyi.”
9 Kuhiñahu, watachikili kuyileja antu ichi chakutalilahu nindi: “Iyala wumu wadimini itempa danyivinyu, wadishiyili mumakasa awakwakudima nawa yena wayili kwituña dacheñi hampinji yayilehi. 10 Chilaaka chakwaañula chichashikili, watemesheli nduñu kudi akwakudima kulonda amwinkihu nyikabu yamwitempa danyivinyu. Ilaña akwakudima amweteli nawa amufuntishilimu makasakasa. 11 Cheñi nawa watemesheli nduñu mukwawu. Iwu niyena amweteli nakumutiyisha nsonyi* nawa amufuntishilimu makasakasa. 12 Watemesheliku cheñi wamuchisatu; iwu niyena amukatishili nawa amuhañili. 13 Hamuloña wachumichi, mwini itempa danyivinyu wahosheli nindi, ‘Nukwila ñahi? Nukutemeshaku mwanami inakeña. Hadaha yena dinu akumulemesha.’ 14 Akwakudima chamumweniwu, ahosheli mulwawu nawu, ‘Iwu diyi nswana. Tumujahenu kulonda wuswana wiikali wetu.’ 15 Dichi amunatilili hanji yetempa danyivinyu nawa amujahili. Hanu dinu, chumanyi chakayilayi mwini itempa danyivinyu? 16 Wakenza nakuyijaha awa akwakudima nawa itempa danyivinyu wakadihana kudi acheñi.”
Chatiyiliwu chumichi, ahosheli nawu: “Ochu chinjila!” 17 Ilaña wayishinshikili nakuhosha nindi: “Indi awa mazu atalisha mudihi asonekawu nawu: ‘Ilola dadiwiliwu akwakutuña, dinekali dehi ilola damwiwombu dahewulu’?* 18 Muntu wejima wakaholokela hanidi ilola, wakakotoka. Nawa muntu wejima akaholokelawu kudi idi ilola, dikamuchika.”
19 Dichi hayoyenoyu mpinji, ansoneki niakulumpi jawatupristu akeñeleña nawu amukwati, ilaña atiyili woma wawantu, muloña elukili nawu wateneneña wena muchakutalilahu chashimwiniyi. 20 Chelili anamushinshiki dehi chikupu, atemesheli amayala enkeliwu mudimu mukuswamujoka hakwila adimwekeshi neyi hiyantu aloña kulonda amwinki muloña namazu akuhoshayi, kuhiñahu, amuhani kunfulumendi nikudi nguvulu. 21 Dichi amwihwili nawu: “Ntañishi, tweluka netu wahoshaña nikutañisha mwalala nawa hiwamwekeshaña chaambuku, ilaña watañishaña njila yaNzambi muchalala: 22 Komana nshimbi yeteja etu kuhana musonku kudi Kesari tahindi nehi?” 23 Ilaña welukili kafuta kawu nawa wayilejeli nindi: 24 “Tutalenu denari. Indi iwu mutu ninsona jidi aha, janyi?” Wena amwakwili nawu: “JaKesari.” 25 Yena wayilili nindi: “Yuma yaKesari, mwinkenu Kesari nawa yuma yaNzambi, mwinkenu Nzambi.” 26 Owu antu akañenyi kumwinka muloña kumesu awantu namazu ahosheliyi, ilaña ahayamini nañakwilu yindi nawa amweneni kwanzo-o.
27 Hela chochu, aSadusi amu ahoshaña nawu hikwekala kusañukaku, enjili nakumwihula nawu: 28 “Ntañishi, Mosi watusonekeleli nindi, ‘Neyi manakwamuntu yafwa nawa yashiya mumbanda chakadi kuvwalilamu mwana, manakwindi watela kumusumbula owu mumbanda nakumuvwalilamu manakwindi anyana.’ 29 Dichi kwadiña amayala 7 evumu dimu. Watachi wasumbwili mumbanda, ilaña owu iyala wafwili chakadi kuvwalilamu mwana. 30 Chuma chochimu chamwekeni nikudi wamuchiyedi 31 nawa wamuchisatu niyena wamusumbwili owu mumbanda. Dichichadiña kudi wejima wawu 7, afwili chakadi kuvwalilamu mwana. 32 Nkumininaku, owu mumbanda niyena wafwili. 33 Hanu dinu hakusañuka, hinyi wakekala mwini mumbanda? Muloña wejima wawu 7 amusumbwilihu.”
34 Yesu wayakwili nindi: “Anyana anshakaminu yamakonu* asumbulaña nikusumbuka, 35 ilaña antu afuukwilawu kuswana nshakaminu yanyaaka yinakwinza nikusañuka kufuma mudi afu, hiyakasumbulaña hela kusumbukaku. 36 Kafwampi, hiyakafwañaku, muloña akekala neyi chekalawu añelu nawa akekala anyana kaNzambi hakayisañulawu kufuma mudi afu. 37 Kutalisha hansañu yawafu akasañulawu, Mosi niyena wahoshelihu munsañu yahosha hachiputa, mwamuteneniyi Yehova nindi ‘Nzambi yaAbarahama, Nzambi yaIsaka nawa Nzambi yaYakoba.’ 38 Yena hiNzambi yawantu amomi, bayi afwaku, muloña kudi yena ejima wawu amomi.”* 39 Ansoneki amakwawu amwilili nawu: “Ntañishi, wunahoshi chiwahi nankashi.” 40 Muloña hiyatwesheli cheñi kwikala ahamuka nakumwihula lwihu hela lumuku.
41 Dichi niyena wayihwili nindi: “Hanu dinu, muloñadi chahoshelañawu nawu Kristu himwana kaDavidi? 42 Muloña Davidi yomweni wahosha mumukanda waMasamu nindi, ‘Yehova wamulejeli Mwanta wami nindi: “Shakamaku kuchikasa chami chachidiilu 43 sampu nabalumuni ayilumbu jeyi kwikala chitwamu hakudata nyendu yeyi.”’ 44 Dichi, neyi Davidi wamutenaña nindi Mwanta; hanu dinu, wekala ñahi mwanindi?”
45 Kuhiñahu, walejeli atumbanji twindi iku antu ejima anakutiyilila, nindi: 46 “Babalenu nawansoneki akeñaña kwendujola iku anavwali nyinkukumba nawa akeñaña nawu ayimusheña muyisankanu, mumasinagogi nimwena akeñaña kushakama hayitwamu yakumbidi* nimumaluña alema hakuda yakuda yamelela, 47 cheñi adaña maheta awambanda anfwila nawa alombaña lombe-e kulonda ayimoni kudi antu. Awa antu akayibabesha chikupu.”