Luka
16 Kuhiñahu, walejeli niatumbanji nindi: “Samaheta wumu wadiña nañamba yindi* ashimwiniwu nawu nakukisañana yuma yankaaka yindi. 2 Dichi iwu samaheta wamutambikili nakumuleja nindi, ‘Nsañu yinakutiya hadi eyi yayiwahi wanyi. Yaña wakasoneki chileji kulonda wulumbululi chiwazatishili mali ami, muloña hinukukwiteja wutwalekihu kuhemba itala damiku.’ 3 Hohenohu, owu ñamba wadihoshesheli nindi, ‘Chumanyi chinukwila chineli nkaaka yami nakunlekesha mudimu wawuñamba? Hinekala nañovu jakudimaku nawa natiyaña nsonyi yakulomba-lomba yuma. 4 Oo-o! Neluki chuma chinukwila, kulonda neyi nanlekeshi mudimu wawuñamba, antu akantambwili mumatala awu.’ 5 Watambikili antu ejima adiña nanyikudi yankaaka yindi, dichi walejeli muntu watachi nindi, ‘Wukweti mukudi wankaaka yami wushika hadihi?’ 6 Yena wamwakwili nindi, ‘Yesekelu yamanji amuolivi 100.’ Owu ñamba wamulejeli nindi, ‘Tambulaku mukanda weyi wachitiyañenu, nawa shakamaku hamaseki kulonda wusonekihu 50 swayi-swayi.’ 7 Kuhiñahu, walejeli muntu wamuchiyedi nindi, ‘Indi eyi, wukweti mukudi wushika hadihi?’ Yena wahosheli nindi, ‘Yesekelu yamaneni yatidiku 100.’ Owu ñamba wamulejeli nindi, ‘Tambulaku mukanda weyi wachitiyañenu, sonekakuhu 80.’ 8 Dichi, hela chakwila iwu ñamba hadiña waloñaku, nkaaka yindi wamuhamekeli muloña welili mwamaana;* muloña anyana anshakaminu yamakonu* akweti maana hakuzata nekiñu dawu kubadika chekala anyana achejeji.
9 “Inakuyileja cheñi nami: Kwatenu wubwambu namaheta amukanu kaayi kabula kuloña, kulonda neyi amana, akayitambwili mumaluña akushakamamu ahaya nyaaka. 10 Muntu wukushinshika muyuma yantesha, wukushinshika nimuyuma yayivulu, nawa muntu wukubula kwikala waloña muyuma yantesha, hakwikala waloña nimuyuma yayivuluku. 11 Dichi, neyi himunashinshiki namaheta amukanu kaayi kabula kuloñaku, hinyi wakayinka maheta alala? 12 Cheñi nawa, neyi himunashinshiki nayuma yawakwenuku, hinyi wakayinka yuma yenu? 13 Hikudi ñamba wunateli kukalakela anyanta ayediku, watela kuhelahu wumu nakukeñahu mukwawu, hela wukukakelahu wumu nakusekeshahu mukwawu. Himunateli kukalakela Nzambi hampinji yoyimu niMahetaku.”
14 AFwarisi aswejeli kukeñesha mali, adiña nakutiyilila kuyuma yejimiyi nawa atachikili kumusupisha. 15 Dichi yena wayilili nindi: “Enu iyenu mwadishimunaña kudi antu nenu mwaloña, ilaña Nzambi weluka nyichima yenu. Muloña chuma chamonañawu antu nawu chalema, kumesu aNzambi hiwuzondu.
16 “Nshimbi nimazu awaTuprofwetu ayishimwinini kushika nimpinji yaYowanu. Kufuma hohenohu, Wanta waNzambi anakuwushimuna nawu nsañu yayiwahi, nawa antu amuchidi wejima anakuhwila kuniwu Wanta. 17 Chalala, chaswayi iwulu niiseki kuhita kubadika kansona kamu kakehelamu kamuNshimbi kuhita chakadi kushikijewaku.
18 “Muntu wejima wukuseña ñodindi nakusumbula mukwawu, neli wujila, nimuntu wukusumbula owu mumbanda anaseñiwu kudi nfumwindi, neli wujila.
19 “Kwadiña iyala wumu samaheta wavwalileña mahina awusombu amawahi, nakudiluñisha hefuku-hefuku nachihandilu chawuhandu. 20 Dichi, hachiisu chindi aleteleñahu mukwakulomba-lomba yuma wumu wejina daLazaru wadiña nayilonda mujimba wejima 21 nawa wafwilileña kuda yakuda yaholokeleña kufuma hamesa yanowu iyala samaheta. Niatuwa enjileña nakulasha hayilonda yindi. 22 Chimwahitili mpinji, owu iyala mukwakulomba-lomba wafwili nawa amusendeli kudi añelu nakumutwala kukabadi* kaAbarahama.
“Samaheta niyena wafwili nawa amujiikili. 23 Dichi hampinji yadiñayi Mwijamu,* wafumbwili mesu indi iku nakukabakana nankashi, nawa wamweni Abarahama hahalehi wudi naLazaru kukabadi* kindi. 24 Kuhiñahu, wabidikili nindi, ‘Tata Abarahama, ntiyili luwi nawa temeshaku Lazaru yatumpiki insa yamunu windi mumenji kulonda yatutishi idimi dami, muloña nakabakani nankashi muwunu muzuzu wakesi.’ 25 Ilaña Abarahama wahosheli nindi, ‘Mwanami, anukaku neyi eyi watambwilileña chadimu yuma yayiwahi muchihandilu cheyi, ilaña Lazaru yena watambwilileña yuma yatama. Chayinu mpinji, yena nakukundejewa, ilaña eyi wunakukabakana. 26 Kubombela hayumiyi, hakachi kenu nanetu hadi ikela deneni nankashi kulonda antu anakukeña kufuma kunu nawu enzi kudi enu, akañanyi, hela antu anakukeña kufuma oku nawu enzi kudi etu, akañanyi.’ 27 Kuhiñahu, wahosheli nindi, ‘Tata, neyi chidi mwenomu, inakukulomba nami wumutemeshi yayi kwitala datata yami, 28 muloña nikweti amanakwami atanu, yayishimwini wunsahu chikupu kulonda niwena akabuli kwinza mudinu iluña damakabi.’ 29 Ilaña Abarahama wahosheli nindi, ‘Akweti nsañu yasonekeliyi Mosi niAtuprofwetu; yileki ayitiyilili.’ 30 Yena wahosheli nindi, ‘Inehi eyi tata Abarahama, muloña neyi muntu wunasañuki kufuma mudi afu yaya kudi wena, akubalumuka munyichima.’ 31 Ilaña yena wamulejeli nindi, ‘Neyi akaana kutiyilila kunsañu yasonekeliyi Mosi niAtuprofwetu, dikwila nawu nimuntu wunasañuki kufuma mudi afu, hiyakumutiyililaku.’”