Matewu

26 Yesu chamanishiliyi kuhosha yuma yejimiyi, wayilejeli atumbanji twindi nindi: 2 “Neyi chimuneluki, kunashali dehi mafuku ayedi hakwila nawu kwiikali Chipandakenu nawa Mwana kamuntu akumuhana kulonda amujahili hamutondu.”

3 Kuhiñahu, akulumpi jawatupristu niakulumpi jawantu apompeli mulubanza lwetala dakapristu muneni, ateneneñawu nawu Kayafwasi, 4 nawa amushakaminini Yesu hampuña kulonda amukwati* kuhitila mukumutwambila kulonda amujahi. 5 Ilaña, ahosheleña nawu: “Bayi tumukwatila hachawijaku, kuchiina hakenda kekala ipumba hakachi kawantu.”

6 Hampinji yadiñayi Yesu muBetani mwitala daShimona wadiña nambumba hatachi, 7 kudi yena, kwenjili mumbanda wasendeli ibotolu* mwadiña manji evumba dadiwahi nawa awuseya nankashi, dichi watachikili kumuhuñunwina Yesu manji kumutu iku nashakami nakuda.* 8 Atumbanji chamweniwu chumichi, azuwili nakuhosha nawu: “Muloñadi chinakukisañenayi manji? 9 Muloña awa manji adi kuyilandisha namali amavulu nakuyinka atuzweñi mali.” 10 Yesu chachitiyiliyi, wayilili nindi: “Munakumukabishiladi iwu mumbanda? Nanzatili mudimu wawuwahi. 11 Muloña enu mwekalaña nawatuzweñi mpinji yejima, ilaña ami hinakekalaña nenu mpinji yejimaku. 12 Chinanhuñunwiniyi awa manji evumba dadiwahi hamujimba wami, neli mwenimu kulonda yawahishili chadimu mujimba wami chakunjiika. 13 Inakuyileja chalala nami, kwejima kwakashimwinawu iyi nsañu yayiwahi mwahita kaayi kejima, nichuma chinakoñiyi iwu mumbanda akachihoshañahu hakumwanuka.”

14 Wumu hakachi kawapostolu 12, ateneneñawu nawu Yudasi Isakaroti, wayili kudi akulumpi jawatupristu 15 nawa wayihwili nindi: “Chumanyi chimukunyinka hakwila niyifukejeliyi kudi enu?” Wena amulejeli nawu tukukwinka mali asiliva 30. 16 Dichi kufuma tuhu hanoyu mpinji, watachikili kukeñakeña njila yayiwahi yakumufukejelamu.

17 Hefuku datachi daChawija chaMankendi Akadi Iluñi, atumbanji enjili kudi Yesu nakumwihula nawu: “Kudihi kuwunakukeña tukuloñesheli kulonda wudiiliku Chipandakenu?” 18 Wayilejeli nindi: “Yenu mumusumba, mukuwanamu muntu Wañaana-niñaana nawa mumuleji nenu, ‘Ntañishi nahoshi nindi: “Mpinji yakufwa kwami yinaswini dehi kwakwihi; nukudiila Chipandakenu nawatumbanji twami mwitala deyi.”’” 19 Dichi atumbanji elili mwayilejeliwu kudi Yesu nawa aloñesheli jaChipandakenu.

20 Chikwelili melela, washakamini kaheña kumesa hamu nawatumbanji twindi 12 nakuda. 21 Hampinji yadiileñawu, wahosheli nindi: “Inakuyileja chalala nami, wumu hakachi kenu wukunfukejela.” 22 Chatiyiliwu awa mazu, aneñeli nankashi, nawa wejima wawu atachikili kumwila nawu: “Mwanta, yami tahindi?” 23 Yena wayakwili nindi: “Yowu watantaña mucheña nanami diyi wukunfukejela. 24 Chalala, Mwana kamuntu nakuya nakufwa neyi chochasonekawu hadi yena, ilaña oyihuñu yikumonayi muntu wukumufukejela Mwana kamuntu! Chadi kuwaha neyi owu muntu havwalikiliku.” 25 Yudasi, wadiña kwakwihi nakumufukejela, waakwili nindi: “Rabi, yami tahindi?” Yesu wamwakwili nindi: “Mwomwenomu muwunahoshi.”

26 Chadiileñawu, Yesu wanoneli dinkendi nawa chamanishiliyi kulomba, wadihumwini nakuyinka atumbanji, nakuyila nindi: “Tambulenu, denu. Idi dinkendi dinakwimenaku mujimba wami.” 27 Kuhiñahu, wanoneli kaapu,* nawa chalombeliyi nakusakilila, wayinkeli nakuyila nindi: “Nwenumu wejima wenu, 28 muloña aka kaapu kanakwimenaku* ‘mashi ami achitiyañenu,’ akupweka kulonda antu amavulu ayanakeni nshidi jawu. 29 Ilaña inakuyileja nami: Hinamba kanwa cheñi vinyu yamuchidiwuku, sampu niifuku dinakanwa nenu vinyu yayiha muWanta waTata yami.” 30 Nkumininaku, chamanishiliwu kwimba tumina twakumuhameka* Nzambi, ayili kuMpidi yaMaolivi.

31 Kuhiñahu, Yesu wayilejeli nindi: “Wejima wenu wunu wufuku mukunshiya,* muloña chasonekewa nawu: ‘Nakatapa kabiña, nawa mukanka wanyikoku wakapalañana.’ 32 Dichi hanyima yakunsañula, nakayañahu dehi kuÑaliliya.” 33 Ilaña Petulu wamulejeli nindi: “Hela neyi ejima akukushiya muloña wachuma chikukumwekena, ami nukukushiya wanyi!”* 34 Yesu wamwilili nindi: “Inakukuleja chalala nami, wunu wufuku henohu ikombu kanda yeteli, wukunkaana mapampa kasatu.” 35 Petulu wamwilili nindi: “Hela tuhu kufwa hamu naneyi, ami nukukukaana wanyi.” Dichi niatumbanji amakwawu ejima niwena ahosheli mwomumu.

36 Kuhiñahu Yesu wayili hamu nawu kwiluña datenañawu nawu Ñesemani, nawa wayilejeli atumbanji nindi: “Shakamenu hanu, ami nayi kuna nakulomba.” 37 Dichi wasendelihu Petulu nianyana kaZebedewu awamayala ayedi nawa waneñeli nikutiya kumuchima kutama nankashi. 38 Kuhiñahu, wayilejeli nindi: “Naneñi nankashi chakwila inakukeña nikufwa. Shalenu hanu nawa tonenenuña hamu nanami.” 39 Chaswininiyi hambidi chanti, wadibukili chamesu heseki nakulomba nindi: “Tata yami, neyi chinatwesheki, itejaku aka kaapu kanhiti.* Ilaña, bayi neyi chinnakukeña amiku, chiña chiwunakukeña eyi.”

40 Chafuntiliyi kudi atumbanji twindi wayiwanini anakaami mutulu, nawa wamwilili Petulu nindi: “Kwila wutonena hamu nanami hadi ora yimu nehi? 41 Dichi tonaña nawa lombaña kulonda wubuli kwiñila mukweseka. Chalala spiritu yinakukeña,* ilaña mujimba wunazeyi.” 42 Wayili cheñi kamuchiyedi nakulomba nindi: “Tata yami, neyi hichikutwesheka aka kaapu kunhitaku,* chiña nikinwi hohu, dichi chuma chiwunakukeña eyi chizatiki.” 43 Wenjili cheñi nawa wayiwanini anakaami, muloña mesu awu alemeni natulu. 44 Dichi wayishiyili cheñi, wayili nakulomba kamuchisatu nakuhosha yuma yoyimu. 45 Wafuntili cheñi kudi atumbanji nakuyila nindi: “Munakukaama nikunooka hampinji yamuchidiwu! Talenu! Ora yakumufukejela Mwana kamuntu nakumuhana mumakasa awakwanshidi yinashiki dehi kwakwihi. 46 Nyamukenu, tuyenu. Talenu! Mukwakunfukejela nashiki dehi kwakwihi.” 47 Iku wuchidi kuhosha, kutala! Yudasi, wumu wahadi apostolu 12, hakwinza hamu nezaza deneni dawantu datemesheliwu kudi akulumpi jawatupristu niakulumpi jawantu, iku anasendi mpoku jatubali nitubama.

48 Mukwakumufukejela wadiña wayileja dehi owu antu chinjikijilu nindi: “Yowu mutu inukufufwa, diyi yowenowu; mumukasi.” 49 Dichi wayili kwadiñayi Yesu nakumwila nindi, “Kolaku, Rabi!” nawa wamufufwili. 50 Ilaña Yesu wamwihwili nindi: “Eyi mukwetu, wunenzi nakwiladi kunu?” Dichi owu antu enjili nakumukwata Yesu nawa amukasili. 51 Ilaña, wumu hakachi kanowu adiña naYesu, waholeli mpoku yindi yakabali nakutapa nduñu yakapristu muneni nakumuketula itu dindi. 52 Hohenohu Yesu wamwilili nindi: “Funtishaku mpoku yeyi yakabali muchindalu chayu, muloña antu ejima azatishaña mpoku yakabali akafwa kumpoku yakabali. 53 Indi kwiji wunakutoñojoka neyi nateli kukañanya kulomba kudi Tata yami katatakichi kulonda yantemesheli makombakaji amavulu awañelu?* 54 Ilaña neyi nila mwenimu, Nsona yahosha nawu iyi yuma yatela kumwekana, yikashikijewa ñahi?” 55 Hayoyenoyu ora Yesu walejeli mazaza awantu nindi: “Munenzi nampoku jatubali nitubama nakunkwata neyi kwiji munenzi nakukwata kapondu tahindi? Hefuku-hefuku, nashakamineña mutembeli nakutañisha, enu himwankasiliku. 56 Ilaña yuma yejimiyi yinamwekani kulonda yuma* yasonekeliwu atuprofwetu yishikijewi.” Hohenohu atumbanji ejima amushiyili nakumutemuka.

57 Owu antu amukwatili Yesu amutwalili kudi kapristu muneni Kayafwasi, kwenoku dikwapompeleliwu ansoneki nawakulumpi. 58 Ilaña Petulu wamulondeleleña hahalehi chanti kushika nimulubanza lwetala dakapristu muneni nawa cheñililiyi mukachi, washakamini hamu nawañamba amwitala kulonda yamoni yuma yikumwekana.

59 Hampinji yeniyi, akulumpi jawatupristu niakwaSanihedirini* ejima amukeñeleleña Yesu wunsahu wakutwamba kulonda amujahi. 60 Hela chakwila kwenjili ayinsahu akutwamba amavulu, ilaña hiyawaninihu wunsahu wakutwamba hela wumuku. Nkumininaku kwenjili antu ayedi 61 nakuhosha nawu: “Iwu iyala wahosheli nindi, ‘Ami nukutwesha kusanda tembeli yaNzambi nakuyituña cheñi mumafuku asatu.’” 62 Chatiyiliyi awa mazu, kapristu muneni wemeni nawa wamwihwili nindi: “Indi eyi wukuhoshahu neyidi? Wunatiyi wunsahu wunakushimunawu awa amayala hadi eyi tahindi?” 63 Ilaña Yesu wamweneni kwanzo-o. Dichi kapristu muneni wamwilili nindi: “Inakukusanyikisha mudi Nzambi wamumi wutuleji neyi yeyi Kristu, Mwana kaNzambi!” 64 Yesu wamwilili nindi: “Mwomwenomu muwunahoshi. Ilaña inakuyileja nami: Kufuma dalelu mwakamona Mwana kamuntu nashakami kuchikasa chachidiilu chañovu nawa nakwinza hamavu amwiwulu.” 65 Dichi kapristu muneni watabwili yakuvwala yindi yahewulu, nakuhosha nindi: “Nahoshi mazu akasawuntu! Wunsahu wamuchidinyi cheñi wutukukeña? Tiyenu! Munatiyi kasawuntu kanahoshiyi. 66 Munatoñojokihu nenudi?” Antu amwakwili nawu: “Watela kufwa.” 67 Dichi amufwijilili mazeñi kumesu nikumweta jinkonyi. Amakwawu amweteli jimbañala kumesu, 68 nakumwila nawu: “Eyi Kristu, profwetaku. Hinyi wunakweti?”

69 Petulu washakamini hanji mulubanza nawa kudi yena kwenjili ñamba wamumbanda wakansi nakumwila nindi: “Nineyi nawa wadiña hamu naYesu wakuÑaliliya!” 70 Ilaña yena wakaanini hamesu awantu ejima, nakuhosha nindi: “Nsañu yiwunakuhosha, ami kwami nayiluki wanyi.” 71 Chayiliyi kukaditala kahachiisu, amumweni kudi kansi wamumbanda mukwawu nawa walejeli antu adiñahu nindi: “Iwu iyala wadiña hamu naYesu wakuNazareta.” 72 Cheñi wadikalili chikupu nakusanyika nindi: “Ami kwami iwu muntu hinamwilukaku!” 73 Chihahitili kapinji kanti, antu emeni kwakwihi enjili kudi Petulu nakumwila nawu: “Kuhosha hohu chalala, nineyi wudi hakachi kawatumbanji twindi, muloña nhoshelu yeyi diyinakusololi.”* 74 Kufumahu watachikili kudishiña nikusanyika nindi: “Ami kwami iwu muntu hinamwilukaku!” Hohenohu ikombu yetela nikwitela. 75 Dichi Petulu wanukili mazu ahosheliyi Yesu nindi: “Henohu ikombu kanda yeteli, wukunkaana mapampa kasatu.” Wayili hanji nawa wadilili nankashi.