Luka

7 Chamanishiliyi kuhosha mazu alejeleñayi antu, weñilili muKaperinamu. 2 Dichi, nduñu wamukulumpi wamashidika akeñeliyi nankashi, wakatili chikupu chakwila wakeñeleña nikufwa. 3 Chatiyiliyi mpuhu yaYesu, watemesheli akulumpi jawaYudeya amu nakumutambika kulonda yenzi nakumuukila nduñu yindi. 4 Dichi enjili kudi Yesu nawa atachikili kumulembelela chikupu nawu: “Iwu muntu nateleli eyi kumwilila chumichi, 5 muloña wakeña muza wetu nawa diyi watuñili nisinagogi yetu.” 6 Hohenohu, Yesu wayili hamu nawu. Ilaña chashikiliyi kwakwihi netala, mukulumpi wamashidika wadiña watemesha dehi amabwambu jindi nakumuleja Yesu nawu: “Mukulumpi, bayi wudikabishaku, muloña ami hinnateleli kukutambwila eyi mwitala damiku. 7 Ichi dichaletesha nibuli kwinza kudi eyi. Ilaña, kuminaku dakuhosha izu nawa ñamba yami wukukola. 8 Muloña ninami nidi nawantu akweti wuswa hadi ami, ilaña ninami nikweti mashidika inatalaña, nalejaña iwu nami, ‘Yaña!’ hakuya, mukwawu nami, ‘Twaya!’ hakwinza nawa nduñu yami nami, ‘Ilaku ichi!’ hakuchiila.” 9 Yesu chatiyiliyi yumiyi, wamuhayamini nankashi, washetumukili nakutala izaza dawantu damulondeleleña, nakuhosha nindi: “Inakuyileja nami, kanda niwaneñahu dehi muntu wudi nachikuhwelelu cheneni muIsarela neyi ichiku.” 10 Dichi, antu atemesheliwu chafuntiliwu kwitala, awanini owu ñamba nakoli dehi.

11 Hashimbwili wanyi, wayili kumusumba atenañawu nawu Nena, hamu nawatumbanji twindi niizaza deneni dawantu. 12 Chashikiliyi kwakwihi nachiisu chamusumba, nindi yatali, antu anasendi mufu, wadiña mwana weyala wumu hohu* kudi mama yindi. Nawa, mama yindi wadiña hinfwila. Cheñi, izaza deneni dawantu dafumini mumusumba dadiña hamu naniwu mumbanda. 13 Mwanta chamumweniyi iwu mumbanda, wamutiyilili wushona nakumwila nindi: “Lekaku kudila.” 14 Hamuloña wachumichi, waswinini kwakwihi nakukwata kumutembu* nawa antu atembekeli emeni kuka-a. Kuhiñahu, wahosheli nindi: “Eyi mwana weyala, inakukuleja nami, hindukaku!” 15 Dichi owu iyala wafwili wahindukili nakutachika kuhosha nawa Yesu wamuhanini kudi mama yindi. 16 Hohenohu wejima wawu atiyili woma, atachikili kumulemesha Nzambi, nakuhosha nawu: “Kaprofwetu muneni namwekani mukachi ketu” nawa “Nzambi naanuki antu jindi.” 17 Mpuhu yindi yatiyakeni mwahita Yudeya mwejima nimumaluña amukamwihi mwejima.

18 Dichi, atumbanji twaYowanu amulejeli Yowanu yuma yejimiyi. 19 Yowanu niyena watambikili atumbanji twindi ayedi nakuyitemesha kudi Mwanta nakumwihula nawu: “Komana Yeyi itwatalilaña nawu wunakwinza tahindi kudi wacheñi?” 20 Owu amayala chenjiliwu kudi yena, ahosheli nawu: “Yowanu Mupapatishi natutemeshi kudi eyi kulonda tukwihuli netu, ‘Komana Yeyi itwatalilaña nawu wunakwinza tahindi kudi wacheñi?’” 21 Hayoyenoyu mpinji, wokili yikatu ninyisoñu yasweja yadiña nawantu amavulu nikufumisha andemoni nawa watonesheli amputamesu amavulu. 22 Yena wayakwili nindi: “Funtenu kudi Yowanu mwakamuleji yuma yimunamoni nikutiya nenu: Amputamesu anakumona, akwakubalakata anakwenda, akwambumba anakuyitookesha, ajika matu anakutiya, afu anakuyisañula nawa atuzweñi anakuyishimwina nsañu yayiwahi. 23 Wudi namuzañalu yowu muntu wabulaña kuwana chuma chakumuhukesha mudi ami.”

24 Chelili antemesha jaYowanu anayi dehi, Yesu watachikili kuleja mazaza awantu hansañu yaYowanu nindi: “Chumanyi chimwayili nakutala mumasaña? Iteti dalelukileña nampepela tahindi? 25 Chumanyi dinu chimwayili nakutala? Muntu wavwalili yakuvwala yayiwahi tahindi? Muloña antu avwalaña yakuvwala yayiwahi nikuhanda chachiwahi ekalaña mumatala awanyanta. 26 Hanu dinu, mwayili nakutaladi? Nakutala kaprofwetu tahindi? Inakuyileja nami, Yowanu hikaprofwetu, ilaña yena walema kubadika nikaprofwetu. 27 Iwu diyi ona asonekawu hadi yena nawu: ‘Tiyaña! Ami nukutemeshañahu dehi ntemesha yami kuwunakuya,* wakakuloñeshelañahu dehi njila yeyi.’ 28 Inakuyileja chalala nami, hadi antu avwalika kudi ambanda, kanda kwikaleñahu dehi muntu wamubadika Yowanuku, ilaña muntu wakehelamu muWanta waNzambi wamubadika yena.” 29 (Dichi antu ejima niakwakutambula nyisonku chatiyiliwu chumichi, ahosheli nawu Nzambi waloña, muloña ayipapatishili nachipapatishu chaYowanu. 30 Ilaña aFwarisi niantu elukili Nshimbi chikupu akaanini kulondela mwayilejeliyi Nzambi, muloña wena hiyayipapatishili nachipapatishu chindiku.)

31 “Indi awa antu adi munidi ikiñu nukuyesekeja kudanyi nawa afwananyi? 32 Adi neyi anyana anyanya anashakami hayisankanu anakubidika akwawu nawu: ‘Twayimbila mapeleli, ilaña enu mwahañana wanyi; twakaloka nyitetu, ilaña enu mwadila wanyi.’ 33 Chochimu, Yowanu Mupapatishi chinenziyi, hanakuda mankendi hela kunwa vinyuku, ilaña enu munakuhosha nenu: ‘Wudi nandemoni.’ 34 Mwana kamuntu chinenziyi, nakuda nikunwa, ilaña enu munakuhosha nenu: ‘Talenu! Muntu wafwa hakuda nawa wanwaña vinyu, ibwambu dawakwakutambula nyisonku niakwanshidi!’ 35 Hela chochu, yuma yaloña yelañayi muntu, diyamwekeshaña* nawu wukweti maana.”

36 Ilaña kaFwarisi wumu watwalekelihu nakumwila nindi yadiili hamu nindi yakuda. Dichi weñilili mwitala danowu kaFwarisi nawa washakamini kumesa nakuda. 37 Hohenohu, mumbanda welukiliwu mumusumba nawu himukwanshidi chelukiliyi nindi Yesu wudi mwitala dakaFwarisi nakuda,* waleteli ibotolu* mwadiña manji evumba dadiwahi. 38 Chafukaminiyi kunyendu yindi, wadilili nawa watachikili kuzowesha nyendu yaYesu namadilu nawa wayikombweleli nansuki jakumutu windi. Cheñi, wamufufwili kunyendu nakumuhuñunwina manji evumba dadiwahi kunyendu. 39 KaFwarisi wamutambikili Yesu chamweniyi chumichi, wadihoshesheli nindi: “Neyi iwu iyala wadiña kaprofwetu, kachi neluki chidi iwu mumbanda wunakumukwata nindi himukwanshidi.” 40 Ilaña Yesu wamulejeli nindi: “Shimona, kudi chuma chinnakukeña kukuleja.” Yena wamwilili nindi: “Ntañishi, nleji!”

41 “Kwadiña amayala ayedi akongweli* mali kudi mukwakukongwesha;* wumu wakongweli* madenari 500, mukwawu niyena 50. 42 Chakañenyiwu chuma chakumufuntishila, wayanakeneni wejima wawu ayedi. Hela chochu, hadi awa ayedi, wumu yodihi wukumukeña nankashi?” 43 Shimona wamwakwili nindi: “Natoñojoki nami ona anakeneniyi mukudi weneni.” Yesu wamulejeli nindi: “Wunahoshi mwalala.” 44 Dichi washetumukili nakutala owu mumbanda nawa wamwilili Shimona nindi: “Wunamumoni iwu mumbanda? Neñila mwitala deyi; eyi hiwanyinka menji akuwela kunyendu yamiku. Ilaña iwu mumbanda wazowesha nyendu yami namadilu indi nikuyikombwela nansuki jindi. 45 Eyi hiwanfufwaku, ilaña iwu mumbanda kufuma tuhu hampinji yineñila munu, haleka kufufwa kunyendu yamiku. 46 Cheñi nawa, eyi hiwanhuñunwina manji kumutu wamiku, ilaña iwu mumbanda wanhuñunwina manji evumba dadiwahi kunyendu yami. 47 Hamuloña wachumichi, inakukuleja nami, nshidi jindi hela jajivulu* ñahi, anajanakeni, muloña kukeña kwindi kwasweja. Ilaña muntu ananakeniwu chantesha, nikukeña kwindi kwantesha.” 48 Kuhiñahu, wamulejeli iwu mumbanda nindi: “Nshidi jeyi anakwanakeniju.” 49 Antu adiileñayi nawu hamu kumesa atachikili kudileja mulwawu nawu: “Indi iwu muntu hinyi wunakwanakena ninshidi?” 50 Hela chochu, wamulejeli iwu mumbanda nindi: “Chikuhwelelu cheyi chinakwamwini; yaña mukuwunda.”