Luka
12 Hanoyu mpinji, chelili izaza dawantu damakombakaji amavulu dinapompi hamu chakwila adidatolileña wumu namukwawu, Yesu wasambilili kuleja atumbanji twindi nindi: “Babalenu neluñi dawaFwarisi, dikwila nawu wunfwikiji. 2 Muloña kwosi chuma chaswekawu chikupu chikabula kusololawuku, nawa kwosi chuma chajindawu chikabula kwilukawuku. 3 Dichi, yuma yejima yimukuhoshela mumwidima, akayitiyila muchejeji, niyuma yimukushawutila mutupeka kwakankawenu, akayishimwina hewulu damatala. 4 Inakuyileja cheñi enu amabwambu jami nami, bayi mutiya woma antu anateli kuyijahaku, muloña neyi anayijahi dehi, kwosi chuma chikwawu chelañawuku. 5 Ilaña, inakuyileja muntu imwatela kutiya woma: Tiyenu woma Owu welaña neyi najahi dehi muntu, wukweti wuswa wakumunatila muGehena.* Eña, inakuyileja nami, Iwu diyi imwatela kutiya woma. 6 Komana anzwimba* atanu hiyayilandishaña natumawayawaya tuyedi twabula kulema wuseyaku?* Hela chochu, kwosi nzwimba niwumu avulamenañawu* kudi Nzambiku. 7 Ninsuki jenu jakumutu jejima ajichinda dehi. Dichi, bayi mutiya womaku; muloña enu mwalema kubadika anzwimba amavulu.
8 “Inakuyileja nami, muntu wejima wañitejaña kumesu awantu, Mwana kamuntu niyena wakamwiteja kumesu awañelu jaNzambi. 9 Ilaña muntu wejima wankaanaña kumesu awantu, niyena akamukaana kumesu awañelu jaNzambi. 10 Nawa muntu wejima wasawulaña Mwana kamuntu, akamwanakena, ilaña muntu wejima wasawulaña spiritu yajila, akamwanakena wanyi. 11 Neyi ayitwala hanapompi antu amavulu,* hadi akwanfulumendi nihadi akwawuswa, bayi mwakakama nakutoñojoka chimwatela kuhosha hela yuma yimwakahosha hakudamwinaku, 12 muloña hanoyu mpinji, spiritu yajila yakayileja yuma yimwakahosha.”
13 Hohenohu, muntu wumu wadiña hanodu izaza wamulejeli nindi: “Ntañishi, muleji manakwami yañanzañenihu wuswana wetu hakachi.” 14 Yena wamulejeli nindi: “Eyi iyala, hinyi wantondeli kwikala nsompeshi hela mukwakuyanzañena enu ayedi?” 15 Cheñi wayilejeli nindi: “Tonenuña nawa tondolwelenuña lwisu lwejima,* muloña hela chakwila muntu wukweti yuma yayivulu nankashi, wumi windi hiwashindamena hayuma yahetayiku.” 16 Hamuloña wachumichi, wayilejeli chakutalilahu nindi: “Mwiha dasamaheta wumu mwedikili yakuda yayivulu nankashi. 17 Dichi, watachikili kudihoshesha nindi, ‘Nukwila ñahi chineli hinikweti hakusha yakuda yamiku?’ 18 Kuhiñahu, wahosheli nindi, ‘Nukwila ñaana: Nukusanda nkalaña jami jejima kulonda nituñi jamaneni, mwenomu dimu munukusha yakuda yami niyuma yami yejima, 19 nawa nukudileja ami awenami* nami: “Wunalumbiki yuma yayiwahi yayivulu nankashi yakuzatisha hadi yaaka yayivulu; ichi dinu dinookeleña kweyi, daña, nwaña nawa diluñisheña eyi aweni.”’ 20 Ilaña Nzambi wamulejeli nindi, ‘Eyi muntu wabula maana, wunu wufuku akukutambula wumi weyi. Hanu dinu, hinyi wukushala nayuma yeyi yiwunalumbiki?’ 21 Dichi chichekala nikudi muntu wadilumbikilaña maheta ilaña wabula kwikala waheta kudi Nzambi.”
22 Kuhiñahu, wayilejeli atumbanji twindi nindi: “Dichi chinayilejelaña nami, lekenu kwakama hawumi wenu hayuma yimukuda, hela kwakama hanyijimba yenu hayuma yimukuvwala. 23 Muloña wumi walema kubadika yakuda nawa mujimba walema kubadika yakuvwala. 24 Toñojokenu hadi makololu: Hiyakuwaña mbutu hela kumunaku; hiyakweti nkalaña hela itala mwakuhembelaku; ilaña Nzambi wayidiishaña. Komana enu himwayibadika atuda kulemaku? 25 Hinyi hakachi kenu hamuloña wakwakama wunateli kunuñaku kyubiti yimu kuwumi windi hela chantesha? 26 Dichi, neyi himukutwesha kwila ichi chuma chanyanyaku, muloñadi chimukwakamina hayuma yikwawu yinashaliku? 27 Toñojokenu hankenu chiyakulaña: hiyakabakanaña hela kuchima yakuvwalaku; ilaña inakuyileja nami hela tuhu Solomoni muchiyuulu chindi chejima, havwalilihu yakuvwala yidi neyi iyi nkenu hela yimuku. 28 Neyi Nzambi wavwikaña yuma yamenaña mwisaña muniyi njila, yelaña lelu yidikwoku, kumadiki ayinatila mukesi, komana wukukañanya kuyivwika enu chakubadikahu, enu mukweti chikuhwelelu chantesha? 29 Dichi lekenu kwakama hayuma yimukuda nihayuma yimukunwa, nawa lekenu kusweja kwakama; 30 muloña yuma yejimiyi diyi yafwilañawu chikupu antu akwituña, ilaña Tata yenu weluka nindi mwakeñaña yumiyi. 31 Dichi, twalekenuhu kukeña Wanta windi, nawa yumiyi akayishilahu.
32 “Enu mukanka wanyikoku wanyanya, bayi mutiya womaku, muloña Tata yenu nayitoñweli kuyinka Wanta. 33 Landishenu yuma yenu yimukweti nakuhana yawaana yaluwi.* Tuñenu yikwama yamali yabulaña kukisika, dodu iheta dabulaña kumana mwiwulu, mwabulañayi ikombi kuswina kwakwihi nitububu twakisañanaña. 34 Muloña kudi maheta enu, dikukwikala ninyichima yenu nawa.
35 “Vwalenu nikudiloñeshela chadimu* nawa manoñu enu abutukeña, 36 nawa mwatela kwikala neyi antu anakutalila nkaaka yawu wunakufunta kufuma kuchawija chawulu, kulonda neyi yenza nakudondomwena, hohenohu wejima wawu akushikena dakumwenzunwinaku. 37 Adi namuzañalu wowu anduñu akawanawu anakutona hampinji yakenzayi nkaaka yawu! Inakuyileja chalala nami, wakavwala yakuvwala* yakuzatilamu nakuyishakamisha kumesa nawa wakenza nakuyiloñeshela yakuda. 38 Neyi yenza hachilu chamuchiyedi* hela chamuchisatu,* nawa yayiwana anadiloñesheli chadimu, owu anduñu adi namuzañalu! 39 Hela chochu, ilukenu chumichi, neyi mwini itala welukili mpinji yenjileñayi ikombi, mutenowu hadi kumwiteja ikombi kulokola nakwiñila mwitala dindiku. 40 Ninenu nawa, diloñeshelenu chadimu, muloña Mwana kamuntu wakenza hampinji yimwakabula kumukuhwelela nenu nakwinza.”
41 Kuhiñahu, Petulu wamwilili nindi: “Mwanta, ichi chakutalilahu wunakuleja etu hohu tahindi antu ejima?” 42 Mwanta niyena wahosheli nindi: “Indi ñamba washinshika,* wamaana, akatondawu kudi nkaaka yindi kumuhembela ambuña amwitala dindi nakutwalekahu kuyinka yakuda yawu yashikila hampinji yatelela hinyi? 43 Owu nduñu wudi namuzañalu neyi hakenzayi nkaaka yindi yakamuwani nakwila mwenimu! 44 Inakuyileja chalala nami, wakamutonda kwikala kalama wayuma yindi yejima. 45 Ilaña neyi owu nduñu wakadihoshesha mumuchima windi nindi, ‘Nkaaka yami nashimbuli kwinza,’ nawa yatachika nikweta ambuña ankaaka yindi awamayala niawambanda nikutachika kuda nikunwa nakusheta, 46 nkaaka yanowu nduñu wakenza hefuku dakabula kumukuhwelelayi nindi nakwinza nihaora yakabula kwilukayi, nawa wakamubabesha nankashi nakumusha hamu nawantu abula kushinshika. 47 Dichi owu nduñu welukili nkeñelu yankaaka yindi ilaña wabulili kudiloñeshela chadimu hela kwila chuma chamulejeliwu,* akamuvupola yikoti yayivulu. 48 Hakwila nduñu wabulili kwiluka nawa wakoñeli yuma yateleleli kumuvupolilahu yikoti, akamuvupola yikoti yantesha. Eñañi, muntu wejima enkeliwu jajivulu, kudi yena nawa akakeñelaku jajivulu, nimuntu wejima enkeliwu kuhemba yuma yayivulu, kudi yena nawa akakeñelaku jajivulu nankashi.
49 “Nenjili nakubutula kesi hamaseki, chineli akibutula dehi, chumanyi chikwawu chinukukeña? 50 Eñañi, nikweti chipapatishu chatela kumpapatishawu nachu, nawa chinakunneñesha nankashi sampu chinahiti dehi! 51 Komana munakutoñojoka nenu nenjili nakuleta kuwunda hamaseki tahindi? Inehi, ilaña inakuyileja nami, nenjili nakuleta chaambu. 52 Muloña kufuma dalelu, mwitala dimu mukwikala antu atanu akudaambula, antu asatu hiyakutiyañanaña nawantu ayediku, nawa antu ayedi hiyakutiyañanaña nawantu asatuku. 53 Tata yawantu hakutiyañanaña namwanindi weyalaku, mwana weyala hakutiyañanaña natata yindiku, mama yawantu hakutiyañanaña namwanindi wamumbandaku, mwana wamumbanda hakutiyañanaña namama yindiku, muku wamumbanda hakutiyañanaña namumbanda wesumbuku, mumbanda wesumbu hakutiyañanaña namuku wamumbandaku.”
54 Kuhiñahu, walejeli mazaza awantu nindi: “Neyi mumona ivu dinakusela kufuma kumujika, hohenohu mwahoshaña nenu, ‘Nvula yeneni yampepela keña yinoki,’ nawa chekalaña mwomwenomu. 55 Cheñi neyi mumona mpepela yinakufumina kukabeta kakuchidiilu, mwahoshaña nenu, ‘Kukwikala nkanza yasweja,’ nawa chekalaña mwomwenomu. 56 Enu anfwikiji, mweluka chakulumbulula chamwekanaña iseki niiwulu, hanu dinu, muloñadi chimwabulila kwiluka munakutalisha yuma yinakumwekana makonu? 57 Muloñadi chimwabulilaña kwiluka enu aweni yuma yaloña? 58 Chakutalilahu, neyi wunakuya kudi nyuuli namukwenu wunakuholokeli kuchota chanyiloña, hampinji yinakukutwalayi, fwilaku kumanisha kukala nanowu mukwenu kulonda yabuli kukuhana kudi nsompeshi, nsompeshi niyena yabuli kukuhana kudi kapasu, kulonda kapasu niyena yabuli kukusha mukaleya. 59 Inakukuleja nami, wakafumamu wanyi sampu wunafweti mali ejima.”*