Matewu

25 “Wanta wamwiwulu anateli kuwesekeja nawambanda ajiki* 10 asendeli manoñu awu kulonda ayi nakukinkilila kalemba. 2 Hakachi kanowu ambanda, atanu adiña abula maana, atanu adiña namaana. 3 Owu abula maana asendeli manoñu awu ilaña hiyasendelihu manji amakwawuku, 4 ilaña owu adiña namaana asendeli manji amakwawu munyilondu hamu nimanoñu awu. 5 Chelili kalemba walabili kwinza, atachikili kunoñoka nawa akaamini. 6 Hakachi kawufuku, atiyili antu abidikileña nawu: ‘Kalemba nashiki! Yenu mukamukinkilili!’ 7 Dichi owu ambanda ajiki* ejima ahindukili kulonda ashi manji mumanoñu awu. 8 Owu abula maana alombeli manji kudi adiña namaana nawu, ‘Twinkenuhu manji, muloña manoñu etu keña ajimi.’ 9 Owu ambanda ajiki adiña namaana ayakwili nawu: ‘Hadaha hitukuwanina wejima wetuku. Dichi yenu kudi antu alandishaña manji kulonda mulandi enu.’ 10 Chayileñawu nakulanda manji, kalemba wenjili. Owu ambanda ajiki* adiloñesheli eñilili nindi mwitala mwadiña chawija nawa chenzelu achenzeli. 11 Chimwahitili mpinji, owu ambanda ajiki* abula maana niwena enjili, nakubidika nawu, ‘Kalemba, Kalemba, twenzunwiniku!’ 12 Yena wayakwili nindi, ‘Kuyileja hohu chalala, nayiluki wanyi.’

13 “Dichi tonenuña, muloña himuneluki ifuku hela mpinjiku.

14 “Iwu Wanta wudi neyi muntu wakeñeleña kuya kwituña dacheñi, watambikili anduñu jindi nakuyishila maheta indi. 15 Wumu wamwinkeli ntalenta* jitanu, mukwawu jiyedi, mukwawu nawa yimu, wenkeli nduñu wejima kwesekeja nahakumina ñovu jindi nawa wayili kwituña dacheñi. 16 Hohenohu, nduñu watambwili ntalenta jitanu wayili nakujizatisha nawa wawanininihu jikwawu jitanu. 17 Nduñu watambwili ntalenta jiyedi niyena wawanininihu jikwawu jiyedi. 18 Ilaña owu nduñu watambwili ntalenta yimu wayili nakupunda heseki nawa waswekelihu mali* ankaaka yindi.

19 “Chimwahitili mafuku amavulu, nkaaka yanowu anduñu wenjili kulonda yatali chinazatishiwu mali indi. 20 Dichi nduñu watambwili ntalenta jitanu wenjili nawa waletelelihu ntalenta jikwawu jitanu, nakuhosha nindi, ‘Nkaaka, wanshilili ntalenta jitanu; talaña, nawaninihu cheñi jikwawu jitanu.’ 21 Nkaaka yindi wamwilili nindi: ‘Wuzataña, eyi nduñu wamuwahi nawa washinshika! Wunashinshiki muyuma yantesha. Dichi inakukutonda wiikali kalama wayuma yayivulu. Zañalelaku hamu nankaaka yeyi.’ 22 Kuhiñahu owu nduñu watambwili ntalenta jiyedi wenjili nawa wahosheli nindi, ‘Nkaaka, wanshilili ntalenta jiyedi; talaña, nawaninihu cheñi jikwawu jiyedi.’ 23 Nkaaka yindi wamwilili nindi: ‘Wuzataña, eyi nduñu wamuwahi nawa washinshika! Wunashinshiki muyuma yantesha. Dichi inakukutonda wiikali kalama wayuma yayivulu. Zañalelaku hamu nankaaka yeyi.’

24 “Nkumininaku, nduñu watambwili ntalenta yimu wenjili nawa wahosheli nindi: ‘Nkaaka, nakwilukili nami wudi muntu wakala nawa wamunaña hiwabulili kukuwa nawa wakuñulaña hiwabulili kupepela. 25 Dichi natiyili woma nawa nayili nakusweka ntalenta yeyi mumaseki. Tambulaku ntalenta yeyi iyi.’ 26 Nkaaka yindi wamwilili nindi: ‘Eyi nduñu watama nawa wakatala, komana welukili neyi ami namunaña hinabulili kukuwa nawa nakuñulaña hinabulili kupepela? 27 Komana dinu wadi kusha mali* ami mubanki* kulonda chinadi kwinza, nadi kutambwilahu mali amakwawu.

28 “‘Dichi mutambulenu ntalenta yikwetiyi kulonda mwinki ona wukweti ntalenta 10. 29 Muloña muntu wejima wukweti, akamwinkelahu jikwawu nawa wukekala najajivulu. Ilaña muntu wunabuli, nichikwetiyi akamutambulachu. 30 Owu nduñu wamukunkulwayi munatilenu hanji mumwidima. Mwenomu dimu mukudililañayi nikudisumona kumazewu.’

31 “Mwana kamuntu chakenzayi mukulema kwindi hamu nawañelu ejima, wakashakama hetanda dindi dakulema. 32 Akwanyuza yejima akayipompesha kumesu indi nawa yena wakaambula antu neyi chaambulañayi kabiña anyikoku hadi ampembi. 33 Dichi anyikoku wakayisha kuchikasa chindi chachidiilu, hakwila ampembi wakayisha kuchikasa chindi chachimunswa.

34 “Kuhiñahu, Mwanta wakaleja antu akekala kuchikasa chindi chachidiilu nindi: ‘Twayenu, enu anakiswiliwu kudi Tata yami wekala mwiwulu, swanenu Wanta wayiloñeshelawu kufuma haaliliwu chikuku chakaayi.* 35 Muloña chinafwili nzala, enu mwanyinkeli yakuda; chinatiyili mpwila, enu mwanyinkeli menji. Nadiña mwenyi, enu mwantambwilili chiwahi; 36 hinadiña nawuvu,* enu mwanvwikili. Chinakatili, enu mwanhembeli. Hinadiña mukaleya, enu mwenjili nakunhempula.’ 37 Dichi antu aloña akamwihula nawu: ‘Mwanta, mpinjinyi yiwafwili nzala, etu tukwinka yakuda, hela yiwatiyili mpwila, etu tukwinka menji? 38 Mpinjinyi yiwadiña mwenyi, etu tukutambwila chiwahi, hela yiwadiña nawuvu, etu tukuvwika? 39 Mpinjinyi yitwakumweni wakata hela wudi mukaleya, etu tukuhempula?’ 40 Mwanta wakayakula nindi, ‘Inakuyileja chalala nami, yuma yejima yimwakoñeleli wumu hakachi kanawa anakwami akehelamu, dikwila nawu mwankoñeleli ami.’

41 “Kuhiñahu wakaleja owu antu akekala kuchikasa chindi chachimunswa nindi: ‘Fumenu aha, enu anashiñiwu, yenu mukesi kahaya nyaaka* kanaloñesheliwu Diyabolu niañelu jindi. 42 Muloña chinafwili nzala, enu himwanyinkeli yakudaku; nawa chinatiyili mpwila, enu himwanyinkeli menjiku. 43 Chinadiña mwenyi, enu himwantambwililiku; chinadiña nawuvu, enu himwanvwikiliku; chinakatili nichinadiña mukaleya, enu himwahembeliku.’ 44 Dichi niwena nawa akamwihula nawu: ‘Mwanta, mpinjinyi yiwafwili nzala, hela yiwatiyili mpwila, hela yiwadiña mwenyi, hela yiwadiña nawuvu, hela yiwakatili, hela yiwadiña mukaleya etu kukukalakela nehi?’ 45 Dichi yena wakayakula nindi, ‘Inakuyileja chalala nami, yuma yejima yimwabulili kukoñela wumu hakachi kanawa akehelamu, dikwila nawu himwankoñeleli amiku.’ 46 Awa akayijilumuna* haya nyaaka, ilaña owu antu aloña akekala nawumi wahaya nyaaka.”