Luka

22 Dichi Chawija chaMankendi Akadi Iluñi chateneneñawu nawu Chipandakenu, chaswinineña kwakwihi. 2 Nawa akulumpi jawatupristu niansoneki akeñeleña njila yayiwahi yakumukwatilamu Yesu, muloña atiyileña woma wawantu. 3 Dichi Satana weñilili mudi Yudasi, ateneneñawu nawu Isakaroti, owu wadiña hakachi kawapostolu 12, 4 nawa wayili nakuhosha nawakulumpi jawatupristu niatupitawu amutembeli chatela kumufukejelayi kudi wena. 5 Atiyili kuwaha nankashi hachumichi nawa atiyañeni kumwinka mali asiliva. 6 Dichi, wetejeli nawa watachikili kukeñakeña njila yayiwahi yakumufukejelamu kudi wena chakadi izaza dawantu kwikalahu.

7 Ifuku datachi daChawija chaMankendi Akadi Iluñi, hateleleliwu kulambula mulambu waChipandakenu, dashikili; 8 dichi Yesu watemesheli Petulu niYowanu, nakuyileja nindi: “Yenu mwakaloñeshi Chipandakenu kulonda tudi.” 9 Wena amwihwili nawu: “Kudihi kuwunakukeña tuloñesheliku Chipandakenu?” 10 Yena wayilejeli nindi: “Tiyenu! Chimukwiñila mumusumba, mukudibulakana neyala wunasendi nsaba yamenji. Mumulondeli ndo-o nimwitala mukwiñilayi. 11 Mumuleji mwini itala nenu, ‘Ntañishi nahoshi kudi eyi nindi: “Indi kapeka mwakukaama enyi munukudiila Chipandakenu nawatumbanji twami kadi kudihi?”’ 12 Nawa owu muntu wukuyileja kapeka keneni kadi hewulu, kanawahishiwu. Muloñesheli Chipandakenu mwenomu.” 13 Dichi ayili nawa awanini yuma yejima neyi chochayilejeliyi nawa aloñesheli jaChipandakenu.

14 Mpinji chiyashikili, washakamini kaheña kumesa hamu nawapostolu indi. 15 Wayilejeli nindi: “Inakufwila chikupu kudiila hamu nanenu ichi Chipandakenu henohu kanda nihiti mumakabi; 16 muloña inakuyileja nami, hinamba kachiida ichi chawija cheñiku, sampu yuma yejima yinashikijewi muWanta waNzambi.” 17 Dichi, chatambwiliyi kaapu,* walombeli nakusakilila nakuhosha nindi: “Tambulenu kaapu aka, kihitishenumu kulonda munwimu wejima wenu, 18 muloña inakuyileja nami, kufuma dalelu, hinamba kanwa cheñi vinyuku, sampu Wanta waNzambi wunenzi.”

19 Cheñi, wanoneli dinkendi, chalombeliyi nakusakilila, wadihumwini nakuyinka, nakuyila nindi: “Idi dinkendi dinakwimenaku mujimba wami, owu wukuhanawu kukoola enu. Dichi mwileña mwenimu hakuñanakana.” 20 Welili mwomumu cheñi nakaapu,* chamanishiliwu kuda, kuda kwamelela, wahosheli nindi: “Aka kaapu kanakwimenaku mashi ami achitiyañenu chachiha, akupweka kukoola enu.

21 “Ilaña talenu, mukwakunfukejela wudi hamu nanami kumesa. 22 Chalala, Mwana kamuntu nakuya nakufwa kwesekeja nachafuukulawu dehi; hela chochu, oyihuñu yikumonayi owu muntu wukumufukejela!” 23 Dichi atachikili kuhosha mulwawu kulonda eluki wakeñeleña kumufukejela.

24 Hela chochu, hadiña nikuditaadikisha nankashi mulwawu kulonda eluki wadiña muneni chikupu hakachi kawu. 25 Ilaña yena wayilili nindi: “Anyanta ayuulaña nyuza, ekalaña nawuswa hadi antu jawu, nawa anlomboli ekalaña nawuswa hadi antu jawu, ayitenaña nawu Akwakukwasha Akwawu. 26 Ilaña enu, bayi mwikala neyi wenaku. Dichi muntu wunakukeña kwikala muneni chikupu hakachi kenu, yekali neyi kansi chikupu, nawa wunakulombola, yekali neyi mukwakuzatila akwawu. 27 Komana muneni yodihi, mukwakuda tahindi* owu wunakumuzatila? Komana mukwakuda* hidiyi muneniku? Ilaña ami nidi hakachi kenu nakuyizatila.

28 “Hela chochu, enu iyenu munatwalekihu kuumikila hamu nanami mukweseka kwami; 29 nawa inakutiyañana nanenu chitiyañenu, neyi Tata yami chatiyañeniyi nanami chitiyañenu chawanta, 30 kulonda mwakadi nikunwa kumesa yami muWanta wami, nikushakama hamatanda nakusompesha nyichidi 12 yaIsarela.

31 “Shimona, Shimona, tiyaña! Satana nalombi kulonda yayipepi wejima wenu neyi tidiku. 32 Ilaña nayilombeliku nakulembelela nami chikuhwelelu chenu chibuli kuzeya; nawa enu neyi munafunti, mwakakoleshi amanakwenu.” 33 Kuhiñahu, yena wamulejeli nindi: “Mwanta, ami nadiloñeshi kuya neyi mukaleya hela tuhu mukufwa.” 34 Ilaña yena wamulejeli nindi: “Inakukuleja Petulu nami, dalelu, henohu ikombu kanda yeteli, wukunkaana mapampa kasatu neyi hiwañilukaku.”

35 Wayilejeli cheñi nindi: “Chinayitemesheli kuya chakadi chikwama chamali, ipakumuna dayakuda hela nkwabilu, komana kudihu chuma chimwakaankilili tahindi?” Wena ahosheli nawu: “Inehi.” 36 Kuhiñahu, wayilejeli nindi: “Ichi dinu muntu wukweti mali muchikwama, yasendi, niwukweti ipakumuna dayakuda, yasendi, nawa muntu wunabuli mpoku yakabali yalandishi chakuvwala chindi chahewulu kulonda yalandimu yimu. 37 Muloña inakuyileja nami, mazu asonekawu akwila nawu, ‘Amuchindilili hamu nawantu afumpaña nshimbi,’ atela kushikijewa hadi ami. Muloña awa mazu anakushikijewa hadi ami.” 38 Dichi ahosheli nawu: “Mwanta, talaña! tukweti mpoku jatubali jiyedi.” Yena wayilejeli nindi: “Jojenoju jinawanini.”

39 Chafuminiyi kwenoku, wayili kuMpidi yaMaolivi neyi chochelileñayi dikalu, nawa atumbanji twindi niwena amulondeleli. 40 Chashikiliyi hanodu iluña, wayilejeli nindi: “Lombenuña kulonda mubuli kwiñila mukweseka.” 41 Ilaña yena wayishiyili nawa waswinini hahalehi chantesha,* kuhiñahu wafukamini nakutachika kulomba, 42 nakuhosha nindi: “Tata, neyi wunakukeña, fumishaku aka kaapu* kudi ami. Hela chochu, itejaku nkeñelu yeyi yishikijewi, bayi yamiku.” 43 Kuhiñahu, kañelu wenjili kudi yena kufuma mwiwulu, nawa wamukolesheli. 44 Ilaña Yesu wakabakeni nankashi, chakwila watwalekelihu nakulomba chikupu; nawa masulwila indi abalumukili neyi mashi anakusotokela heseki. 45 Chamanishiliyi kulomba, wanyamukili nakuya kudi atumbanji twindi, wayiwanini anakaami mutulu twatweni, muloña azeyeli nachineñi. 46 Yena wayihwili nindi: “Muloñadi chimunakaamini? Nyamukenu mulombeña kulonda mubuli kwiñila mukweseka.”

47 Iku wuchidi kuhosha, kutala! hikukwinza izaza dawantu niiyala wumu wahadi apostolu 12 ateneneñawu nawu Yudasi nawa diyi wayilombweleña, dichi wayili kudi Yesu nakumufufwa. 48 Ilaña Yesu wamwihwili nindi: “Eyi Yudasi, wunakumufukejela Mwana kamuntu kuhitila mukumufufwa tahindi?” 49 Dichi antu adiña nayena chamweniwu yuma yadiña kwakwihi nakumwekana, ahosheli nawu: “Mwanta, tuyitapi nampoku jatubali tahindi?” 50 Wumu hakachi kanowu antu, watapili ninduñu yakapristu muneni nakumuketula itu dindi dakuchidiilu. 51 Ilaña Yesu wahosheli nindi: “Kunahu.” Dichi wakwatili itu danowu nduñu nakumuuka. 52 Kuhiñahu, Yesu walejeli akulumpi jawatupristu, atupitawu amutembeli niakulumpi enjili nakumukwata nindi: “Munenzi nampoku jatubali nitubama neyi kwiji munenzi nakukwata kapondu tahindi? 53 Hefuku-hefuku, chinashakamaña nanenu mutembeli, himwankwatiliku. Ilaña iyi himpinji yenu nawa himpinji yanowu wukweti wuswa wamwidima.”

54 Dichi amukasili nawa amusendeli nakumutwala mwitala dakapristu muneni; ilaña Petulu walondeleleña hahalehi chanti. 55 Chabutwiliwu kesi hakachi kalubanza nakushakama hamu, Petulu niyena washakamini hakachi kawu. 56 Ilaña ñamba wamumbanda wakansi chamumweniyi nashakami kukesi, wamushinshikili chikupu nakuhosha nindi: “Iwu iyala niyena wadiña hamu nayena.” 57 Ilaña yena wakaanini nakuhosha nindi: “Eyi mumbanda, ami kwami hinamwilukaku.” 58 Chihahitili kapinji kantesha, muntu mukwawu wamumweni nakumwila nindi: “Nineyi wudi hakachi kawatumbanji twindi.” Ilaña Petulu wahosheli nindi: “Eyi iyala, hinidi hakachi kawuku.” 59 Chihahitili mpinji kwakwihi naora yimu, iyala mukwawu wakolelelihu nakuhosha nindi: “Kuhosha hohu chalala, iwu iyala niyena wadiña hamu nindi, muloña wakuÑaliliya!” 60 Ilaña Petulu wahosheli nindi: “Eyi iyala, nsañu yiwunakuhosha ami kwami hinayilukiku.” Hohenohu iku wuchidi kuhosha, ikombu yetela nikwitela. 61 Dichi Mwanta washetumukili nakumushinshika Petulu, nawa Petulu wanukili mazu amulejeliwu kudi Mwanta nindi: “Henohu ikombu kanda yeteli dalelu, wukunkaana mapampa kasatu.” 62 Dichi wayili hanji nawa wadilili nankashi.

63 Kuhiñahu, amayala amukwatili Yesu atachikili kumusupisha nikumweta; 64 chelili anamubuti dehi kumesu, amwihwileña nawu: “Profwetaku! Hinyi komana wunakweti?” 65 Nawa ahosheli yuma yikwawu yayivulu yakumusawula.

66 Chikwachili, izanvu dawakulumpi jawantu, akulumpi jawatupristu niansoneki apompeli hamu, nawa amutwalili mukapeka kawu kaSanihedirini* nakuhosha nawu: 67 “Neyi eyi, iyeyi Kristu, tuleji.” Ilaña yena wayilejeli nindi: “Hela tuhu niyileji, enu himukwitejaku. 68 Cheñi nawa, hela neyi niyihuli, himukuñakulaku. 69 Hela chochu, kufuma dalelu Mwana kamuntu wakashakama kuchikasa chachidiilu chañovu chaNzambi.” 70 Dichi wejima wawu amwihwili nawu: “Komana eyi, iyeyi Mwana kaNzambi?” Yena wayakwili nindi: “Mwomwenomu mumunahoshi.” 71 Wena ahosheli nawu: “Muloñadi wutukukeñela wunsahu wukwawu? Muloña etu aweni tunaditiyili mukanwa kindi.”