Luka
14 Hampinji yikwawu, Yesu wayili nakuda yakuda haSabata mwitala danlomboli wumu wawaFwarisi, nawa antu adiña munodu itala amushinshikileña chikupu. 2 Kutala, hambidi yindi hadiña iyala wadiña namusoñu wandondu.* 3 Dichi, Yesu wehwili antu elukili Nshimbi chikupu niaFwarisi nindi: “Komana nshimbi yeteja kuuka haSabata tahindi nehi?” 4 Ilaña wena amweneni kwanzo-o. Hamuloña wachumichi, wamukwatili owu iyala nakumuuka, nawa wamulejeli nindi yayi. 5 Dichi wayihwili nindi: “Hinyi hakachi kenu wukwila neyi mwanindi weyala hela chizamba* chindi chañombi yaholokela mwishima, wukubula kushikena kumuzambulamu hefuku daSabata?” 6 Wena hiyatwesheli kumwakulaku.
7 Kuhiñahu, chamweniyi antu atambikiliwu anakuditondela maluña alema kulonda ashakamimu, wayilejeli chakutalilahu. Wayilejeli nindi: 8 “Neyi muntu yakutambika kuchawija chawulu, bayi wushakama mwiluña dalema nankashiku. Hadaha muntu walema kubadika eyi niyena anamutambiki. 9 Dichi muntu wunayitambiki wejima wenu ayedi wukwinza nakukuleja nindi, ‘Fumaku ohu kulonda iwu muntu yashakamihu.’ Nawa wukutiya nsonyi hakushakama habula kulema. 10 Ilaña neyi anakutambiki, yaku wushakami mwiluña dabula kulema, kulonda neyi muntu wunakutambiki yenza, wukukuleja nindi, ‘Eyi ibwambu dami, yaku wushakami hana halema.’ Dichi wukwikala walema kumesu awakwenu enyi ejima anatambikiwu. 11 Muloña muntu wejima waditoheshaña, akamukehesha, nawa muntu wejima wadikeheshaña, akamutohesha.”
12 Kuhiñahu, walejeli nimuntu wamutambikili nindi: “Neyi wuloñesha kuda kwamwaana hela kwamelela, bayi wutambika amabwambu jeyi hela anakweyi hela antaña jeyi hela antuñi neyi ahetaku. Hadaha niwena akamba kakutambika nineyi, nawa chumichi chikwikala hiwufwetu weyi. 13 Ilaña neyi wuloñesha chawija, tambikaku atuzweñi, ayifwayi, akwakubalakata, amputamesu; 14 nawa wakekala namuzañalu, muloña wena hiyakweti chuma chakukufwetaku. Hakwila eyi akakufweta hakasañulawu antu aloña.”
15 Chatiyiliwu iyi nsañu, muntu wumu hakachi kawenyi atambikiliwu wahosheli nindi: “Wudi namuzañalu yowu muntu wadaña* muWanta waNzambi.”
16 Yesu wamulejeli nindi: “Kwadiña muntu waloñesheli kuda kwamelela, nawa watambikili antu amavulu. 17 Watemesheli nduñu yindi hampinji yakuda kuda kwamelela kulonda yaleji antu atambikiliwu nawu, ‘Inzenu, muloña yuma yejima anayiloñeshi dehi.’ 18 Ilaña wejima wawu atachikili kukeñakeña njila mwakukaanina. Watachi wamwilili nindi, ‘Ñanakeniku, nukutwesha kwinza wanyi; Muloña nalandi iha, dichi inakukeña niyi nakaditali.’ 19 Mukwawu wahosheli nindi, ‘Ñanakeniku, nukutwesha kwinza wanyi; Muloña nalandi añombi 10 akumpaanda, dichi inakukeña niyi nakayeseki.’ 20 Mukwawu niyena wahosheli nindi, ‘Nafumi tuhu hakusumbula, muloña wachumichi nukutwesha kwinza wanyi.’ 21 Dichi owu nduñu wafuntili nakushimuna kudi nkaaka yindi yuma yejimiyi. Kuhiñahu, mwini itala wahilili nakumuleja nduñu yindi nindi, ‘Yaña swayi-swayi munyikwakwa yamaneni nimunjila jamumusumba, kulonda wuleti atuzweñi, ayifwayi, amputamesu niakwakubalakata.’ 22 Chihahitili mpinji, owu nduñu wahosheli nindi, ‘Mwanta, nazati dehi yuma yiwanleja, hela chochu, iluña dichidi kwoku.’ 23 Nkaaka yanowu nduñu wamulejeli owu nduñu nindi, ‘Yaña munyikwakwa nimujinjila wuyileji antu enzi eñili kulonda mwitala dami mwinzali. 24 Muloña inakukuleja nami, hakachi kanowu amayala inatambika, hosi niwumu wukuda kuda kwami kwamelelaku.’”
25 Dichi mazaza amaneni awantu ayileña hamu naYesu, yena wabalumukili nakuyileja nindi: 26 “Neyi muntu yenza kudi ami nawa yabula kuhela tata yindi hela mama yindi hela ñodindi hela anyanindi hela amanakwindi hela ahelindi hela wumi windi, hanateleli kwikala kambanji kamiku. 27 Muntu wejima wabulaña kusenda mutondu windi wakuyandishila* nakunlondela, hanateleli kwikala kambanji kamiku. 28 Chakutalilahu, hinyi hakachi kenu wukwila neyi nakukeña kutuña kaposhi wukubula kusambila kushakama hamaseki nakuchinda mali akuzatishayi kulonda yamoni neyi wukweti mali amavulu akukimanisha nachu? 29 Neyi nehi, wukukumina dakwaala chikuku nakukañanya kumanisha, nawa antu ejima anakumonaku akutachika kumuseha, 30 nakuhosha nawu: ‘Iwu iyala watachikili kutuña ilaña nakañanyi kumanisha.’ 31 Hela mwantanyi wukweti mashidika 10,000 wukubula kusambila kushakama hamaseki kulonda yamoni neyi wukutwesha kulwa njita namukwawu mwanta wukweti mashidika 20,000? 32 Kafwampi, neyi hakutwesha kwila mwenimuku, henohu mukwawu wuchidi kwakulehi, wukutemesha izanvu dawañimeni kulonda atiyañani, aleti kuwunda. 33 Chochimu, mwatela kwiluka nenu hosi muntu niwumu hakachi kenu wunateli kwikala kambanji kami neyi yabula kushiya* yuma yindi yejima.
34 “Kuhosha hohu chalala, muñwa wawuwahi. Ilaña neyi muñwa wusamunuka, akuwutowesha nanka? 35 Hiwukutelela kuwisha kumaseki hela kuwushiku. Antu awumwañaña. Dichi muntu wukweti matu akutiya, yatiyi.”