Matewu
22 Yesu wahosheli cheñi nawu nayakutalilahu, nindi: 2 “Wanta wamwiwulu anateli kuwesekeja namwanta waloñesheli chawija chawulu wamwanindi weyala. 3 Dichi watemesheli anduñu jindi kulonda ayi nakuleja antu atambikiliyi enzi kuchawija chawulu, ilaña hiyakeñeleña kwinzaku. 4 Watemesheli cheñi anduñu amakwawu nakuyila nindi, ‘Yenu muleji antu ejima innatambiki nenu: “Naloñeshi dehi yakuda, najahi yizamba* yami yañombi niyimuna yami yanuna nawa yuma yejima yakuloñesha dehi. Inzenu kuchawija chawulu.”’ 5 Ilaña awa antu ashiliku maana wanyi, elili iwu yaya kwiha dindi, mukwawu niyena kumudimu windi wakulandulula; 6 Ilaña antu amakwawu ashalilihu, akwatili owu anduñu jindi nakuyikabisha nikuyijaha.
7 “Dichi mwanta wazuwili nankashi nawa watemesheli mashidika indi kuya nakujaha awa antu ajahañeni nikuyochela musumba wawu. 8 Kuhiñahu walejeli anduñu jindi nindi, ‘Chawija chawulu anachiloñeshi dehi, ilaña antu innatambiki hiyanateleli kwinza kuchawija chawuluku. 9 Dichi, yenu munyikwakwa yinafumi mumusumba nawa mutambiki muntu wejima wumukuwana kulonda yenzi kuchawija chawulu.’ 10 Owu anduñu ayili munyikwakwa kwesekeja nachayilejeliwu nawa apompesheli antu ejima awaniniwu, amawahi niatama; nawa kapeka kachidika chawulu kenzeli to-o nawantu enjili nakuda.*
11 “Mwanta chenjiliyi nakutala antu enjili, wamweni iyala wumu wabulili kuvwala chakuvwala chahawulu. 12 Dichi wamwihwili nindi, ‘Eyi mukwetu, wuneñili ñahi munu chakadi kuvwala chakuvwala chahawulu?’ Yena niizu dakuhoshahu nehi. 13 Kuhiñahu mwanta walejeli ambuñindi nindi, ‘Mukasenu kumakasa nikunyendu mumunatili hanji mumwidima. Mwenomu dimu mukudililañayi nikudisumona kumazewu.’
14 “Muloña antu anatambikiwu amavulu, ilaña anatondiwu antesha.”
15 Dichi aFwarisi ayili nakumushakamina hampuña kulonda amwinki muloña namazu akuhoshayi. 16 Atemesheli atumbanji twawu kudi yena hamu nawakwakumulondela Herodi, nakumwila nawu: “Ntañishi, tweluka netu wahoshaña mwalala nikutañisha njila yaNzambi muchalala nawa hiwakeñaña wukwashu kudi muntuku, muloña hiwatalaña antu kumesuku. 17 Tuleji, wukuhoshahu neyidi? Komana nshimbi yeteja kuhana musonku kudi Kesari tahindi nehi?” 18 Ilaña Yesu chelukiliyi yitoñojoka yawu yatama, wayihwili nindi: “Enu anfwikiji, muloñadi chimunakuñesekela? 19 Tutalenu mali imwahanaña kumusonku.” Dichi wena amuleteleli denari yimu. 20 Yena wayihwili nindi: “Indi iwu mutu ninsona jidi aha, janyi?” 21 Wena amwakwili nawu: “JaKesari.” Yena wayilili nindi: “Yuma yaKesari, mwinkenu Kesari nawa yuma yaNzambi, mwinkenu Nzambi.” 22 Chatiyiliwu awa mazu, ahayamini, amushili nakuya kwacheñi.
23 Hadodenodu ifuku, aSadusi ahoshaña nawu hikwekala kusañukaku, enjili nakumwihula nawu: 24 “Ntañishi, Mosi wahosheli nindi: ‘Neyi iyala yafwa chakadi kuvwala anyana, manakwindi watela kumusumbula owu mumbanda nakumuvwalilamu manakwindi anyana.’ 25 Dichi twadiña nawamayala 7 evumu dimu. Watachi wasumbwili mumbanda, ilaña owu iyala wafwili chakadi kuvwalilamu mwana, dichi iwu mumbanda amusumbwili kudi mwanyika nfumwindi. 26 Chuma chochimu chamwekeni nikudi wamuchiyedi niwamuchisatu ndo-o nikudi ejima 7. 27 Nkumininaku, owu mumbanda niyena wafwili. 28 Hanu dinu hakusañuka, hadi awa 7, hinyi wakekala mwini mumbanda? Muloña wejima wawu amusumbwilihu.”
29 Yesu wayakwili nindi: “Enu dinu mwajimbelamu, muloña himweluka Nsona hela ñovu yaNzambiku; 30 Hakusañuka amayala hiyakasumbulañaku nawa ambanda niwena hiyakasumbukañaku, ilaña akekala neyi chekalawu añelu mwiwulu. 31 Kutalisha hansañu yakusañuka kwawafu, komana kanda mutañeñahu dehi mazu ahosheliyi Nzambi kudi enu, nindi: 32 ‘Ami yami Nzambi yaAbarahama, Nzambi yaIsaka nawa Nzambi yaYakoba’ tahindi? Yena hiNzambi yawantu amomi, bayi afwaku.” 33 Dichi, mazaza awantu chiyatiyili awa mazu, ahayamini chikupu nantañishilu yindi.
34 Chelili aFwarisi atiyi nawu Yesu nayimweneshi dehi aSadusi, enjili wejima wawu hamu kwadiñayi. 35 Dichi wumu hakachi kawu welukili Nshimbi chikupu, wamwesekeli kuhitila mukumwihula nindi: 36 “Ntañishi, lushimbinyi lwabadika haNshimbi jejima?” 37 Yena wamwakwili nindi: “‘Keñaku Yehova Nzambi yeyi namuchima weyi wejima, nawumi weyi wejima, nayitoñojoka yeyi yejima.’ 38 Ilu dilu lushimbi lwabadika nawa lwakusambila. 39 Lushimbi lwamuchiyedi ludi neyi ilu, lwakwila nawu: ‘Keñaku mukwenu neyi chiwadikeña eyi aweni.’ 40 Haniji nshimbi jiyedi dihashindamena Nshimbi jejima nimazu awaTuprofwetu.”
41 Henohu aFwarisi achidi adipompesha hamu, Yesu wayihwili nindi: 42 “Mwatoñojokañahu nenudi hadi Kristu? Himwana kanyi?” Wena amwakwili nawu: “Himwana kaDavidi.” 43 Dichi wayihwili nindi: “Hanu dinu, Davidi hamuloña wakumwonena naspiritu yajila, chumanyi chamutenenañayi nindi Mwanta, nakuhosha nindi, 44 ‘Yehova wamulejeli Mwanta wami nindi: “Shakamaku kuchikasa chami chachidiilu sampu nashi ayilumbu jeyi mwishina danyendu yeyi”’? 45 Dichi, neyi Davidi wamutenaña nindi Mwanta, hanu dinu, wekala ñahi mwanindi?” 46 Kwosi niwumu watwesheli kumwakulaku, nawa kufuma hadodenodu ifuku hikwadiñahu niwumu wamwihwilihu cheñi lwihuku.