Luka
21 Dichi Yesu chafumbwiliyi mesu indi, wamweni antu aheta chombilileñawu yawaana yawu muyikasha yamali. 2 Kuhiñahu, wamweni mumbanda nfwila wakaankila wombililimu tumawayawaya twanyanya tuyedi twapela wuseya nankashi,* 3 nawa wahosheli nindi: “Inakuyileja chalala nami iwu mumbanda nfwila kazweñi nombilimu mali amavulu kubadika ejima anombilimu. 4 Muloña awa antu ejima anombilimu mali anafumishiwu hamaheta awu, ilaña iwu mumbanda hela chakwila hikazweñi, nombilimu mali ejima adiñayi nawu akuhandilamu.”
5 Chimwahitili mpinji, helili antu amu anakuhosha hatembeli ochu chayituñiliwu namalola amawahi niyawaana yahaniniwu kudi Nzambi, 6 wahosheli nindi: “Iyi yuma yimunakumona, mafuku akenza hakela kwosi ilola nidimu dakashala hewulu delola dikwawu dakabula kwalumunawuku.” 7 Kuhiñahu, amwihwili nawu: “Ntañishi, mpinjinyi yakamwekana yumiyi, nawa chinjikijilwinyi chikamwekesha nawu yuma yejimiyi katataka yimwekani?” 8 Yena waakwili nindi: “Babalenu kulonda abuli kuyiluwañesha, muloña antu amavulu akenjila mwijina dami, nakuhosha nawu, ‘Diyi ami,’ cheñi nawu, ‘Mpinji yinashiki dehi kwakwihi.’ Bayi mwakayilondelaku. 9 Cheñi nawa, chimwakatiya nsañu jamajita nimapumba,* bayi mwakatiya womaku. Muloña yumiyi yatela kusambila kumwekana, ilana kukuma hikwakenza hohenohuku.”
10 Wayilejeli cheñi nindi: “Muza wakanyamuka nakuzuña namuza wukwawu, wanta niwena wakanyamuka nakuzuña nawanta wukwawu. 11 Kwakekala nyitentanshi yamaneni nankashi, kwakekala nzala yakapwelendendi kweñi-nakweñi niyipupu; kwakamwekana yuma yakutiyisha woma nawa mwiwulu mwakafuma yinjikijilu yamaneni.
12 “Ilaña henohu yuma yejimiyi kanda yimwekani, antu akayikwata enu nikuyikabisha, nawa akayitwala mumasinagogi nimutuleya. Akayitwala kudi anyanta nikudi anguvulu kukoola ijina dami. 13 Chumichi chikayileñela mwakayishimwini wunsahu. 14 Dichi, bayi mutoñojokela chadimu munyichima yenu chimwakahosha hakudamwinaku, 15 muloña ami nakayinka mazu nimaana owu akakañanyawu akwakudikaña nenu ejima kuyikaana hela kuyitaadika. 16 Kubombelahu, anvwali jenu, amanakwenu, antaña jenu niamabwambu jenu akayitwala* kuyota yanyiloña, enu amu akayijaha, 17 nawa akayihela kudi antu ejima kukoola ijina dami. 18 Ilaña kwosi lusuki nilumu lwakunyitu yenu lwakakisikaku. 19 Neyi mwakomika, mwakapulwisha mawumi enu.*
20 “Hela chochu, chimwakamona Yerusalema anamukuchiki kudi mashidika, mwakeluki nenu kujilumuka kwindi kunaswini dehi kwakwihi. 21 Dichi antu akekala muYudeya akatachiki kutemukila kumapidi, antu akekala mukachi kaYerusalema akafumimu, nawa antu akekala mumaluña amukamwihi bayi akeñila muYerusalemaku, 22 muloña wenawa akekala mafuku awunsompeshi* kulonda yuma yejima yasonekeliwu yikashikijewi. 23 Oyihuñu yakamonawu ambanda akekala namavumu niambanda akekala nawanyana anyanya mumafuku wenowu! Muloña mwituña mwakekala lukadi lweneni nawa kuzuwa kwakenza hadi awa antu. 24 Akafwa kuwumwemu wampoku yakabali nakuyitwala muwunkoli kunyuza yejima; nawa Yerusalema akamudatola kudi akwanyuza* sampu mpinji yatoñolawu yawakwanyuza* yinashikijewi dehi.
25 “Cheñi, kwakekala yinjikijilu kwitena,* kukakweji nikututumbwa. Nawa hanu hamaseki akwanyuza akekala muyihuñu nawa hiyakeluka mwakwililaku muloña walushindu lwakaluñalwiji nimankanda aku. 26 Antu akahwidijela hamuloña wawoma niyuma yikatalilañawu yakamwekena iseki dejima, muloña yuma yasweja ñovu yamwiwulu yakakanka. 27 Kuhiñahu, akamona Mwana kamuntu nakwinza mwivu nañovu nikulema kwasweja. 28 Ilaña chikatachika kumwekana yumiyi, mwakemani zululu-u nakubandula nyitu yenu kwiwulu, muloña wamwinu wenu wunakuswina kwakwihi.”
29 Hamuloña wachumichi, wayilejeli chakutalilahu nindi: “Toñojokenu hamutondu wachikuyu ninyitondu yikwawu yejima. 30 Chimwayimona hiyikusapuka, mwelukaña nenu mayinza adi kwakwihi. 31 Ninenu nawa, neyi mumona yumiyi hiyikumwekana, mwakeluki nenu Wanta waNzambi wudi kwakwihi. 32 Inakuyileja chalala nami, idi ikiñu dikahita wanyi, sampu yuma yejima yinamwekani dehi. 33 Iwulu niiseki jakahita, ilaña mazu ami hiyamba kahitaku.
34 “Dichi babalenu kulonda nyichima yenu yibuli kulema namuloña wakusweja kuda, kusweja kunwa nikwakama kwamuwumi, kulonda ifuku odu dakabuli kuyishikena enu chakukashimwisha 35 neyi muhetu. Muloña dakashikena antu ejima ashakama hamaseki hejima. 36 Dichi tonenuña, lombenuña nakulembelela mpinji yejima kulonda mwakatweshi kupuluka kuyuma yejimiyi yakamwekana nikutwesha kwimana kumesu aMwana kamuntu.”
37 Dichi, namwaana watañishileña mutembeli, ilaña nawufuku wafumineñamu nakuya nakukaama kumpidi yateneneñawu nawu Mpidi yaMaolivi. 38 Nawa antu ejima enjileña kudi yena nabudidi nankashi nakumutiyilila mutembeli.