3 Yowanu
1 Ami mukulumpi,* inakukusonekela eyi Gayusi wakeñewa, eyi inakeña chikupu.
2 Eyi mukwetu inakeña, inakulomba nami muyuma yejima wutwalekihu kwila chiwahi nikwikala wakola chiwahi kumujimba, neyi chochiwunakwila.* 3 Muloña nazañaleli chikupu chenjiliwu anakwetu nakushimuna wunsahu kutalisha hachalala chiwukweti, neyi chiwunatwalekihu kwenda muchalala. 4 Kwosi chuma chikwawu chanzañaleshaña* chikupu kubadika ichi chakutiya nawu: anyanami anatwalekihu kwenda muchalala.
5 Eyi mukwetu inakeña, wamwekeshaña kashinshi keyi muyuma yiwakalakelaña anakwetu hela chakwila eyi hiwayilukaku. 6 Anashimuni kukeña kweyi kuchipompelu. Neyi hiyakufunta, nakulembeleli nami wakayikwashi kwesekeja nanomu mwatiyañayi Nzambi kuwaha. 7 Wena ayili nakushimwina muloña wejina dindi, nawa hiyatambwilihu chuma hela chimu kufuma kudi antu akunyuzaku. 8 Dichi, tukweti mudimu wakumwekesha chisambu kudi antu amuchidiwu kulonda twiikali akwakukalakala hamu nawu muchalala.
9 Ami nasonekeli mukanda kuchipompelu, ilaña Diyotefwesi, wakeñaña kwikala watachi mukachi kawu, hetejaña nakalemesha yuma yitwahoshañaku. 10 Dichi muloña wachumichi, neyi ami nenzi oku, nakasolola nyidimu yindi yinakukoñayi yakutaandisha nsañu yamakudi hadi etu.* Hakuminaña dakwila mwenimu hohuku, ilaña halemeshaña nikutambwila chiwahi anakwetuku; nawa owu akeñaña kutambwila anakwetu, yena wayikaanishaña nikuyihaña muchipompelu.
11 Eyi mukwetu inakeña, bayi wimbujola yuma yatamaku, ilaña imbujolaña yuma yayiwahi. Muntu wakoñaña yuma yayiwahi wekala kukabadi kaNzambi. Ilaña muntu wakoñaña yuma yatama wamwiluka Nzambi wanyi. 12 Anakwetu ejima anamushimuni chiwahi Demeterusa nawa chalala nichena chinamwekeshi chumichi. Kafwampi, ninetu tunakushimuna wunsahu hadi yena, nawa nineyi weluka neyi wunsahu wutwashimunaña walala.
13 Nadiña nansañu yayivulu yakukusonekela, ilaña ami hinnakukeña kutwalekahu kukusonekela nansonekeshi ninawulombuku.* 14 Hela chochu, nakuhweleli kukumona eyi katataka nawa twakahanjeki mesu-namesu.*
Kuwunda kwiikali naneyi.
Amabwambu adi kunu anakwimushi. Wuñimushiliku amabwambu adi oku hejina-hejina.