Luka
13 Hayina mpinji, antu amu adiñahu amulejeli nsañu yawaÑaliliya ajahiliyi Pilatu hampinji yahanineñawu nyilambu* yawu. 2 Yena wayilili nindi: “Komana munakutoñojoka nenu ana aÑaliliya ajahiliwu adiña akwanshidi nankashi kubadika akwawu aÑaliliya ejima tahindi? 3 Inehi, inakuyileja nami; neyi ninenu kubalumuka munyichima yenu nehi, akayijaha wejima wenu neyi chayijahiliwu wena. 4 Hela ana antu 18 aholokeleliwu kudi kaposhi kamuSilowami nakuyijaha, komana munakutoñojoka nenu adiña nanshidi jasweja kubadika antu ejima ashakamaña muYerusalema tahindi? 5 Inehi, inakuyileja nami; neyi ninenu kubalumuka munyichima yenu nehi, akayijaha wejima wenu neyi chayijahiliwu wena.”
6 Kuhiñahu, washimwini ichi chakutalilahu nindi: “Kwadiña iyala watumbili mutondu wachikuyu mwitempa dindi danyivinyu, nawa wayili nindi yakeñiku nyikabu, ilaña hayiwaniniku. 7 Dichi, walejeli mukwakukalakala mwitempa danyivinyu nindi, ‘Achinu dichaaka chamuchisatu chinnenzi nakukeña nyikabu kuniwu mutondu wachikuyu, ilaña hinayiwanañaku. Wutemi! Muloñadi chinukuwulekela wukisañaneña iseki?’ 8 Yena wamwakwili nindi, ‘Nkaaka, wuleki cheñi hadi chaaka chimu, nisambili kuchipachipaku nawa ninkiku wushi. 9 Neyi chakwila kumbidi wakasoña nyikabu, chakawaha; ilaña neyi wakasoña wanyi, wakawutemi.’”
10 Hampinji yimu, Yesu watañishileña musinagogi yimu haSabata. 11 Cheliliyi nindi yatali, wamweni mumbanda wadiña nandemoni wawufwayi wamukabishili hadi yaaka 18; iwu mumbanda wendeleña nakubandañila nawa hatwesheleña kwinuka* nihantiku. 12 Yesu chamumweniyi iwu mumbanda, wamutambikili nakumwila nindi: “Eyi mumbanda, wunokewi kuwufwayi weyi.” 13 Nawa wamunañikili iwu mumbanda makasa, hohenohu wenukili* nakutachika kumulemesha Nzambi. 14 Ilaña mukulumpi wasinagogi chamweniyi chuma chamwekeni, wahilili nankashi muloña wakwila Yesu wokili haSabata, kuhiñahu, walejeli izaza dawantu nindi: “Kwekala mafuku 6 akuzatilamu nyidimu; dichi mwinzeña nakuukewa munawa mafuku, bayi hefuku daSabataku.” 15 Hela chochu, Mwanta wamwakwili owu iyala nindi: “Enu anfwikiji, hinyi hakachi kenu wabulaña kukasununa chizamba* chindi chañombi hela chimbulu mwitaña haSabata nakumutwala kulonda yayi nakumwinka menji? 16 Indi iwu mumbanda, mwana kaAbarahama akasiliwu kudi Satana hadi yaaka 18, komana hatelela kumukasununa hefuku daSabataku?” 17 Chahosheliyi awa mazu, antu ejima adikañileña nindi atiyili nsonyi, ilaña izaza dawantu dejima dazañaleli hayuma yalema yejima yakoñeliyi.
18 Dichi wahosheli nindi: “Indi Wanta waNzambi wafwana chumanyi, nawa anateli kuwesekeja nachumanyi? 19 Wudi neyi luchacha lwamositadi* lwatumbiliyi muntu mwitempa dindi, nawa lwakulili nakwikala mutondu niatuda amuluzwizu enjili nakutuñila yisakala kunyitayi yindi.”
20 Wahosheli cheñi nindi: “Indi Wanta waNzambi nateli kuwesekeja nachumanyi? 21 Wudi neyi iluñi danoneliyi mumbanda nakudibomba namabañu amaneni asatu* awuña walembuluka sampu nichavuvumukili chikanka chejima.”
22 Nawa wayili kumusumba nimusumba nikumukala nimukala, nakutañisha nikutwalekahu nalwendu lwindi lwakuya kuYerusalema. 23 Dichi muntu wumu wamwihwili nindi: “Mwanta, komana chalala antu antesha hohu diwu akamwinawu tahindi?” Yena wayilejeli nindi: 24 “Zatenu nañovu chikupu kulonda mwiñilili muchiisu chanyanya, muloña inakuyileja nami, antu amavulu akafwilaña kwiñililamu, ilaña hiyakatweshaku. 25 Neyi mwini itala neñili dehi nawa yakiya* kuchiisu, mwakemana hanji nakudondomwena kuchiisu, nakuhosha nenu, ‘Mwanta, twenzunwiniku.’ Ilaña yena wakayila nindi: ‘Neluki wanyi kumunafumi.’ 26 Kuhiñahu, mwakatachika kuhosha nenu, ‘Twadiileña nikunwa iku wunakumonaku, nawa eyi watañishileña munyikwakwa yetu yamaneni.’ 27 Ilaña yena wakayileja nindi, ‘Neluki wanyi kumunafumi. Fumenu kudi ami, enu mwakoñaña yuma yabula kuloña!’ 28 Kwenoku diku kumwakadililaña nikudisumona kumazewu chimwakamona Abarahama, Isaka, Yakoba, niatuprofwetu ejima muWanta waNzambi, ilaña enu akayinatila hanji. 29 Cheñi nawa, antu akenza kufuma kumusela nikumujika nikukabeta kakuchimunswa nikukabeta kakuchidiilu, nawa akashakama kaheña kumesa muWanta waNzambi. 30 Dichi tiyenu, kudi antu anakumininiku akekala akusambila, nawa kudi antu anasambiliku akekala akukumininaku.”
31 Hayoyenoyu mpinji, aFwarisi amu enjili nakumuleja nawu: “Fumaku hanu wuyeña, muloña Herodi nakukeña kukujaha.” 32 Hakwila yena wayilejeli nindi: “Yenu mwakamuleji owu mumbu nenu, ‘Tiyaña! Inakufumisha andemoni nikuuka antu dalelu nikumadiki, nawa hefuku damuchisatu dihu hinakamanisha.’ 33 Hela chochu, natela kutwalekahu nalwendu lwami dalelu nikumadiki niifuku dikalondelahu, muloña kaprofwetu hiyatelela kumujahila hanji yaYerusalemaku. 34 Eyi Yerusalema, eyi Yerusalema, mukwakujaha atuprofwetu nawa mukwakwasa malola antu anamutemesheliwu! Owu mapampa kuvula inakeñeleña kukuñwija anyaneyi hamu neyi chakuñwijañayi chaadi anyanindi mumpuula jindi! Ilaña enu himwakeñeleñaku. 35 Talenu! Itala denu anayishilidu. Inakuyileja nami, mwakammonahu cheñi wanyi sampu nichimwakahosha nenu: ‘Wakiswilewa yowu muntu wenjilaña mwijina daYehova!’”