Matewu
10 Dichi watambikili atumbanji twindi 12 nawa wayinkeli wuswa wabadika aspiritu azonda, kulonda ayifumisheña nikuuka nyisoñu niyikatu yeñi-nayeñi.
2 Awa diwu majina awapostolu 12: Watachi diyi Shimona ateneneñawu nawu Petulu nimanakwindi Anderi; Yakoba mwana kaZebedewu nimanakwindi Yowanu; 3 Fwilipu niBatolomewu; Tomasi niMatewu mukwakutambula nyisonku; Yakoba mwana kaAlafwewu niTadewu; 4 Shimona kaKenani,* niYudasi Isakaroti owu wamufukejeleli Yesu.
5 Yesu watemesheli awa 12, wayinkeli iji nshimbi nindi: “Bayi muya munjila yawakwanyuzaku nawa bayi mwiñila mumusumba wawaSamariyaku; 6 ilaña, twalekenuhu kuya kudi anyikoku ajimbala amwitala daIsarela. 7 Dichi chimukuyaña, shimwinenuña nenu: ‘Wanta wamwiwulu wunaswini dehi kwakwihi.’ 8 Ukenuña antu akata, sañulenuña afu, tookeshenuña akwambumba nawa fumishenuña andemoni. Mwatambwilili chawaana, hanenuña chawaana. 9 Bayi musenda wuru hela siliva hela wuneñu muyikwama yenu yamali, 10 hela ipakumuna dayakuda yahalwendu hela yakuvwala yiyedi* hela nkwabilu hela mukombuku, muloña mukwakukalakala watelela kumwinka yakuda yindi.
11 “Mumusumba wejima hela mumukala mumukwiñila, keñakeñenumu muntu wunateleli nawa shakamenu mwenomu sampu munafumimu. 12 Chimweñila mwitala, imushenu antu amunodu itala. 13 Neyi antu amunodu itala anateleli, kuwunda kwenu kwiikali nawena; ilaña neyi anateleli wanyi, kuwunda kwenu kufunti cheñi kudi enu aweni. 14 Kwejima kukubula kuyitambwilawu kudi muntu hela kutiyilila kunsañu yenu, hakufuma munodu itala hela munowu musumba, mutotomoneña lunkuñu kunyendu yenu. 15 Inakuyileja chalala nami, Hefuku daKusompesha, antu amuSodoma naGomora akayitiyila luwi nankashi kubadika antu amunowu musumba.
16 “Tiyenu! Inakuyitemesha neyi anyikoku mukachi kawatuñwidi; dichi ikalenu ababala neyi tupela nawa ashinshika neyi tupompa. 17 Yibabelenu antu muloña akayiholokela kuyota yanyiloña yanyanya nikuyetela mumasinagogi awu. 18 Nawa akayitwala kumesu awanguvulu niawanyanta kukoola ami kulonda wakekali wunsahu kudi wena nikudi akwanyuza. 19 Hela chochu, neyi ayiholokela kuchota chanyiloña, bayi mwakama nakutoñojoka chimwatela kuhosha hela yuma yimukuhoshaku, muloña akayileja yuma yimwakahosha hanoyu mpinji; 20 muloña hiyenu mwakahoshañaku, ilaña spiritu yaTata yenu diyi yakahoshelaña mudi enu. 21 Cheñi, muntu wakahana manakwindi kulonda amujahi, tata yawantu wakahana mwanindi nawa anyana akadikaña nawanvwali jawu nakuyihana kulonda ayijahi. 22 Akayihela kudi antu ejima kukoola ijina dami, ilaña muntu wejima wakomika* kushika nikunsa, diyi akamwinawu. 23 Neyi ayikabisha mumusumba wumu, temukilenu muwukwawu; inakuyileja chalala nami, Mwana kamuntu wakashika henohu kanda mumanishi mudimu wenu wakushimwina munyisumba nimunyikala yaIsarela.
24 “Kambanji habadika ntañishi yindiku, hela nduñu habadika nkaaka yindiku. 25 Kambanji wukutiya kuwaha kwikala neyi ntañishi yindi, ninduñu neyi nkaaka yindi. Neyi antu atenaña mwini itala nawu Belezebuli,* chakadi nikujina niamwitala dindi akuyitena chochimu. 26 Dichi bayi muyitiya womaku, muloña kwosi chuma chajikawu chikabula kujikulawuku, nawa kwosi chuma chajindawu chikabula kwilukawuku. 27 Yuma yinukuyileja mumwidima, yihoshenu muchejeji nawa yuma yinukuyishawutila, yishimwinenu hewulu damatala. 28 Nawa bayi mutiya woma antu anateli kuyijahaku, muloña hiyanateli kuyikañesha kwikala cheñi nawumi kumbidiku, ilaña tiyenu woma wunateli kuyijilumuna muGehena.* 29 Komana anzwimba* ayedi hiyayilandishaña nakadiwayawaya kabula kulema wuseyaku?* Hela chochu, kwosi nzwimba niwumu wunateli kuholoka heseki chakadi Tata yenu kwilukaku. 30 Ilaña ninsuki jenu jakumutu jejima ajichinda dehi. 31 Dichi, bayi mutiya womaku; muloña enu mwalema kubadika anzwimba amavulu.
32 “Muntu wejima wañitejaña kumesu awantu, ninami nawa nakamwiteja kumesu aTata yami wekala mwiwulu. 33 Ilaña muntu wejima wankaanaña kumesu awantu, ninami nawa nakamukaana kumesu aTata yami wekala mwiwulu. 34 Bayi mutoñojoka nenu nenjili nakuleta kuwunda hamasekiku; nenjili nakuleta mpoku yakabali bayi kuwundaku. 35 Muloña nenjili nakuleta chaambu hadi mwana weyala natata yindi, mwana wamumbanda namama yindi nawa mumbanda wesumbu namuku windi wamumbanda. 36 Chalala, ayilumbu jamuntu akekala antu amwitala dindi yomweni. 37 Muntu wejima wasweja kukeña tata yindi hela mama yindi kubadika ami, hanateleli kwikala kambanji kamiku; nawa muntu wejima wasweja kukeña mwanindi weyala hela mwanindi wamumbanda kubadika ami, hanateleli kwikala kambanji kamiku. 38 Nawa muntu wejima wukubula kusenda mutondu windi wakuyandishila* nakunlondela, hanateleli kwikala kambanji kamiku. 39 Muntu wejima wafwilaña kupulwisha wumi windi, wakafwa, hakwila muntu wejima wukujimbesha wumi windi kukoola ami, wakekala nawumi cheñi.
40 “Muntu wejima wayitambwilaña, dikwila nawu wantambwilaña ninami nawa, nimuntu wejima wantambwilaña, watambwilaña niNowu wantemesheli. 41 Muntu wejima wukutambwila kaprofwetu hamuloña wakwila hikaprofwetu, wakatambwila wufwetu watambwilaña kaprofwetu nawa muntu wejima wukutambwila muntu waloña hamuloña wakwila himuntu waloña, wakatambwila wufwetu watambwilaña muntu waloña. 42 Nawa muntu wejima wukwinka wumu hakachi kanawa akehelamu kaapu hohu kamenji* atuuta akunwa hamuloña wakwila hikambanji, inakuyileja chalala nami, chakadi nikujina wakatambula wufwetu windi.”