Luka
15 Dichi, akwakutambula nyisonku niakwanshidi apompeleña kudi Yesu kulonda atiyi chahosheleñayi. 2 AFwarisi nawansoneki atwalekelihu nakumuhosha chatama nawu: “Iwu iyala watambwilaña akwanshidi nikudiila hamu nawu.” 3 Kuhiñahu, wayilejeli ichi chakutalilahu nindi: 4 “Iyalanyi hakachi kenu wukweti anyikoku 100 nawa hajimbala wumu, wukubula kushiya anyikoku 99 mwisaña nakuya nakukeñakeña owu mukoku wunajimbali? 5 Neyi yamuwana, wukumusha hamafwiji indi nawa wukuzañalala. 6 Chashikayi kwitala, wukupompesha amabwambu jindi niatuñi nindi nakuyileja nindi, ‘Zañalalenu hamu nanami, muloña nawani mukoku wami wajimbeli.’ 7 Chochimu nawa, inakuyileja nami, mwiwulu nimwena mwekalaña muzañalu neyi mukwanshidi wumu yabalumuka mumuchima kubadika akwakuloña 99 anakubula kukeñeka kubalumuka munyichima.
8 “Hela mumbandanyi wukweti mali amawayawaya madirakima 10 nawa yajimbeshahu dirakima yimu, wukubula kwaambula inoñu nikukomba mwitala dindi nakukeñakeña chiwahi sampu yadiwana? 9 Neyi yadiwana, wukupompesha amabwambu jindi* niatuñi nindi nakuyileja nindi, ‘Zañalalenu hamu nanami, muloña nawani dali dewayawaya dadirakima dinajimbesha.’ 10 Chochimu nawa, inakuyileja nami, añelu jaNzambi azañalalaña neyi mukwanshidi wumu yabalumuka mumuchima.”
11 Kuhiñahu, wahosheli nindi: “Iyala wumu wadiña nawanyana ayedi awamayala. 12 Mwana wakansi wamulejeli tata yindi nindi, ‘Tata, nyinkihu chibalu chayuma yinatela kutambula.’ Dichi, tata yawu wayanzañeneni yuma yindi. 13 Chimwahitili mafuku antesha, mwana weyala wakansi wapompesheli yuma yindi yejima nakuya kwituña dakwakulehi, nawa kwenoku wakisañeni oyu yuma yindi yejima muloña washakamineña chihandilu chakubajama.* 14 Chelili nakisañani dehi yuma yindi yejima, munodu ituña dejima mwaholokeli nzala yakapwelendendi nawa watachikili kukabakana. 15 Dichi wayili nakudikunda namwenimbu wumu wamunodu ituña owu wamutemesheli mumahindi nakubiña angulu.* 16 Wafwilileña chikupu kuda mafulu adiileñawu angulu,* nawa kwosi muntu niwumu wamwinkelihu yakudaku.
17 “Chatachikiliyi kutoñojoka cheñi chiwahi, wahosheli nindi, ‘Akwakukalakala atata yami amavulu akweti yakuda yayivulu nankashi, ilaña ami kunu inakufwa nanzala. 18 Nukunyamuka nakuya kudi tata yami nawa nukumuleja nami: “Tata, navulumuni kudi Nzambi mwiwulu nikudi eyi. 19 Ami hinnateleli kuntena cheñi neyi nimwaneyiku. Ñilishi niikali neyi wumu wawakwakukalakala eyi.”’ 20 Dichi wanyamukili nakuya kudi tata yindi. Henohu wuchidi hahalehi, tata yindi wamumweni nawa wamutiyilili wushona, hohenohu watemukili nakumukumbata* nikumufufwa. 21 Kuhiñahu, owu mwana weyala wamulejeli tata yindi nindi, ‘Tata, navulumuni kudi Nzambi mwiwulu nikudi eyi. Ami hinnateleli kuntena cheñi neyi nimwaneyiku.’ 22 Ilaña tata yindi walejeli anduñu jindi nindi, ‘Nyakalenu! letenu munkukumba wawuwahi nankashi mumuvwiki, nawa mumuvwiki nikazeya kumunu windi ninkwabilu kunyendu yindi. 23 Cheñi nawa, muleti mwana kañombi wanuna, mumujahi kulonda tudi nikuzañalala, 24 muloña iwu mwanami wafwili, ilaña nekali cheñi nawumi; wajimbeli, ilaña namwekani.’ Dichi wejima wawu atachikili kudiluñisha.
25 “Mwanindi wamukulumpi wadiña mwiha, chafuntileñayi nawa chashikiliyi kwakwihi netala, watiyili antu anakwimba tumina nikuhañana. 26 Dichi watambikili ñamba wumu nakumwihula kulonda yamuleji chuma chamwekeneña. 27 Owu ñamba wamulejeli nindi, ‘Mwanyikeyi diyi wunenzi nawa tata yeyi najahi mwana kañombi wanuna muloña nafunti wakola kumujimba.’* 28 Ilaña yena wahilili nawa wakaanini kwiñila mukachi. Dichi, tata yindi wedikili hanji nakutachika kumulembelela. 29 Hakwila yena wamulejeli tata yindi nindi, ‘Tiyaña! Ami nakuzatili yaaka yayivulu nawa kanda nidikañeñahu dehi nanshimbi jeyiku, ilaña kanda wunyinkeñahu dehi mwana kampembi kulonda nidiluñishi nawamabwambu jamiku. 30 Ilaña iwu mwaneyi wakisañeni* yuma yeyi nawayivumbi, chashikayi hohu wamujahila mwana kañombi wanuna.’ 31 Kuhiñahu, tata yindi wamulejeli nindi, ‘Mwanami, eyi wadiña nanami mpinji yejima, nawa yuma yami yejima yeyi. 32 Hela chochu, twatela hohu kuzañalala nikudiluñisha, muloña mwanyikeyi wafwili, ilaña nekali cheñi nawumi; wajimbeli, ilaña namwekani.’”