Matewu
17 Chimwahitili mafuku 6, Yesu wasendeli Petulu, Yakoba nimanakwindi Yowanu nakuyitwala hampidi yayilehi kwakankawawu. 2 Kwenoku mmwekenu yindi yahimpikili iku anakumonaku; kumesu indi kwatoñekeli neyi itena* nawa yakuvwala yindi yahewulu yatookeli nankashi neyi chejeji. 3 Hohenohu, amweni Mosi niElija anakuhanjeka nindi. 4 Kuhiñahu, Petulu wamulejeli Yesu nindi: “Mwanta, kunu kwakuwahi etu kushakama. Neyi wunakeñi, nukulema matenti asatu hanu hampidi, dimu deyi, dikwawu daMosi nawa dikwawu daElija.” 5 Henohu wuchidi kuhosha, kutala hikukwinza ivu ditooka dayibutili nawa atiyili izu dafumini munodu ivu nadu: “Iwu diyi Mwanami, inakeña, inatiyaña kuwaha. Mutiyililenu.” 6 Atumbanji chatiyiliwu awa mazu, adimbukili chamesu heseki nawa atiyili woma nankashi. 7 Kuhiñahu, Yesu wenjili kwadiñawu, wayikwatili nakuyila nindi: “Nyamukenu. Bayi mutiya womaku.” 8 Chabandwiliwu nyitu,* hiyamwenihu muntu mukwawuku, chiña Yesu hohu. 9 Chakunkumukileñawu kufuma hampidi, Yesu wayikonkomweneni nindi: “Kulejaku muntu chimwenu chimunamoni nehi, sampu Mwana kamuntu anamusañuli kufuma mudi afu.”
10 Hela chochu, atumbanji amwihwili nawu: “Muloñadi dinu ansoneki chahoshelañawu nawu Elija watela kwinzañahu dehi?” 11 Yesu wayakwili nindi: “Chalala Elija nakwinza nawa wakafuntisha yuma yejima neyi chochiyadiña. 12 Dichi, inakuyileja nami Elija wenza dehi, ilaña akañenyi kumwiluka nawa amukoñeli mwejima mwakeñeliwu kumukoña. Mwana kamuntu niyena dichi chakamuyandishawu.” 13 Hohenohu atumbanji elukili nawu nakutena Yowanu Mupapatishi.
14 Chashikiliwu kwadiña izaza dawantu, iyala wumu wenjili kudi yena nakumufukamina, nakuhosha nindi: 15 “Mwanta, mutiyili mwanami weyala luwi, muloña wukweti chinkonya nawa nakati nankashi. Neyi chinamuwani, wavula kudimbukila mukesi nimumenji. 16 Namuleta kudi atumbanji tweyi, ilaña amukañanya kumuuka.” 17 Yesu waakwili nindi: “Eyi ikiñu dabula chikuhwelelu nawa datama, nakatwalekahu kushakama naneyi kushika mpinjinyi? Nakadiwula yilwilu yeyi kushika mpinjinyi? Muletenu kunu kudi ami.” 18 Dichi Yesu wamuzuwilili ndemoni nawa wafuminimu mudi owu mwana weyala, owu mwana wakoleli hohenohu. 19 Kuhiñahu atumbanji enjili kudi Yesu kumbadi nakumwihula nawu: “Muloñadi chitwakañenya kufumisha ona ndemoni?” 20 Yena wayakwili nindi: “Muloña wachikuhwelelu chenu chantesha. Inakuyileja chalala nami, neyi mukweti chikuhwelelu chesekana naluchacha lwamositadi,* mukuleja iyi mpidi nenu, ‘Fumaku aha wuyi hana,’ yikufumahu, dichi kwosi chuma nichimu chimukukañanyaku.” 21 ——
22 Hampinji yapompeliyi Yesu hamu nawatumbanji twindi muÑaliliya, wayilili nindi: “Mwana kamuntu akumuhana* mumakasa awantu 23 nawa wena akumujaha, hefuku damuchisatu akamusañula.” Dichi atumbanji aneñeli nankashi.
24 Chashikiliwu muKaperinamu, amayala atambwileña mali amadirakima ayedi amusonku, enjili kudi Petulu nakumwihula nawu: “Komana ntañishi yenu hahanaña nyisonkuku?” 25 Yena wayakwili nindi: “Eña.” Hela chochu, Petulu cheñililiyi mwitala, Yesu diyi wasambililihu kumuhoshesha nindi: “Wukuhoshahu neyidi, Shimona? Komana anyanta ahanu hamaseki atambulaña nyilambu hela nyisonku kudanyi? Kudi anyanawu tahindi kudi antu acheñi?” 26 Chakwiliyi nindi: “Kudi antu acheñi,” Yesu wamwilili nindi: “Dikwila nawu anyana hiyatela kuhana nyisonkuku. 27 Dichi hakwila nawu tubuli kuyihukesha, yaku kukaluñalwiji, wuumbili ilowa hamenji nawa wunoni inshi iwukusambila kulowa wumwenzununi mukanwa, wukuwanamu iwayawaya dasiliva.* Wudisendi odu iwayawaya wuyinki, kulonda wufweti musonku wami niweyi.”