Matewu

20 “Muloña Wanta wamwiwulu wudi neyi mwini itala wamenekeli budidi nakukeña akwakukalakala mwitempa dindi danyivinyu. 2 Chelili natiyañani dehi nawakwakukalakala nindi wukuyifweta denari yimu-yimu hefuku, wayitemesheli kuya mwitempa dindi danyivinyu. 3 Chayiliyi cheñi kwakwihi naora yamuchisatu,* wamweni cheñi antu amakwawu anemani hachisankanu chakadi nyidimu yinakuzatawu; 4 niwena wayilejeli nindi, ‘Ninenu nawa yenu mwitempa danyivinyu, nukuyifweta wufwetu washikila.’ 5 Dichi ayili. Cheñi wayili kwakwihi naora yamu 6* nihaora yamu 9* nawa welili mwomumu. 6 Nkumininaku, kwakwihi naora yamu 11,* wayili cheñi nawa wawanini antu amakwawu anemajali, wayihwili nindi, ‘Muloñadi chimunemeni hanu ifuku damukuma chakadi nyidimu yimunakuzata?’ 7 Wena amwakwili nawu, ‘Muloña kwosi muntu wunatwiñiji nyidimu.’ Yena wayilili nindi, ‘Ninenu nawa yenu mwitempa danyivinyu.’

8 “Chikwelili melela, mwini itempa walejeli kapitawu kindi nindi, ‘Tambikaku akwakukalakala kulonda wuyinki wufwetu wawu, wutachiki nawantu akuminaku nawa wukumishiku nawantu asambila.’ 9 Akwakukalakala atachikili kuzata haora yamu 11 chenjiliwu, wayifweteli denari yimu-yimu wejima wawu. 10 Chenjili akwakukalakala asambililiku, atoñojokeli nawu akutambula wufwetu weneni, ilaña niwena ayifweteli denari yimu-yimu. 11 Chatambwiliwu nfwetu yawu, atachikili kumutoobela mwini itala 12 nawu, ‘Awa antu akuminaku anazati hohu ora yimu; ilaña wunayifweti wufwetu wowumu nanetu tunazati ifuku damukuma nakuha nankanza!’ 13 Ilaña yena walejeli wumu hakachi kawu nindi, ‘Eyi mukwetu, ami naluwañeshi wanyi. Komana hitwatiyañana kukwinka denari yimuku? 14 Tambulaku denari yeyi wuyeña. Inakukeña kufweta awa akuminaku neyi chinnakufweti eyi. 15 Komana hinikweti wuswa wakwila chuma chinnakukeña nayuma yamiku? Indi kwiji wunatiyi ichima* muloña wakwila nayilili* chuma chachiwahi?’ 16 Dichi, antu anakuminiku akekala akusambila nawa antu anasambiliku akekala akukuminina.”

17 Chayileñawu kuYerusalema, Yesu watambikili atumbanji 12 kwakankawawu hampinji yayileñawu munjila nakuyileja nindi: 18 “Tiyenu! Tunakukanduka nakuya kuYerusalema nawa Mwana kamuntu akumuhana mumakasa awakulumpi jawatupristu niansoneki. Dichi wena akumusompeshela kukufwa 19 nawa akumuhana kudi antu akunyuza kulonda amusupishi nakumuvupola nikumujahila hamutondu; hefuku damuchisatu akamusañula.”

20 Dichi ñoda Zebedewu wenjili nawanyanindi awamayala kudi Yesu nakudifukula* nakumulomba chuma chakeñeleñayi. 21 Yena wamwihwili nindi: “Wunakukeña chumanyi?” Iwu mumbanda wamwakwili nindi: “Inakulomba nami awa anyanami ayedi awamayala yiteji akashakami naneyi muWanta weyi, wumu kuchikasa cheyi chachidiilu, mukwawu nawa kuchikasa cheyi chachimunswa.” 22 Yesu wayakwili nindi: “Muneluki wanyi chuma chimunakulomba. Komana mukutwesha kunwa kaapu kinnakukeña* kunwa ami?” Wena amwakwili nawu: “Tukutwesha.” 23 Yena wayilejeli nindi: “Mwamweni mukutwesha kunwa kaapu kami,* ilaña kushakama kuchikasa chami chachidiilu nikuchikasa chami chachimunswa hiyami watela kuhanaku, ilaña chambala chanowu aloñeshelawu dehi kudi Tata yami.”

24 Chelili akwawu atumbanji 10 atiyi chumichi, ayihililili owu akansi namukulumpi. 25 Ilaña Yesu wayitambikili kwinza kudi yena nakuyileja nindi: “Enu mweluka nenu anyuuli anyuza ekalaña nawuswa hadi antu jawu, nawa anlomboli niwena ekalaña nawuswa hadi antu jawu. 26 Ilaña enu bayi mwilaña mwenimuku; dichi muntu wejima wunakukeña kwikala muneni hakachi kenu, watela kwikala mukwakuyikalakela, 27 nawa muntu wejima wunakukeña kwikala watachi hakachi kenu, watela kwikala nduñu yenu. 28 Neyi chenjiliyi Mwana kamuntu, henjili nindi amukalakeliku, ilaña wenjili kulonda yakalakeli antu nikuhana wumi windi kwikala ifutu danyiloña dakukuula nachu antu amavulu.”

29 Chafumineñawu muYeriku, izaza deneni dawantu damulondeleli. 30 Kutala, amayala ayedi amputamesu anashakami kunsa yanjila. Chatiyiliwu nawu Yesu diyi wunakuhita, abileleli nawu: “Mwanta, Mwana kaDavidi, tutiyili luwi!” 31 Hakwila izaza dawantu dayizuwilili owu amputamesu nakuyileja nawu amwenihu; ilaña wena aswejeli kubilela nawu: “Mwanta, Mwana kaDavidi, tutiyili luwi!” 32 Dichi Yesu wemeni nawa wayitambikili nakuyihula nindi: “Munakukeña niyilili chumanyi?” 33 Wena amwakwili nawu: “Mwanta, tutoneshi mesu etu.” 34 Yesu wayitiyilili wushona, dichi wakwatili hamesu awu, hohenohu atachikili kumona nawa amulondeleli.