Matewu
16 Kwenoku aFwarisi nawaSadusi enjili kudi Yesu nawa hakumweseka, amulejeli nawu yayimwekesheli chinjikijilu chakufuma mwiwulu. 2 Yena wayakwili nindi: “Neyi kuneli dehi melela, mwahoshaña nenu, ‘Kumadiki mwakacha chiwahi, muloña iwulu dinachinani,’ 3 nawa nantetemena mwahoshaña nenu, ‘Lelu kukwikala chishika nimuzowa, muloña iwulu dineli mavu nankashi nawa dinachinani.’ Mweluka chakulumbulula chamwekanaña iwulu, ilaña yinjikijilu yampinji yinu mwakañanyaña kuyilumbulula. 4 Ikiñu datama nawa dabula kushinshika dakeñaña kumona chinjikijilu, ilaña kwosi chinjikijilu chakadimwekeshelawuku, chiña chinjikijilu chaYona hohu.” Chamanishiliyi kuhosha mwenimu, wayishiyili.
5 Dichi atumbanji azambukili nakuya mwishinadi, ilaña avulameneniku kusenda mankendi. 6 Yesu wayilili nindi: “Tonenuña nawa babalenu neluñi dawaFwarisi nawaSadusi.” 7 Atachikili kuhanjeka mulwawu nawu: “Hitwasendahu nidinkendiku.” 8 Yesu chelukiliyi chumichi, wayihwili nindi: “Enu mukweti chikuhwelelu chantesha, muloñadi chimunakuhoshela nenu himukweti mankendiku? 9 Enu komana nihanu kanda mwiluki, himunakwanuka mankendi atanu adiiliwu antu 5,000 nikuvula kwayimpaya yimwasendeliku?* 10 Hela ana mankendi 7 adiiliwu kudi antu 4,000, yimpaya yiñahi yimwasendeli?* 11 Muloñadi chimunabulili kwiluka nenu hinayilejaña hamankendiku? Dichi babalenu neluñi dawaFwarisi nawaSadusi.” 12 Hohenohu elukili nawu Yesu nakuyileja nindi ababali nantañishilu yawaFwarisi nawaSadusi, bayi neluñi damankendiku.
13 Chashikiliyi mumusumba waKesareya Fwilipi, Yesu wayihwili atumbanji twindi nindi: “Indi antu ahoshaña nawu Mwana kamuntu hinyi?” 14 Wena amwakwili nawu: “Antu amu ahoshaña nawu Yowanu Mupapatishi, amakwawu nawu Elija, amakwawu niwena nawu Yeremiya hela nawu wumu wahadi atuprofwetu.” 15 Dichi yena wayihwili atumbanji nindi: “Indi enu mwahoshaña nenu yaminyi?” 16 Shimona Petulu wamwakwili nindi: “Yeyi Kristu, Mwana kaNzambi wamumi.” 17 Yesu wamwilili nindi: “Wunakooleki eyi Shimona mwana kaYona, muloña muntu hidiyi wunakumwekesheli ichi chumaku, ilaña Tata yami wekala mwiwulu diyi wunakumwekeshelichu. 18 Cheñi nawa, inakukuleja nami: Yeyi Petulu nawa hanidi ilola nakatuñilahu chipompelu chami nawa yiisu yaMajamu* hiyikatwesha kuchishindaku. 19 Nakakwinka nsapi jaWanta* wamwiwulu, dichi chuma chejima chiwakakasa hanu hamaseki, chakekala achikasa dehi mwiwulu nawa chuma chejima chiwakakasununa hanu hamaseki, chakekala achikasununa dehi mwiwulu.” 20 Kuhiñahu wayikonkomweneni chikupu atumbanji nindi bayi alejaku muntu niwumu nawu diyi Kristuku.
21 Kufuma hanoyu mpinji, Yesu watachikili kuleja atumbanji twindi nindi watela kuya kuYerusalema nakumukabisha chikupu kudi akulumpi niakulumpi jawatupristu niansoneki nikumujaha nawa hefuku damuchisatu akamusañula. 22 Dichi haniyi mpinji, Petulu wamutwalili hambadi nawa watachikili kumuhosha nindi: “Mwanta bayi wuhosha chuma chamuchidiwuku; iyi yuma hiyakakumwekena hela hantiku.” 23 Ilaña chabalumukiliyi, wamwilili Petulu nindi: “Eyi Satana, hitaku kunyima yami! Eyi wudi chuma chakunhukesha, muloña eyi watoñojokaña yitoñojoka yawantu bayi yitoñojoka yaNzambiku.”
24 Kuhiñahu, Yesu wayilejeli atumbanji twindi nindi: “Neyi muntu nakukeña kunlondela, yadibondi yomweni nakusenda mutondu windi wakuyandishila* nawa yatwalekihu kunlondela. 25 Muloña muntu wejima wunakukeña kwamwina wumi windi, wakawujimbesha, hakwila muntu wejima wukujimbesha wumi windi kukoola ami, wakekala nawumi cheñi. 26 Kuhosha hohu chalala, chumanyi chikuwaninamu muntu neyi yaheta kaayi kejima ilaña yajimbesha wumi windi? Hela chumanyi chinateli kuhimpayi muntu nawumi windi? 27 Muloña Mwana kamuntu wakenza mukulema kwaTata yindi hamu nawañelu jindi nawa wakafweta muntu-himuntu kwesekeja nayilwilu yindi. 28 Inakuyileja chalala nami, hakachi kanawa antu anemani hanu, hadi amu akabula kufwa sampu asambila kumona Mwana kamuntu nakwinza muWanta windi.”