Luka

8 Chihahitili kapinji kantesha, wayili kumusumba nimusumba nikumukala nimukala, nakushimwina nsañu yayiwahi yaWanta waNzambi. Nawa wadiña hamu nawapostolu 12, 2 niambanda amakwawu afumishiliwu andemoni nikuyuuka yikatu: Mariya ateneneñawu nawu Mandaleni, owu afumishiliwu andemoni 7; 3 Yowana ñoda Chuza, iyala wadiña kapitawu mwitala daHerodi; Suzana; niambanda amakwawu amavulu adiña nakuzatisha yuma yawu hakuyikalakela.

4 Chelili izaza deneni dawantu dinapompi dehi hamu nanowu antu ayili kudi Yesu afumini kumusumba nimusumba, wahosheli nawu nayakutalilahu nindi: 5 “Mukwakukuwa wayili nakukuwa mbutu yindi. Chakuwileñayi, mbutu jimu jaholokeleli kunsa yanjila nawa ajidatoleli, kuhiñahu atuda amuluzwizu ajidiili. 6 Mbutu jikwawu jaholokeleli hamalola nawa chijameneni, jomini muloña hijadiña namenjiku. 7 Mbutu jikwawu jaholokeleli munyiña, nyiña yakulilileña hamu nanoju mbutu yakañesheli oju mbutu kukula. 8 Ilaña mbutu jikwawu jaholokeleli hamaseki amawahi nawa chijameneni, jasoñeli nyikabu 100.” Chahosheleñayi yumiyi, wabidikili nindi: “Dichi muntu wukweti matu akutiya, yatiyi.”

9 Dichi atumbanji twindi amwihwili mwatalishili ichi chakutalilahu. 10 Yena wayilejeli nindi: “Enu anayinki kashinshi kakwiluka yuma yajila yakujinda yaWanta waNzambi, ilaña antu amakwawu ayilejaña nayakutalilahu, kutala atalaña, ilaña hiyamonañaku, kutiya atiyaña, ilaña hiyelukaña muchatalishaku. 11 Imu dimwatalisha ichi chakutalilahu: Mbutu hiizu daNzambi. 12 Mbutu jaholokeleli kunsa yanjila, diwu antu atiyaña mazu, ilaña Diyabolu wenzaña nakufumishamu owu mazu munyichima yawu kulonda abuli kukuhwelela hakwila nawu ayamwini. 13 Mbutu jaholokeleli hamalola, diwu antu elaña chatiyawu mazu, ayitambwilaña namuzañalu, ilaña hiyekalaña nanyijiku. Akuhwelelaña hohu hakapinji kantesha, chamonawu lukadi, ashikenaña dakuleka kukuhwelela. 14 Hakwila mbutu jaholokeleli munyiña, diwu antu atiyaña mazu, ilaña hamuloña wakwakama kwanshakaminu, maheta niyuma yawumi wunu yakuzañalesha, jakañeshaña chikupu mazu nawa alekaña kusoña nyikabu. 15 Ilaña mbutu jaholokeleli hamaseki amawahi, diwu antu elaña chatiyawu mazu namuchima wawuwahi, ayihembaña nawa asoñaña nyikabu nakuumika.

16 “Kwosi muntu welaña chabutulayi inoñu hakudibutila mwibañu hela kuditenteka mwishina dakadidiku, ilaña waditentekaña hatentekañawu inoñu kulonda antu anakwiñila mukapeka amoni chejeji. 17 Muloña kwosi chuma chaswama chikabula kumonawuku, hela chuma chaswekawu chikupu chikabula kwilukawu nikuchimwekesha hatookaku. 18 Dichi, shenuñaku kashinshi nanochu chimwatiyililaña, muloña muntu wejima wukweti akamwinkelahu jikwawu, ilaña muntu wejima wunabuli, nichuma chatoñojokañayi nindi wukweti, akamutambulachu.”

19 Mama yindi nianakwindi enjili kudi yena, ilaña akañenyi kushika kwakwihi nayena muloña wezaza dawantu. 20 Dichi amulejeli Yesu nawu: “Mama yeyi nianakweyi anemani hanji, anakukeña kukumona.” 21 Yena wayakwili nindi: “Mama yami nianakwami diwu awa atiyaña izu daNzambi nikwilamu.”

22 Ifuku dimu, yena niatumbanji twindi akandamini muwatu nawa wayilejeli nindi: “Tuzambukilenu kwishinadi dejiya.” Hohenohu atachikili kuya. 23 Ilaña chayileñawu, Yesu wakaamini mutulu. Dichi kwenjili mpepela yeneni hejiya nawa watu watachikili kwinzala namenji nawa wakeñeleña kujiya. 24 Hohenohu ayili nakumuhindwisha nakuhosha nawu: “Ntañishi, Ntañishi, keña tufwi!” Yena chachitiyiliyi, wahindukili nakuzuwila mpepela nimenji adiña nakubwankañila, dichi alekeli nawa hawundili chikupu. 25 Kuhiñahu, wayihwili nindi: “Indi chikuhwelelu chenu chidi kudihi?” Ilaña atiyili woma nankashi nikuhayama nawa ahanjekeleña mulwawu nawu: “Indi iwu muntu hinyi walejaña nimpepela nimenji nawa jamwovwahilaña?”

26 Dichi, ashikili kuchikumu chamwiluña dawaGerasa, chatalañana naÑaliliya. 27 Yesu chafuminiyi muwatu, wadibulakeni neyala wadiña nawandemoni wafumineña mumusumba. Hayaaka yayivulu, iwu iyala havwalileña yakuvwala hela kushakama mwitalaku, ilaña washakamineña kumajamu.* 28 Iwu iyala chamumweniyi Yesu, wakalukili nakudibuka heseki kumesu indi, nakubidika nezu datiyakana nindi: “Yesu, Mwana kaNzambi Mukwakubadika Chikupu, chumanyi chiwunakukeña kudi ami? Nakulembeleli bayi wunkabishaku.” 29 (Muloña Yesu walejeleña ndemoni nindi yafumi mudi owu iyala. Mpinji nimpinji,* iwu ndemoni wamukabishileña nawa iwu iyala kakavulu amuhatileña mumpompa nikumukasa maleñi hakumuhemba, ilaña wajiketolileña nawa ndemoni wamutwalileña kumaluña kwakankawindi.) 30 Yesu wamwihwili nindi: “Ijina deyi yeyinyi?” Yena wamwakwili nindi: “Yami Izaza,”* muloña andemoni amavulu eñilili mudi yena. 31 Nawa andemoni atwalekelihu nakumulembelela nawu yabuli kuyila ayi mwikela. 32 Dichi kwenoku kwadiña mukanka weneni wawangulu* adiileña hampidi, owu andemoni amulembeleli Yesu nawu yayiteji eñili mudi owu angulu* nawa wayitejeli. 33 Hohenohu andemoni afumini mudi owu iyala nakwiñila mudi angulu,* dichi mukanka wejima watakumukilili kuchikumu kwakunkumuka nankashi nimwijiya chu-u nawa afwili. 34 Ilaña atubiña chamweniwu chuma chamwekeni, atemukili nakuya nakushimuna mumusumba nimumaluña amukamwihi.

35 Kuhiñahu, antu ayili nakutala chuma chamwekeni. Enjili kudi Yesu nawa awanini owu iyala afumishiliwu andemoni nashakami kunyendu yaYesu navwali chachiwahi nawa nakoli, owu antu atiyili woma nankashi. 36 Antu amweni chuma chamwekeni alejeliku akwawu chamuukiliwu iyala wadiña nawandemoni. 37 Antu amavulu afumini mwiluña dejima dawaGerasa, amwilili Yesu nawu yafumi munodu iluña, muloña woma wayikwatili nankashi. Dichi, wakandamini muwatu nakuya. 38 Hela chochu, owu iyala afumishiliwu andemoni watwalekelihu nakumulembelela Yesu nindi yayi nindi, ilaña yena wamufuntishilimu nakumwila nindi: 39 “Funtaku kwitala, wushimuni yuma yinakukoñeliyi Nzambi.” Hohenohu, wayili nakushimwina mumusumba wejima yuma yamwilililiwu kudi Yesu.

40 Yesu chafuntiliyi, izaza dawantu damutambwilili chiwahi, muloña wejima wawu adiña nakumutalila. 41 Hohenohu, kwenjili iyala wejina daJayirusa; iwu iyala wadiña ntwamina wasinagogi. Wadinatili kunyendu yaYesu nawa watachikili kumulembelela nindi yayi kwitala dindi, 42 muloña mwanindi wamumbanda wumu hohu* wadiña nayaaka 12, wadiña kwakwihi nakufwa.

Yesu chayileñayi, mazaza awantu amuwuñileña. 43 Hadiña nimumbanda wadiña namusoñu wakupweka mashi hadi yaaka 12 nawa kwosi muntu watwesheli kumuukaku. 44 Iwu mumbanda wenjilili kunyima yindi nakukwata kunzombu yachakuvwala chindi chahewulu, hohenohu mashi apwekeleña alekeli. 45 Dichi Yesu wahosheli nindi: “Hinyi wunankwati?” Wejima wawu chakaaniniwu, Petulu wahosheli nindi: “Ntañishi, mazaza awantu anakunyeñumuki nikukuwuña.” 46 Ilaña Yesu wahosheli nindi: “Kudi muntu wankwata, muloña natiyi ñovu yinanfumi.” 47 Owu mumbanda chelukiliyi nindi anamwiluki, wenjili iku nakuzaala nakudibuka heseki kudi Yesu nakushimuna kudi antu hatooka chuma chamuletesheli yamukwati nichashikeneniwu kumuuka. 48 Ilaña wamulejeli owu mumbanda nindi: “Mwanami, chikuhwelelu cheyi chinakukoleshi. Yaña mukuwunda.”

49 Iku wuchidi kuhosha, kwenjili iyala wafumini kudi ntwamina wasinagogi nakumuleja nindi: “Mwaneyi wamumbanda nafwi dehi; bayi wumukabisha Ntañishiku.” 50 Yesu chachitiyiliyi, wamulejeli nindi: “Bayi wutiya womaku, ikalaku hohu nachikuhwelelu, mwaneyi wukuhanda.” 51 Chashikiliyi kwitala, Yesu hetejeli antu amakwawu kwiñila nindi mukachiku, chiña hohu Petulu, Yowanu, Yakoba nitata yanowu mwana wamumbanda nimama yindi. 52 Ilaña antu ejima adiña nakudila nikuneña muloña waniwu mwana wamumbanda wafwili. Dichi yena wayilili nindi: “Lekenu kudila, muloña nafwi wanyi, wudi mutulu. 53 Chatiyiliwu awa mazu, atachikili kumuseha nakumusupisha, muloña wena elukili nawu nafwi.” 54 Ilaña yena wamukwatili kuchikasa owu mwana wamumbanda nakumutambika nindi: “Eyi mwanami, hindukaku!” 55 Wekalili cheñi nawumi nawa hohenohu washikeneni dakuhinduka, kuhiñahu Yesu wayilejeli nindi amwinki owu mwana yakuda yadi. 56 Anvwali jindi azañaleli nankashi, ilaña yena wayilejeli nindi bayi alejaku muntu hela wumu chuma chamwekeniku.