Kwidika

26 “Wakatuñi tabanaka+ namahina 10 ehina dawanda wakushinta chiwahi, dawanda wabulu, wawusombu niwuchinana nge-e. Hanawa mahina wakachiminihu+ akerubi.+ 2 Ihina dejima dakwitenti dakekali mukuleha makyubiti* 28 nawa muwihi makyubiti awana. Mahina ejima akwitenti akekali esekana.+ 3 Mahina atanu akwitenti wakayinuñi hamu akekali ihina dimu deneni nawa mahina amakwawu atanu akwitenti wakayinuñi hamu akekali ihina dimu deneni. 4 Kunsa janawa mahina ejima amaneni akwitenti, wakashiku maswa awanda wabulu nawa dichiwakela nikunsa yikwawu yehina dakwitenti dakunsa heluña hiwakayinuñila hamu. 5 Wakashiku maswa 50 kwihina dimu dakwitenti nawa kunsa yehina dikwawu dakwitenti nikwena wakashiku maswa 50 kulonda akaditalashani dimu nadikwawu kwakadinuñilawu. 6 Wakachili nkobu 50 jawuru, wakanuñi mahina akwitenti hamu kuzatisha iyi nkobu nawa tabanaka yakekala yimu.+

7 “Wakatuñi nimahina amavuji ampembi+ akubuta hatabanaka. Wakatuñi mahina 11 akwitenti.+ 8 Ihina dejima dakwitenti dakekali mukuleha makyubiti 30 nawa muwihi makyubiti awana. Mahina ejima 11 akwitenti akekali esekana. 9 Wakanuñi hamu mahina atanu akwitenti, mahina amakwawu 6 akwitenti niwena wakayinuñi hamu nawa ihina damu 6 dakwitenti wakadivuñi kumbidi yetenti. 10 Nawa wakashiku maswa 50 kunsa yehina dimu dakwitenti, dikwila nawu kwihina dakunsa nawa kunsa yehina dikwawu nikwena wakashiku maswa 50 heluña dikwawu hadinuñilawu. 11 Wakachili nkobu 50 jawuneñu nawa wakajikobeki mumaswa kulonda wakanuñi itenti hamu nawa dakekala dimu. 12 Chibeli chakasompoka kumahina akwitenti dichakazenzumuka. Chibalu chachibeli chakasompoka dichakazenzumukila kunyima yatabanaka. 13 Chibeli chachilehi chakasompoka kumahina, chakekala chakuzenzumwina kutabanaka, kukabadi kamu kyubiti yimu, kukabadi kakwawu kyubiti yimu kulonda tabanaka akayibuti.

14 “Wakatuñi nichakujika hetenti chakutuña nayitembi yanyikoku yayizamba yakuloomba wulombu wuchinana nichakujikahu chakutuña nayitembi yamayobu.*+

15 “Wakasoñi mafuremu+ amutondu wamuzenzi akwimika kutabanaka.+ 16 Furemu-hifuremu yakalehi makyubiti 10 mukuleha kwiwulu nawa muwihi kyubiti yimu nachikunku. 17 Furemu-hifuremu yakekali nanyishiki yiyedi yinanuñiliwu hamu. Ichi dichiwatela kutuña mafuremu ejima akutabanaka. 18 Kukabadi kakukabeta kakuchidiilu katabanaka, wakasoñeliku mafuremu 20 akatalisha kukabeta kakuchidiilu.

19 “Wakatuñi mayanda+ asiliva 40 akusha kwishina damafuremu 20: kwishina dafuremu yimu kwakekali mayanda ayedi mwakusha nyishiki yayu yiyedi nawa kwishina damafuremu amakwawu akalondelahu kwakekali mayanda ayedi-ayedi mwakusha nyishiki yayu yiyedi.+ 20 Kukabadi kakwawu katabanaka, kukabeta kakuchimunswa, wakasoñeliku mafuremu 20, 21 nawa akekali namayanda awu asiliva 40, kwishina dafuremu yimu kwakekali mayanda ayedi nawa kwishina damafuremu amakwawu akalondelahu kwakekali mayanda ayedi-ayedi. 22 Kunyima yatabanaka kumujika, wakasoñeliku mafuremu 6.+ 23 Wakasoñeliku mafuremu ayedi kulonda akekali yishimi yamumawombu ayedi akunyima yatabanaka. 24 Atela kwikala ayedi akubomba hamu kufuma kwishina nakushika kwiwulu, ndo-o nikukazeya katachi. Ichi dichiwatela kuyila yejima yiyedi nawa yakekala yishimi yiyedi yamumawombu. 25 Nawa kwakekali mafuremu 8 nimayanda awu asiliva 16, kwishina dafuremu yimu kwakekali mayanda ayedi nawa kwishina damafuremu amakwawu akalondelahu kwakekali mayanda ayedi-ayedi.

26 “Wakapuli nkañalu jamutondu wamuzenzi, jitanu jakekali jakumafuremu akukabadi kamu katabanaka,+ 27 nawa nkañalu jitanu jakekali jakumafuremu akukabadi kakwawu katabanaka, nawa nkañalu jikwawu jitanu jakekali jakumafuremu akutabanaka kunyima kumujika. 28 Nkañalu yahakachi yakahita hakachi kamafuremu, yatela kufuma kunsa yimu nakushika kunsa yikwawu.

29 “Mafuremu wakayilambwiji wuru+ nawa wakachili tuzeya twawu twawuru twakukwatisha nachu nkañalu, nawa nkañalu wakayilambwiji wuru. 30 Wakatuñi tabanaka kwesekeja nanjila yakuyituñilamu yakulejeliwu* kumpidi.+

31 “Wakatuñi ihina dakujika nachu+ nawanda wabulu, wawusombu, wuchinana nge-e ninehina dawanda wakushinta chiwahi. Hanidi ihina wakachiminihu akerubi. 32 Wakakudiki idi ihina hayishimi yiwana yamutondu wamuzenzi yakulambwija wuru. Nkobu jayu jakekali jawuru. Yishimi wakayishi mumayanda awana asiliva. 33 Wakakobeki kunkobu ihina dakujika nachu nawa wakaleti chimbañu chaWunsahu+ mwihina dakujika nachu. Ihina dakujika nachu dakaambula Mwajila+ naMwajila Chikupu.+ 34 Wakashi chijiku hachimbañu chaWunsahu chakekala Mwajila Chikupu.

35 “Wakashi mesa hanji yehina dakujika nachu nawa iyi mesa yakaditalashani nachakutentekahu manoñu+ chakekala kukabeta katabanaka kakuchidiilu; nawa mesa wakayishi kukabadi kakukabeta kakuchimunswa. 36 Kuwiñililu wakwitenti wakatuñiliku ihina dakwaambula nachu,* wakadituñi nawanda wabulu, wawusombu, wuchinana nge-e ninehina dawanda wakushinta chiwahi, wakupikula.+ 37 Wakasoñi yishimi yamuzenzi yakukobekaku ihina dakwaambula nachu* nawa wakayilambwiji wuru. Nkobu jayu jakekali jawuru nawa wakatuñi mayanda atanu awuneñu akuyishamu.