Kwidika
2 Hayina mpinji, iyala wumu wamwitala daLevi wasumbwili mwana kaLevi wamumbanda.+ 2 Nawa iwu mumbanda wemitili nakuvwala mwana weyala. Chamweniyi nindi iwu mwana wadiña walubanji, wamuswekeli hadi tukweji tusatu.+ 3 Chakañenyiyi kutwalekahu kumusweka,+ wasendeli chimpaaya* chakutuña nanyilela nawa wachilambwijili manenekela niwupombu nakumushamu iwu mwana nawa wachishili mukachi kamateti kuchikumu chaKaloña Nile. 4 Ilaña muhelindi+ wemeneni hahalehi kulonda yamoni chuma chikumumwekena iwu mwana.
5 Mwana kaFwaru wamumbanda chenjiliyi nakuwela muNile, niakakumukalakela awambanda ahitañeneña kunsa yaNile. Dichi wamweni chimpaaya* mukachi kamateti. Hohenohu walejeli nduñu yindi wamumbanda kuya nakuchinona.+ 6 Chajikwilimu, wamweni mwana nawa iwu kansi weyala wadiña nakudila. Wamutiyilili wushona, ilaña wahosheli nindi: “Iwu himwana kawaHeberu.” 7 Muhela aniwu mwana wamulejeli mwana kaFwaru wamumbanda nindi: “Niyi nakatambiki nleli wamumbanda kaHeberu kulonda akuleleliku iwu mwana tahindi?” 8 Mwana kaFwaru wamulejeli nindi: “Yaña!” Hohenohu iwu kansi wamumbanda wayili nakutambika mama yaniwu mwana.+ 9 Mwana kaFwaru wamulejeli nindi: “Sendaku iwu mwana wakanleleliyi nawa nakakufweta.” Dichi iwu mumbanda wamusendeli iwu mwana nawa wayili nakumulela. 10 Iwu mwana chakuliliyi, wamuleteli kudi mwana kaFwaru wamumbanda nawa wekalili mwanindi.+ Wamutuumbili nindi Mosi* nawa wahosheli nindi: “Muloña namuzambuli mumenji.”+
11 Munowu mafuku, chelili Mosi nakuli dehi,* wayili kudi amanakwindi nakutala chayikabishileñawu nanyidimu yakola+ nawa wamweni manakwindi kaHeberu anakumweta kudi mwini Ejipitu. 12 Dichi watalili iku niniku, chamweniyi nindi kwosi muntu hela wumu, wamujahili mwini Ejipitu nawa wamuswekeli muwusekulula.+
13 Ilaña hefuku dalondelelihu, wayiliku cheñi nawa wawanini amayala aHeberu ayedi anakuzuña. Dichi wamwihwili owu waluwañesheli nindi: “Wunakumweteladi mukwenu?”+ 14 Hohenohu niyena wamwihwili nindi: “Hinyi wunakutondi kwikala kalamba nawa nsompeshi yetu? Wunakukeña wunjahi neyi chiwajaha ona mwini Ejipitu tahindi?”+ Dichi Mosi watiyili woma nakudihoshesha nindi: “Chalala iyi nsañu anayiluki!”
15 Kuhiñahu, Fwaru watiyili iyi nsañu nawa wakeñeli kumujaha Mosi; ilaña Mosi wamutemukili Fwaru nakuya nakushakama mwituña daMidiyani.+ Chashikiliyi kwenoku, wanookeleli kwishima. 16 Dichi kapristu wakuMidiyani+ wadiña nawanyana awambanda 7 nawa ayili nakutehuna menji kulonda enzeshi mumazawu menji akwinka mukanka wayimuna yatata yawu. 17 Ilaña neyi chochichadiña mpinji yejima, atubiña enjili nakuhaña awa ambanda niyimuna yawu. Hohenohu Mosi wanyamukili nakuyikwasha* awa ambanda nawa wenkeli menji mukanka wayimuna yawu. 18 Chafuntiliwu kwitala kudi tata yawu Ruweli,*+ wayihwili nindi: “Dalelu munafuntilidi swayi hetala?” 19 Wena aakwili nawu: “Mwini Ejipitu wumu+ watupulwisha kudi atubiña nawa watutahila menji nikunwisha mukanka wayimuna.” 20 Wayihwili anyanindi awambanda nindi: “Owu muntu wudi kudihi? Muloñadi chimunamushiyili owu iyala? Kamutambikenu kulonda adiili hamu nanetu.” 21 Kuhiñahu, Mosi wetejeli kushakama naniwu iyala nawa iwu iyala wamwinkeli Mosi mwanindi wamumbanda Zipora+ kulonda amusumbuli. 22 Mukuhita kwampinji, iwu mumbanda wavweli mwana weyala nawa Mosi wamutuumbili nindi Geshomu,*+ muloña wahosheli nindi, “Ami nekali ñiinza mwituña dambala.”+
23 Chimwahitili mpinji,* mwanta wakuEjipitu wafwili,+ hela chochu, aIsarela atwalekelihu kwaaba nikudishishimona muloña wawuduñu, nawa kudila kwawu kwakukeña kuyikwasha muloña wawuduñu kwashikileña kudi Nzambi walala.+ 24 Mukuhita kwampinji, Nzambi watiyili chaabileñawu+ nawa wanukili chitiyañenu chatiyañeniyi naAbarahama, Isaka niYakoba.+ 25 Dichi, Nzambi wabalumukilili kudi aIsarela nawa wamweni kukabakana kuyahitileñamu.