Kwidika
8 Kuhiñahu, Yehova wamulejeli Mosi nindi: “Iñilaku mudi Fwaru wumuleji neyi, ‘Yehova nahoshi nindi: “Yiiteji antu jami ayeña kulonda ankalakeli.+ 2 Neyi eyi wukutwalekahu kukaana kuyiteja kuya, nukuleta chipupu chayuula mwiluña deyi dejima.+ 3 Nawa Kaloña Nile wukwinzala nayuula nawa yikukanduka nakwiñila mwitala deyi, mukapeka keyi kakukaama, hakadidi keyi, mumatala awambuñeyi nihadi antu jeyi, mumaoveni* eyi nimumadehu*+ eyi mwakukandwila yikanka. 4 Yuula yikwinza hadi eyi, hadi antu jeyi nihadi ambuñeyi ejima.”’”
5 Chimwahitili mpinji, Yehova wamulejeli Mosi nindi: “Muleji Aroni neyi, ‘Nonaku mbwechi yeyi wolweli chikasa cheyi hatuloña, hanyifwolu yaNile nihamajiya kulonda wukojeji yuula yikandukili mwituña daEjipitu.’” 6 Dichi Aroni wolweleli chikasa chindi hamenji amuEjipitu nawa yuula yatachikili kukanduka nakuwanina ituña daEjipitu. 7 Hela chochu, atutepa niwena elili chuma chochimu nawaña wawu, niwena akojejeli yuula kukandukila mwituña daEjipitu.+ 8 Kuhiñahu, Fwaru watambikili aMosi naAroni nakuyila nindi: “Lembenu kudi Yehova yafumishi yuula kudi ami nikudi antu jami,+ muloña inakukeña kuyiteja antu ayi kulonda akalambuli mulambu kudi Yehova.” 9 Dichi Mosi wamulejeli Fwaru nindi: “Chidi kudi eyi kunleja mpinji yinatela kulemba kulonda yuula ayifumishi kudi eyi, ambuñeyi, antu jeyi nimumatala eyi. Yakashala hohu muKaloña Nile.” 10 Hohenohu Fwaru wahosheli nindi: “Kumadiki.” Dichi yena wahosheli nindi: “Chakekala kwesekeja nachiwunahoshi kulonda wakeluki neyi kwosi mukwawu wudi neyi Yehova Nzambi yetuku.+ 11 Yuula yakafuma kudi eyi, mumatala eyi, ambuñeyi nikudi antu jeyi. Yakashala hohu muNile.”+
12 Dichi aMosi naAroni afumini kudi Fwaru nawa Mosi walembeli kudi Yehova kutalisha hayuula yaleteliyi hadi Fwaru.+ 13 Kuhiñahu, Yehova welili kwesekeja namwalombeliyi Mosi nawa yuula yatachikili kufwa mumatala, mumalubanza nimumaha. 14 AEjipitu ayilumbikileña nyilumba-nyilumba yakukañanya kuchinda nawa mwituña mwatachikili kununka ivumba datama. 15 Fwaru chamweniyi nindi yuula yinamani, wachinchikishili muchima windi+ nawa wakaanini kuyitiyilila neyi chahosheliyi Yehova.
16 Dichi Yehova wamulejeli Mosi nindi: “Muleji Aroni neyi, ‘Ololaku mbwechi yeyi nakweta lunkuñu lwahamaseki nawa lukubalumuka mbwibu mwituña daEjipitu dejima.’” 17 Nawa elili chumichi. Aroni wolweli chikasa chindi chadiña nambwechi yindi nakweta halunkuñu lwahamaseki nawa mbwibu yenjili hadi antu nihadi anyama. Lunkuñu lwejima lwahamaseki lwabalumukili mbwibu mwituña daEjipitu dejima.+ 18 Atutepa esekeli kwila chuma chochimu kulonda aleti mbwibu nawaña wawu,+ ilaña hiyatwesheliku. Dichi mbwibu yenjili hadi antu nihadi anyama. 19 Dichi atutepa amulejeli Fwaru nawu: “Himunu waNzambi!”+ Ilaña muchima waFwaru watwalekelihu kuchinchika nawa wayitiyilili wanyi neyi chahosheliyi Yehova.
20 Kuhiñahu, Yehova wamulejeli Mosi nindi: “Wakanyamuki nantetemena nankashi nawa wakemani kumbidi yaFwaru. Tiyaña! Wakedika nakuya kumenji. Nawa wakamuleji neyi, ‘Yehova nahoshi nindi: “Yiiteji antu jami ayi kulonda ankalakeli. 21 Ilaña neyi wukubula kuyiteja antu jami kuya, nukuyitemeshela mavutula amavulu, eyi, ambuñeyi, antu jeyi nimwitala deyi nawa mumatala aEjipitu mukwinzala mavutula nawa akuwanina heseki hiyemanañawu.* 22 Hanodu ifuku, chalala nakaambulaku iluña daGosheni munakushakamawu antu jami. Munidi iluña himwakekala mavutulaku,+ nawa chumichi, dichikaletesha wakeluki neyi, ami Yehova nidi mudinu iluña.+ 23 Nawa nakaambula antu jami nawantu jeyi. Kumadiki ichi chinjikijilu chakamwekana.”’”
24 Dichi Yehova welili mwenimu nawa nyikanka yamavutula yatachikili kwiñila mwitala daFwaru, mumatala awambuñindi nimwituña daEjipitu dejima.+ Ituña dakisikili namavutula.+ 25 Nkumininaku, Fwaru watambikili aMosi naAroni nakuyileja nindi: “Yenu mwakalambuli mulambu kudi Nzambi yenu mudinu ituña.” 26 Ilaña Mosi wahosheli nindi: “Chachiwahi wanyi kwila mwenimu, muloña mulambu wutukulambula kudi Yehova Nzambi yetu wukwikala wawuzondu kudi aEjipitu.+ Neyi tukulambula mulambu wawuzondu kudi aEjipitu hamesu awu, komana hiyakutwasola malolaku? 27 Tukuya lwendu lwamafuku asatu mwisaña nawa mwenomu tukulambula mulambu kudi Yehova Nzambi yetu neyi chinatulejiyi.”+
28 Dichi Fwaru wahosheli nindi: “Nukuyiteja muyi nakulambula mulambu kudi Yehova Nzambi yenu mwisaña. Ilaña dinu, bayi muya hahalehi nankashiku. Nlembelenuku.”+ 29 Kuhiñahu, Mosi wahosheli nindi: “Ichi dinu inakufuma kudi eyi, nukuya nakulemba kudi Yehova nawa kumadiki mavutula akafuma kudi eyi Fwaru, kudi ambuñeyi nikudi antu jeyi. Hela chochu, eyi Fwaru watela kuleka kutudimba* hakubula kwiteja antu kuya nakulambula mulambu kudi Yehova.”+ 30 Kufumahu, Mosi wafumini kudi Fwaru nakuya nakulemba kudi Yehova.+ 31 Dichi Yehova welili kwesekeja namwahosheliyi Mosi nawa mavutula amwamukili Fwaru, ambuñindi niantu jindi. Kwosi ivutula nidimu dashaliliku. 32 Hela chochu, Fwaru wachinchikishili cheñi muchima windi nawa hayitejeli antu kuyaku.