Kwidika

11 Kuhiñahu, Yehova wamulejeli Mosi nindi: “Kunashali chipupu chimu chinnakuleta hadi Fwaru niEjipitu. Kufumahu dinu wukuyiteja kufuma kunu.+ Neyi nayiteji dehi kuya, chalala wukuyitemuna kunu.+ 2 Dichi lejaku antu neyi, amayala niambanda ejima alombi kudi antuñi nawu yishima yasiliva niyawuru.”+ 3 Nawa Yehova wakojejeli antu kwikala nawuselewa kumesu awaEjipitu. Kubombelahu, Mosi amulemesheli chikupu mwituña daEjipitu kudi ambuña aFwaru nikudi antu.

4 Dichi Mosi wahosheli nindi: “Yehova nahoshi nindi, ‘Kwakwihi nahakachi kawufuku nukuhitañana mukachi kaEjipitu,+ 5 nawa anyana awedi ejima mwituña daEjipitu akufwa,+ kutachikila kudi wedi waFwaru wudi hetanda dindi kushika nikudi wedi wanduñu wamumbanda wunakuzatila helola dakuhalilahu niyimuna yejima yawedi.+ 6 Mwituña daEjipitu dejima, mukwikala ikumbu dadeni dakwila kanda diikaleñaku dehi nawa hidamba kekalaku cheñiku.+ 7 Ilaña hikwakekala kawa wakabola aIsarela hela yimuna yawuku, kulonda mwakeluki nenu Yehova nateli kwaambula aEjipitu nawaIsarela.’+ 8 Nawa ambuñeyi ejima chalala akenza kudi ami nakudifukula kudi ami nakuhosha nawu, ‘Yaña, eyi niantu jeyi ejima akulondelaña.’+ Hanyima yachumichi, nakedika nakuya.” Hohenohu wedikili nakufuma kudi Fwaru iku nazuwi nankashi.

9 Kuhiñahu, Yehova wamulejeli Mosi nindi: “Fwaru wukuyitiyilila wanyi+ kulonda yihayamisha yami yivuliliku mwituña daEjipitu.”+ 10 Mosi naAroni akoñeli iyi yihayamisha yejima hamesu aFwaru,+ ilaña Yehova wetejeli muchima waFwaru kuchinchika chakwila wayitejeli wanyi aIsarela kufuma mwituña dindi.+