Isaya
2 Ichi dichuma chamweniyi Isaya mwana kaAmozi kutalisha hadi Yuda niYerusalema:+
2 Mumafuku akukuminina,
Mpidi yetala daYehova
Akayishimatisha chikupu hewulu damapidi,+
Nawa akayisompwesha kubadika tupidi,
Nawa kwenoku dikwakahwila nyuza yejima.+
3 Nawa antu amavulu ashiyashana akaya nawa akahosha nawu:
“Twayenu tukanduki kumpidi yaYehova,
Kwitala daNzambi yaYakoba.+
Yena wakatuleja njila jindi,
Nawa tukenda munjila jindi.”+
4 Wakasompa nyiloña hakachi kanyuza
Nawa wakwolola nsañu yakundama antu amavulu.
Mpoku jawu jatubali akajichila yitwa yakudima nachu
Nawa mayoña awu akayichila yitwa yakukunkula nachu.+
Muza hiwukanyamwina muza wukwawu mpoku yakabaliku,
Nawa hiyakadiza cheñi njitaku.+
5 Enu amwitala daYakoba, twayenu,
Twendenu muchejeji chaYehova.+
6 Muloña wunashiyi antu jeyi, amwitala daYakoba,+
Muloña anadiñiji nankashi muyuma yaKumusela;
Hiyatutepa+ neyi chekala aFilisitinu,
Nawa anadivulishili anyana kawañiinza.
7 Ituña dawu dinenzali nasiliva niwuru,
Nawa akweti maheta amavulu chikupu.
Ituña dawu dinenzali natuwalu,
Nawa akweti makalu amavulu nankashi.+
8 Ituña dawu dinenzali nawanzambi amukunkulwayi.+
Adibukaña kunyidimu yamakasa awu,
Kuyuma yinatuñi nyinu yawu.
9 Dichi muntu wadisawishaña, wadizozaña,
Nawa hiwukushikena kuyanakenaku.
10 Iñilenu mwilola kulonda muswami mumaseki
Muloña wakutiya woma kuzuwa kwaYehova
Niwukeleñi windi wasweja.+
11 Mesu amuntu adinkaña wanta akayikehesha,
Nawa kudivwimba kwawantu akakwizozesha.
Yehova hohu nkawindi diyi akatuumbakeshawu munodu ifuku.
12 Muloña hiifuku dambala daYehova wamazaza.+
Dinakwinza hadi muntu wejima wadivwimba niwadinyamuna,
Hadi muntu wejima, hela watuumbakana hela wadikehesha,+
13 Hadi nyitondu yejima yanyisida yakuLebanoni yayilehi nawa yatuumbakana
Nihadi nyikula yejima yamuBashani,
14 Hadi mpidi jejima jajilehi,
Nihadi tupidi twejima twanyuña,
15 Hadi kaposhi kejima kakalehi nimpwembu yejima yakola,
16 Hadi mbopolu jejima jakuTashishi+
Nihadi maatu ejima amawahi.
17 Mesu amuntu adinkaña wanta akayikehesha,
Nawa kudivwimba kwawantu akakwizozesha.
Yehova hohu nkawindi diyi akatuumbakeshawu munodu ifuku.
18 Anzambi amukunkulwayi akajimañana chikupu.+
19 Nawa antu akeñila mumayeñu amumalola
Nimumeena ahamaseki,+
Muloña wakutiya woma kuzuwa kwaYehova
Niwukeleñi windi wasweja,+
Hakanyamukayi nakuzaalisha iseki.
20 Munowu mafuku antu akanona anzambi jawu amukunkulwayi asiliva niawuru
Atuñiliwu nawu adibukeñaku
21 Kulonda eñili mumeena amumalola
Nimunyaji yamumalola,
Muloña wakutiya woma kuzuwa kwaYehova
Niwukeleñi windi wasweja,
Hakanyamukayi nakuzaalisha iseki.
22 Hakwila chiyiwahili, lekenu kukuhwelela muntu,
Wekala neyi muuya wamumazulu indi.
Muloñadi chimukumushila maana?