Kwidika
3 Mosi wekalili kabiña kamukanka wayimuna yamuku windi weyala Yetiro+ kapristu wakuMidiyani. Ifuku dimu hatwalileñayi mukanka wayimuna kukabadi kakumujika kesaña, washikili kumpidi yaHorebi+ yaNzambi walala. 2 Kuhiñahu kañelu kaYehova wamwekeni kudi yena mumuzuzu wakesi kabutukileña mukachi kachiputa chanyiña.+ Chatwalekelihu nakutalaku, wamweni ichi chiputa chanyiña chinakubutuka kesi ilaña kuha nehi. 3 Dichi Mosi wahosheli nindi: “Nukuya nitali ichi chuma chakuhayamisha kulonda niiluki chinakuleñela chiputa chanyiña kubula kuha.” 4 Yehova chamweniyi nindi nayi nakutalaku, wamutambikilili muchiputa chanyiña nindi: “Mosi! Mosi!” Yena waakwili nindi: “Yamonu mwani.” 5 Kuhiñahu wamulejeli nindi: “Bayi winza kukamwihiku. Subulaku nkwabilu kunyendu yeyi, muloña heluña hiwunemani, hiiseki dajila.”
6 Watwalekelihu kumuleja nindi: “Yami Nzambi yatata yeyi, Nzambi yaAbarahama,+ Nzambi yaIsaka+ nawa Nzambi yaYakoba.”+ Kufumahu Mosi waswekeli kumesu indi muloña watiyili woma kumutala Nzambi walala. 7 Yehova wahosheli cheñi nindi: “Chalala namoni makabi anakumonawu antu jami adi muEjipitu nawa natiyi kudila kwawu muloña wanowu anakuyikanjikija kuzata nyidimu; ami neluki chikupu makabi iyanakuhitamu.+ 8 Inakusuluka kulonda niyi nakuyipulwisha mumakasa awaEjipitu+ nikuyifumisha munidi ituña nakuyitwala mwituña dadiwahi nawa deneni, ituña dasweja mayeli niwuchi,+ dodu iluña dawaKenani, dawaHiti, dawaAmori, dawaPerizi, dawaHivi nidawaYebusi.+ 9 Tiyaña! Kudila kwawantu jaIsarela kunashiki dehi kudi ami nawa namoni nichinakuyikabishawu+ chikupu kudi aEjipitu. 10 Dichi inzaku, nukukutemesha kudi Fwaru kulonda wakafumishi antu jami aIsarela muEjipitu.”+
11 Hela chochu, Mosi wamwilili Nzambi walala nindi: “Yaminyi mwaka niyi kudi Fwaru kulonda nakafumishi aIsarela muEjipitu?” 12 Hamuloña wachumichi, Nzambi wahosheli nindi: “Ami nakekalaña naneyi+ nawa ichi dichinjikijilu chiwakelukilaku neyi yami inakutemeshi: Neyi wunafumishi dehi antu jami muEjipitu, mwakamukalakelaña* Nzambi walala haniyi mpidi.”+
13 Ilaña Mosi wamwihwili Nzambi walala nindi: “Neyi niya kudi aIsarela nakuyileja nami, ‘Nzambi yawankakulula jenu nantemeshi kudi enu,’ nawa wena añihula nawu, ‘Ijina dindi hinyi?’+ Ami nakayakula namidi?” 14 Dichi Nzambi wamulejeli nindi: “Nukwikala Mwejima Munukufuukula* Kwikala.”*+ Nawa wabombelelihu nindi: “Awa diwu mazu iwakayileja aIsarela neyi, ‘Nukwikala nantemeshi kudi enu.’”+ 15 Kuhiñahu, Nzambi wamulejeli Mosi cheñi nindi:
“Awa diwu mazu iwakayileja aIsarela neyi, ‘Yehova Nzambi yawankakulula jenu, Nzambi yaAbarahama,+ Nzambi yaIsaka+ nawa Nzambi yaYakoba+ diyi wunantemeshi kudi enu.’ Idi didu ijina dami haya nyaaka+ nawa idi didu ijina diyakañanukilañaku nachu kumakiñu ejima akalondelahu. 16 Dichi yaña wakapompeshi akulumpi jawaIsarela nakuyileja neyi, ‘Yehova Nzambi yawankakulula jenu wamwekana kudi ami, Nzambi yaAbarahama, Isaka niYakoba, nawa wahosha nindi: “Chalala nayimoni+ nawa namoni niyuma yinakuyikoñawu muEjipitu. 17 Dichi nakani nami, nukuyifumisha mumakabi+ anakuyikabishawu kudi aEjipitu nakuyitwala mwituña dawaKenani, dawaHiti, dawaAmori,+ dawaPerizi, dawaHivi nidawaYebusi,+ dodu ituña dasweja mayeli niwuchi.”’+
18 “Chalala akatiyilila mwizu deyi,+ eyi niakulumpi jawaIsarela mwakaya kudi mwanta wakuEjipitu nawa mwakamuleji nenu: ‘Yehova Nzambi yawaHeberu+ wahosha nanetu. Dichi, twiiteji tuyi halwendu lwamafuku asatu mwisaña kulonda twakalambuli mulambu kudi Yehova Nzambi yetu.’+ 19 Ilaña ami neluki chikupu nami mwanta wakuEjipitu hakayiteja enu kuyaku, chiña chikasa chañovu chimukanjikija.+ 20 Dichi nakwolola chikasa chami nakweta Ejipitu nayuma yami yakuhayamisha yejima yinakakoña munidi ituña, kufumahu dinu yakayiteji enu kuya.+ 21 Nakakojeja aEjipitu akayitiyeña kuwaha antu jami nawa chimwakafumañamu, himwakafumamu makasakasaku.+ 22 Mumbanda wejima akalombi yishima yasiliva niyawuru kushilahu niyakuvwala kudi ntuñi nindi nikudi mumbanda washakamañayi nindi mwitala dindi, nawa iyi yakuvwala mwakayivwikeña anyanenu awamayala niawambanda; nawa mwakapuupa yuma yawaEjipitu.”+