Kwidika
33 Yehova wamulejeli cheñi Mosi nindi: “Fumaku kunu, eyi hamu niantu iwafumishili mwituña daEjipitu. Yenu kwituña dinasanyikili kudi Abarahama, Isaka niYakoba nami, ‘Idi ituña nakayinkadu anyaneyi.’*+ 2 Nukutemesha kañelu hambidi yeyi+ kulonda akayitemuni aKenani, aAmori, aHiti, aPerizi, aHivi niaYebusi.+ 3 Yenu kwituña dasweja mayeli niwuchi.+ Ilaña ami nukuya nenu wanyi, muloña mudi antu achinchika nyichima,*+ hadaha nakenda kayijilumuna munjila.”+
4 Antu chatiyiliwu awa mazu akuzuwa, atachikili kudishona nawa kwosi muntu niwumu wavwalili yuma yindi yakudikudekaku. 5 Yehova wamulejeli Mosi nindi: “Yileji aIsarela neyi, ‘Mudi antu achinchika nyichima.*+ Nateli kuhitañana mukachi kenu nakuyijilumuna mukapinji kamu hohu.+ Dichi vuulenu yuma yenu yakudikudeka hinnakutoñojoka chuma chinatela kuyila.’” 6 Dichi kufuma tuhu hadiñawu aIsarela kuMpidi yaHorebi nakuya kumbidi, alekeli kuvwala* yuma yawu yakudikudeka.
7 Kuhiñahu, Mosi wanoneli itenti dindi nakudilemena hanji yachilombu hahalehi chantesha nachilombu. Idi itenti wadituumbili nindi itenti dakubulakena. Muntu wejima wakeñeleña kuhosha naYehova,+ wedikileña nakuya kunidi itenti dakubulakena dadiña hanji yachilombu. 8 Mosi chedikayi tuhu nakuya kunidi itenti, antu ejima emeneña hamawiñililu akumatenti awu nakumushinshika Mosi sampu nichikwiñilayi mwitenti. 9 Mosi cheñilayi tuhu mwitenti, chishimi cheevu+ chazenzumukileña nakwimana hawiñililu wakwitenti iku Nzambi nakuhosha naMosi.+ 10 Antu ejima chamonawu chishimi cheevu chinemani hawiñililu wakwitenti, wejima wawu muntu-himuntu wemeneña nakunoñamina hawiñililu wakwitenti dindi. 11 Yehova wahosheleña naMosi mesu-namesu+ neyi muntu chinateli kuhoshayi namukwawu muntu. Chafuntayi kuchilombu, Yoshuwa+ mwana kaNuni, mukakumukalakela nawa nhembi yindi,+ wafumineña wanyi mwitenti.
12 Dichi Mosi wamwilili Yehova nindi: “Talaña, wunakunleja neyi, ‘Twalaku awa antu,’ ilaña hiwunanleji muntu iwukuntemesha nindiku. Kubombelahu, wunanleji neyi, ‘nakwiluka hejina* nawa nakutiyaña kuwaha.’ 13 Mwani, neyi wunakuntiya kuwaha, nleji njila jeyi+ kulonda nikwiluki nawa wutwalekihu kuntiya kuwaha. Anukaku cheñi neyi iwu muza hiyantu jeyi.”+ 14 Dichi yena wahosheli nindi: “Ami aweni nukuya* naneyi+ nawa nakakunookesha.”+ 15 Kuhiñahu, Mosi wamulejeli nindi: “Neyi eyi wukuya* nanami wanyi, bayi wutufumisha kunuku. 16 Indi antu akeluka ñahi nawu ami niantu jeyi watutiyaña kuwaha? Neyi wuya hamu nanetu,+ ami niantu jeyi twakekala ambukaku nawantu ejima ekala hamaseki.”+
17 Yehova watwalekelihu nakumuleja Mosi nindi: “Nukwila ninichi chuma chiwunalombi, muloña nakutiyaña kuwaha nawa nakwiluka hejina.” 18 Kuhiñahu yena wahosheli nindi: “Mmwekesheli kulema kweyi.” 19 Ilaña yena wahosheli nindi: “Nakahita kumesu eyi, wakamona kuwaha kwami nawa nakabidika ijina dami daYehova kudi eyi.+ Nakatiya kuwaha muntu wejima inatiyaña kuwaha nawa nakatiyila luwi muntu wejima inatiyilaña luwi.”+ 20 Wabombelelihu nindi: “Kwila wutwesha kumona kumesu ami nehi, muloña kwosi muntu wunateli kummona ahandaku.”
21 Yehova wahosheli cheñi nindi: “Kunu kwakwihi nanami kudi iluña. Imanaku helola. 22 Neyi hinukuhita mukulema kwami, nukukusha mumwaji welola nawa nukukukiña nachikasa chami sampu nichinukuhita. 23 Neyi nahiti dehi, nukufumisha chikasa chami nawa wukumona nyima yami. Ilaña kumesu ami wukumonaku wanyi.”+