Ansompeshi
19 Munowu mafuku, muIsarela+ chimwabulili mwanta, kaLevi washakamineña kwiluña dakwakulehi mwiluña damapidi daEfuremu,+ wasendeli ntombu* kuBetelemi+ muYuda kulonda ekali ñodindi. 2 Ilaña ntombu yindi hadiña washinshika kudi yenaku, nawa wamushiyili nakuya kwitala datata yindi kuBetelemi muYuda. Washakamini kwenoku tukweji tuwana. 3 Kuhiñahu, nfumwindi wamulondeleli nakumulembelela kulonda afunti; wasendeli nhembi yindi weyala niayimbuulu ayedi. Dichi owu mumbanda wamutwalili nfumwindi mwitala datata yindi. Tata yaniwu mumbanda chamumweniyi, wazañaleli nankashi. 4 Dichi, muku windi, tata yanowu chañadima, wamushinjilili nindi ashakami nindi mafuku asatu; adiileña nikunwa nawa wakaamineña kwenoku.
5 Hefuku damuchiwana, chahindukiliwu ntetemena nankashi nawu ayeña, tata yachañadima wamulejeli muku windi nindi: “Dakuhu yakuda wiikali nañovu, kufumahu dinu munyamuki muyeña.” 6 Dichi ashakamini, nawa wejima wawu adiili nikunwina hamu; kuhiñahu, tata yanowu chañadima wamulejeli owu iyala nindi: “Mwani, kaamaku kunu wudiluñishi.”* 7 Owu iyala chahindukiliyi nindi ayeña, muku windi watwalekelihu kumulembelela, dichi wakaamini cheñi kwenoku.
8 Hefuku damuchitanu, chahindukiliyi ntetemena nankashi nindi ayeña, tata yanowu chañadima wamulejeli nindi: “Dakuhu yakuda wiikali nañovu.” Dichi alabajalili nichikwelili melela, nawa wejima wawu atwalekelihu kuda. 9 Owu iyala chanyamukiliyi nindi ayeña hamu nantombu yindi ninhembi yindi, tata yanowu chañadima wamulejeli muku windi nindi: “Talaña kuneli dehi melela. Mwani, kaamaku. Itena hidikuhuma. Kamaaku kunu wudiluñishi. Kumadiki mwakahinduki ntetemena mwakanyamuki nakuya kumukala* weyi.” 10 Hela chochu, owu iyala hakeñeli kukaama cheñi wufuku wukwawu kwenokuku, dichi wanyamukili nakuya ndo-o nikuYebusi, dikwila nawu Yerusalema.+ Wayili nayimbuulu yiyedi hakasililiwu chakushakamahu ntombu* yindi ninhembi yindi.
11 Chashikiliwu kwakwihi naYebusi, itena dadiña kwakwihi nakuhuma. Dichi nhembi wamwilili nkaaka yindi nindi: “Kwila twimana muniwu musumba wawaYebusi kulonda tukaaminimu nehi?” 12 Ilaña nkaaka yindi wamulejeli nindi: “Kwila twimana mumusumba wawañiinza abula kwikala aIsarela nehi. Tukutwalekahu nakuya ndo-o nikuGibeya.”+ 13 Kufumahu, wamulejeli nhembi yindi nindi: “Tuyi tweseki kushika kwiluña dimu danana maluña; tukukaamina muGibeya hela muRama.”+ 14 Dichi atwalekelihu nalwendu lwawu, nawa itena datachikili kuhuma chashikiliwu kwakwihi naGibeya, musumba waBenjamini.
15 Dichi emeni muGibeya kulonda akaaminimu. Chadiñawu mwenomu, ashakamini mulubanza lwamusumba, ilaña kwosi muntu wayisendeli kwitala dindi kulonda akaamiku.+ 16 Hawenowu melela, kukasumuka hikukwinza kashinakaji weyala wafumineña nakuzata mwiha dindi. Wadiña wakwiluña damapidi daEfuremu,+ nawa hanoyu mpinji washakamineña muGibeya; ilaña enimbu amuniwu musumba adiña eni Benjamini.+ 17 Chafumbwiliyi mesu indi, wamweni mwenyi wudi mulubanza lwamusumba, dichi owu kashinakaji weyala wamwihwili nindi: “Wunakuya kudihi? Nawa wunakufuma kudihi?” 18 Waakwili nindi: “Tunakufuma kuBetelemi muYuda, tukuya kwiluña dakwakulehi mwiluña damapidi daEfuremu, kunafuma. Nayili kuBetelemi muYuda+ nawa inakuya kwitala daYehova,* ilaña kwosi muntu hela wumu wunansendi kwitala dindiku. 19 Tukweti matahu oma niyakuda yayivulu yakuda ayimbuulu+ jetu, nawa ami, mumbanda ninhembi yetu, tukweti mankendi nivinyu. Kwosi chuma chitunakaankiliku.” 20 Hela chochu, owu kashinakaji weyala wamulejeli nindi: “Kuwunda kwiikali naneyi! Nukukwinka yuma yejima yiwukukeña. Bayi wukaama mulubanza lwamusumbaku.” 21 Dichi wamutwalili mwitala dindi nawa wenkeli ayimbuulu yakuda.* Kufumahu, aweleli kunyendu yawu nawa adiili nikunwa.
22 Hadiluñishileñawu, kwenjili amayala amukunkulwayi afumini mumusumba, anyeñumukili itala nawa eteleña hachiisu, atwalekelihu nakumwila owu kashinakaji mwini itala nawu: “Idishaku iyala wenza mwitala deyi kulonda tudikaami nindi.”+ 23 Hohenohu, mwini itala wedikili hanji nakuyileja nindi: “Inehi amanakwami, bayi mukoña chuma chatamaku. Mwani, iwu iyala himwenyi mwitala dami. Bayi mukoña ichi chuma chawuzonduku. 24 Nikweti mwanami wamumbanda mujiki* nintombu yaniwu iyala. Ñiitejenu niyidishi nawa muyisawuli neyi munakukeña.*+ Ilaña bayi mukoña ichi chuma chawuzondu kudi iwu iyalaku.”
25 Ilaña awa amayala amutiyililili wanyi, dichi owu iyala wakwatili ntombu+ yindi nakuyidishilayi hanji. Amukaamini chakumukanjikija nawa amukabishili wufuku wejima kushika nintetemena. Dichi amuumbiliku hankunku yakucha. 26 Nantetemena nankashi, iwu mumbanda wenjili nakudimbukila kuwiñililu wetala danowu kashinakaji weyala mwadiña nkaaka yindi nawa wakaamini kwenoku nichikwatookeli. 27 Nkaaka yindi chahindukiliyi ntetemena nakwenzununa yiisu yetala kulonda atwalekihu nalwendu lwindi, wamweni mumbanda, ntombu yindi nakaami kuwiñililu wetala iku makasa indi adi muchiisu. 28 Dichi wamwilili nindi: “Hindukaku tuyeña.” Ilaña owu mumbanda waakwili wanyi. Kuhiñahu, iwu iyala wamushili iwu mumbanda hachimbuulu nakuya kumukala windi.
29 Chashikiliyi kwitala dindi, wanoneli mpoku yakujahilaku nakumuketola ntombu yindi muyimamu 12 nawa watemesheli chimamu chimu-chimu kumaluña ejima amuIsarela. 30 Ejima amweni chumichi ahosheli nawu: “Chuma chamuchidiwu kanda chiikaleñaku dehi hela kumwekana kufuma hefuku dafuminiwu aIsarela mwituña daEjipitu kushika nikwifuku dalelu. Toñojokenuhu hachumichi,* kwatenu mpuña+ nawa tulejenu chuma chitwatela kwila.”