Kushindulula Watachi
14 Mwanta Hirami+ wakuTira watemesheli antemesha kudi Davidi hamu nanyitondu yanyisida, eluka kuzata namalola* niakakusoña kulonda amutuñili itala.*+ 2 Nawa Davidi welukili nindi Yehova namukoleshi chikupu kwikala mwanta waIsarela,+ muloña wanta windi awutuumbakesheli nankashi muloña wawantu Jindi aIsarela.+
3 Davidi wabombelelihu cheñi ambanda amakwawu+ muYerusalema nawa Davidi wavwelelelihu anyana amakwawu awamayala niawambanda.+ 4 Awa diwu majina awanyana avweliyi muYerusalema:+ Shamuwa, Shobabi, Natani,+ Solomoni,+ 5 Ibihari, Elishuwa, Elipeleti, 6 Noga, Nefegi, Yafiya, 7 Elishama, Beyeliyada niElifeleti.
8 AFilisitinu chatiyiliwu nawu Davidi anamuwayishi kwikala mwanta wawaIsarela ejima,+ aFilisitinu ejima enjili nakumukeñakeña Davidi.+ Davidi chachitiyiliyi, wayili nakuzuña nawu. 9 Kuhiñahu, aFilisitinu eñilili nawa atwalekelihu kulukuka muChinekineki chawaRefa.+ 10 Davidi wamwihwili Nzambi nindi: “Nikanduki niyi nakuzuña nawaFilisitinu tahindi? Wukuyihana muchikasa chami?” Hohenohu Yehova wamulejeli nindi: “Kandukaku, nawa chakadi nikujina, nukuyihana muchikasa cheyi.”+ 11 Dichi Davidi wakandukili nakuya kuBayali Perazimi+ nawa wayitapilili kwenoku. Hohenohu Davidi wahosheli nindi: “Nzambi walala nambalwili ayilumbu jami hakachi kwakwihi nachikasa chami neyi mbañu yinakunduki namenji.” Dihafumini hiyakudituumba odu iluña nawu Bayali Perazimi.* 12 AFilisitinu ashiyili anzambi jawu kwenoku, nawa Davidi chahaniniyi lushimbi, awa anzambi ayocheli mukesi.+
13 Chimwahitili mpinji, aFilisitinu alukukili cheñi muchinekineki.+ 14 Davidi wamwihwili cheñi Nzambi, ilaña Nzambi walala wamwakwili nindi: “Bayi wutalañana nawuku. Ilaña, wunyeñumukili kunyima yawu kulonda wuyilukukili kwakwihi nayiputa yabeka.+ 15 Nawa neyi wutiya chivumina chanshindu hewulu dayiputa yabeka, wakalukuki, muloña Nzambi walala wakekala watwaminaku dehi hambidi yeyi nakutapa njita yawaFilisitinu.”+ 16 Dichi Davidi welili kwesekeja namwamulejeliwu kudi Nzambi walala,+ nawa atapili njita yawaFilisitinu kufuma kuGibeyoni ndo-o nikuGezeri.+ 17 Nawa mpuhu yaDavidi yataandili mumatuña ejima nawa Yehova washili woma munyuza yejima wakumuchiina Davidi.+