Yoshuwa

8 Kufumahu, Yehova wamulejeli Yoshuwa nindi: “Bayi wutiya woma hela kufwa mutentuku.+ Sendaku amayala ejima akakuzuña njita muyi nakuzuña naAyi. Tiyaña, ami nakwinki mwanta wakuAyi, antu jindi, musumba windi niituña dindi.+ 2 Ayi nimwanta wawu wakayili neyi chochiwelili Yeriku nimwanta wawu,+ ilaña yuma yawu niyimuna yawu mwakayipuupi yakekali yenu. Wakashi akakubelamina kunyima yamusumba.”

3 Dichi Yoshuwa niamayala ejima akakuzuña njita ayili nakuzuña naAyi. Yoshuwa watondeli akakuzuña njita añovu 30,000 nakuyitemesha nawufuku. 4 Wayinkeli ilu lushimbi nindi: “Tiyenu, mwakabelamini kunyima yamusumba. Bayi mwakaya kwakulehi nankashi namusumbaku, nawa wejima wenu diloñeshelenu dimu. 5 Ami niantu ejima inidi nawu twakaya kwakwihi namusumba, nawa chakedikawu kulonda azuñi nanetu neyi cheliliwu hatachi,+ twakayitemuka. 6 Chakedikawu nakutukumpisha, twakayitwala kwakulehi namusumba, muloña wena akahosha nawu, ‘Anakututemuka neyi chatutemukiliwu hatachi.’+ Nawa etu twakayitemuka. 7 Kuhiñahu, mwakanyamuki kufuma himwakabelamina nakulukuka musumba; Yehova Nzambi yenu wakawuhana kudi enu. 8 Neyi munalukuki dehi musumba, mwakawochi nakesi.+ Mwatela kwila kwesekeja nezu daYehova. Tiyenu, ilu dilushimbi lwinnayinki.”

9 Kufumahu, Yoshuwa wayitemesheli nawa ayili kwiluña kwabelaminininiwu; ashakamini hakachi helili Beteli iku, Ayi iku, kumujika waAyi. Ilaña wufuku wenowu, Yoshuwa wakaamini hamu nawantu.

10 Hanyima yakwila Yoshuwa nanyamuki dehi nantetemena nankashi nawa napompeshi dehi mazanvu amashidika hamu, yena niakulumpi jawaIsarela ayilombweli nakuya kuAyi. 11 Amayala ejima akakuzuña njita+ adiña hamu nayena, akandukili nakuya kwakwihi namusumba. Ateekeleli kukabeta kaAyi kakuchimunswa, helili wena iku, Ayi iku, chinekineki hakachi. 12 Haniyi mpinji, wasendeli amayala 5,000 nawa wayilejeli kubelamina+ hakachi helili Beteli iku,+ Ayi iku, kumujika wamusumba. 13 Dichi akakuzuña njita ateekeleli kukabeta kakuchimunswa+ nawa amashidika ashalileña munyima ateekeleli kumujika wamusumba,+ ilaña hawufuku wenowu, Yoshuwa wayili hakachi kachinekineki.

14 Mwanta wakuAyi chamweniyi tuhu chumichi, yena niamayala amumusumba edikili swayi-swayi ntetemena nankashi nakuya nakudiwana nawaIsarela kulonda azuñi nawu njita heluña dimu datalañana nachana chachinkalampata. Ilaña welukili wanyi nindi kudi anamubelamini kunyima yamusumba. 15 Amayala akuAyi chalukukiliwu, Yoshuwa niaIsarela ejima atemukilili munjila yaya mwisaña.+ 16 Kufumahu, antu ejima amunowu musumba ayitambikili kulonda akumpishi aIsarela; nawa chamukumpishileñawu Yoshuwa, wena ayitwalileña hahalehi namusumba. 17 Kwosi iyala niwumu washalili muAyi nimuBeteli wabulili kwidika nakukumpisha aIsarelaku. Ashili musumba wawashi nakukumpisha aIsarela.

18 Kuhiñahu, Yehova wamulejeli Yoshuwa nindi: “Olwelaku kukabadi kaAyi iyoña didi muchikasa cheyi,+ muloña nukuwuhana muchikasa cheyi.”+ Dichi Yoshuwa wolweleli iyoña dapeela dadiña muchikasa chindi kukabadi kamusumba. 19 Cholweliyi tuhu chikasa chindi, owu abelaminini anyamukili swayi-swayi kufuma kwadiñawu nakuya lufuchi mumusumba nawa awulukukili. Hohenohu musumba awocheli nakesi.+

20 Amayala akuAyi chabalumukiliwu nakutala kunyima, amweni musumba wunakukakumuka wishi mwiwulu nawa hiyadiña nañovu yakutemukila kukabadi kadi kejimaku. Kufumahu, owu aIsarela atemukilileña mwisaña, ayibalumukilili antu ayikumpishileña. 21 Yoshuwa niaIsarela ejima chamweniwu nawu owu abelamini analukuki musumba nawa chamweniwu musumba wunakukakumuka wishi, abalumukili nakulukuka amayala akuAyi. 22 Nawa amakwawu enjili kufuma mumusumba nakuyibulakana, chakwila amayala akuAyi ayishili hakachi, aIsarela amu kabadi kamu, amakwawu kabadi kakwawu, nawa ayitapili chakwila kwosi hela wumu wahandili hela watemukiliku.+ 23 Ilaña mwanta wakuAyi+ amukwatili wamumi nawa amutwalili kudi Yoshuwa.

24 Chelili aIsarela anamanishi dehi kujaha eni Ayi ejima adiña mumpata, dikwila nawu mwisaña mwayikumpishililiwu nawa chelili anajahi dehi muntu wakukumishaku nampoku yakabali, hohenohu aIsarela ejima afuntili kuAyi nakutapa ejima ashalilimu nampoku yakabali. 25 Antu ejima afwili hanodu ifuku, kutachikila kudi muntu weyala nakushika kudi wamumbanda, adiña 12,000, dikwila nawu eni Ayi ejima. 26 Yoshuwa havuñili chikasa chindi cholweliyi nachu iyoña dapeelaku,+ sampu nichajilumwiniyi antu ejima ashakamineña muAyi.+ 27 Ilaña, aIsarela asendeli yimuna niyuma yapuupiliwu mumusumba, kwesekeja nanshimbi jamwinkeliwu Yoshuwa kudi Yehova.+

28 Dichi Yoshuwa wocheli Ayi nakumwilisha kwikala mulumba wahaya nyaaka wayuma yinajilumuki,+ owu wuchidiku nikulelu. 29 Wajahili mwanta wakuAyi nawa wamukudikili hamutondu kushika nimelela, nawa itena chidashikili kwakwihi nakuhuma, Yoshuwa walejeli antu kulonda afumishi mujimba hamutondu.+ Kuhiñahu, amutentekeli kuwiñililu wakuchiisu chamusumba nawa alumbikilihu mulumba weneni wamalola, owu wuchidiku nikulelu.

30 Dihafumini Yoshuwa amutuñili Yehova Nzambi yaIsarela kameña haMpidi yaEbali,+ 31 neyi chayilejeliwu aIsarela kudi Mosi kambuña aYehova nawa neyi chasonekawu mumukanda waNshimbi+ jaMosi nawu: “Kameña kamalola amukuma akadi kusoña nachitwa chachikuñu.”+ Dihalambwilileñawu nyilambu yakushita kudi Yehova kushilahu ninyilambu yakuwunda.+

32 Kufumahu, hanawa malola wasonekelihu Nshimbi+ jayisonekeleliwu aIsarela kudi Mosi.+ 33 AIsarela ejima, akulumpi jawu, anlomboli niansompeshi jawu emeni kumbadi jejima jiyedi jaChimbañu hamesu awatupristu aLevi owu asendeleña chimbañu chachitiyañenu chaYehova. Añiinza kushilahu nienimbu niwena adiña hohu.+ Chibalu chimu, chemeneni kumbidi yaMpidi yaGerizimi, nawa chibalu chikwawu chemeneni kumbidi yaMpidi yaEbali+ (neyi chashimwiniyi Mosi kambuña aYehova kunyima),+ nakukiswila antu jaIsarela. 34 Hanyima yachumichi, watañili nezu datiyakana mazu ejima amuniji Nshimbi,+ dikwila nawu nkisu+ nimashiñu,+ kwesekeja nayuma yejima yasonekawu mumukanda waNshimbi. 35 Hamazu ejima amulejeliwu Yoshuwa kudi Mosi, hosi izu hela dimu dabulili kutañayi nezu datiyakana kumbidi yachipompelu chawaIsarela chejima,+ kushilahu niambanda, anyana niañiinza+ ashakamineña* mukachi kawu.+