Yeremiya
26 Kumatachikilu achiyuulu chaYehoyakimi+ mwana kaYosiya, mwanta waYuda, izu denjili kufuma kudi Yehova nawu: 2 “Yehova nahoshi nindi, ‘Imanaku mulubanza lwetala daYehova nawa wuhoshi hadi* antu ejima amunyisumba yaYuda anakwinzaña nakudifukula* kwitala daYehova. Wuyileji yuma yejima yinukukuleja; bayi wushiyahu izu hela dimuku. 3 Hadaha akutiyilila nawa muntu-himuntu wukuleka njila yindi yatama, nawa ami nukuhimpa yitoñojoka yami kutalisha* hayihuñu yinnakukeña kuyiletela muloña wayilwilu yawu yatama.+ 4 Wuyileji neyi: “Yehova nahoshi nindi, ‘Neyi mukukaana kuntiyilila nakubula kulondela nshimbi* jinasha kumesu enu, 5 nakubula kutiyilila kumazu awambuñami atuprofwetu, owu inakuyitemeshelaña kapampa kakavulu,* imwabulaña kutiyilila,+ 6 dichi nakabalumuna idi itala kwikala neyi Shilo,+ nawa iwu musumba nakawubalumuna akawuteneña hakushiñana kudi nyuza yejima yahamaseki.’”’”+
7 Nawa atupristu niatuprofwetu niantu ejima amutiyili Yeremiya nakuhosha awa mazu mwitala daYehova.+ 8 Dichi Yeremiya chamanishiliyi kuhosha yuma yejima yamulejeliwu kudi Yehova nindi aleji antu ejima, hohenohu atupristu niatuprofwetu niantu ejima amukwatili nakumwila nawu: “Eyi cheyi kufwa hohu. 9 Muloñadi chiwunaprofweteli mwijina daYehova neyi, ‘Idi itala dikwikala neyi Shilo, nawa iwu musumba akuwujilumuna nakuwushiya chakadi muntu hela wumu’?” Dichi antu ejima amukuñili Yeremiya mwitala daYehova.
10 Ayilolu amuYuda chatiyiliwu awa mazu, akunkumukili kufuma kwitala damwanta nakuya kwitala* daYehova nawa ashakamini kuwiñililu wakuchiisu chachiha chaYehova.+ 11 Atupristu niatuprofwetu alejeli ayilolu niantu ejima nawu: “Iwu iyala watelela kufwa,+ muloña naprofweti yihuñu hadi iwu musumba neyi chimunatiyi namatu enwenu aweni.”+
12 Yeremiya walejeli ayilolu ejima niantu ejima nindi: “Yehova diyi wantemesha nakuprofweta kutalisha hanidi itala nihaniwu musumba mazu ejima imunatiyi.+ 13 Ichi dinu, himpenu njila jenu niyilwilu yenu nawa ovwahilenu izu daYehova Nzambi yenu, nawa Yehova wukuhimpa yitoñojoka yindi kutalisha* hayihuñu yinashimuniyi kuyiletela.+ 14 Ilaña ami, nidi muchikasa chenu. Ñilenu mwejima mumunakeñi nawa mumunamoni nenu mwamuwahi. 15 Ilukenu chikupu nenu neyi mukunjaha, mukuleta mashi akadi muloña hadi enu aweni nihaniwu musumba nihadi antu ashakamañamu, chalala Yehova nantemeshi kudi enu nakuhosha awa mazu ejima imunaditiyili.”
16 Kufumahu, ayilolu niantu ejima alejeli atupristu niatuprofwetu nawu: “Iwu iyala watelela kufwa wanyi, muloña wahosha nanetu mwijina daYehova Nzambi yetu.”
17 Kubombelahu, akulumpi amakwawu amwituña anyamukili nakutachika kuleja antu ejima apompeli nawu: 18 “Mika+ wakuMoresheti waprofweteleña mumafuku aMwanta Hezekiya+ waYuda, nawa wayilejeli antu ejima amuYuda nindi, ‘Yehova wamazaza nahoshi nindi:
“Ziyona akamudima neyi iha,
Yerusalema wakabalumuka nyilumba yayuma yinajilumuki,+
19 “Komana amujahili kudi Mwanta Hezekiya waYuda nikudi aYuda ejima? Komana hamutiyili Yehova woma nakulemba kudi Yehova nindi amutiyili luwi,* chakwila Yehova wahimpili yitoñojoka yindi kutalisha* hayihuñu yashimwiniyi kuyiletela wenaku?+ Dichi keña tudileteli etu aweni* yihuñu.
20 “Nawa kwadiña cheñi iyala mukwawu waprofweteleleña mwijina daYehova, Uraya mwana kaShemaya wakuKiriyati Yeyarimi,+ waprofweteli kutalisha haniwu musumba nihanidi ituña mazu adi neyi aYeremiya. 21 Mwanta Yehoyakimi+ niantu jindi ejima añovu niayilolu ejima atiyili mazu indi, nawa mwanta wakeñeleña kumujaha.+ Uraya chachitiyiliyi, hohenohu watiyili woma nawa watemukilili kuEjipitu. 22 Kuhiñahu, Mwanta Yehoyakimi watemesheli Elinatani+ mwana kaAkibori hamu nawamayala amakwawu kuEjipitu. 23 Dichi amufumishili Uraya kuEjipitu nakumutwala kudi Mwanta Yehoyakimi, yena wamujahili nampoku yakabali+ nawa wanatilili mujimba windi hamajamu awantu abula kulema.”
24 Ilaña Ahikami+ mwana kaShafani+ wamukwashili Yeremiya, dichi hiyamuhanini kudi antu kulonda amujahiku.+