Kushindulula Watachi
23 Davidi chashinakajiliyi nawa chadiñayi kwakwihi nakufwa,* wamwilishili mwanindi Solomoni kwikala mwanta waIsarela.+ 2 Kuhiñahu, wapompesheli ayilolu ejima amuIsarela, atupristu+ niaLevi.+ 3 ALevi adiña nayaaka kutachikila ha 30 nakuya hewulu ayichindili hamuntu-hamuntu,+ nawa ejima wawu adiña 38,000. 4 Hakachi kanawa antu, 24,000 adiña atupitawu akutala mudimu wakwitala daYehova, 6,000 adiña ayilolu niansompeshi,+ 5 nawa hadiña akakuhemba kuchiisu+ 4,000 niantu 4,000 amuhamekeleña+ Yehova nayisanji yashimwiniyi Davidi nindi, “Nayituñili kulonda amuhamekeña nachu Nzambi.”
6 Kufumahu, Davidi wayambwili mumazanvu+ kwesekeja nawanyana kaLevi awamayala: Geshoni, Kohati niMerari.+ 7 Mudi aGeshoni mwafumini Ladani niShimeyi. 8 Anyana kaLadani awamayala adiña asatu, Yehiyeli mukulumpi wamukala, Zetami niYoweli.+ 9 Anyana kaShimeyi awamayala adiña asatu, Shelomoti, Haziyeli niHarani. Awa diwu adiña anlomboli janyitaña yaLadani yindi. 10 Nawa Anyana kaShimeyi awamayala adiña Yahati, Zina, Yewushi niBeriya. Awa ejima awana adiña anyana kaShimeyi. 11 Yahati diwadiña nlomboli, halondela niZiza. Ilaña chelili Yewushi niBeriya hiyadiña nawanyana awamayala amavuluku, ayichindili neyi chisaka chimu chakukatata yawu nawa ayinkeli mudimu wumu.
12 Anyana kaKohati awamayala adiña awana, Amuramu, Izihari,+ Hebironi niUziyeli.+ 13 Anyana kaAmuramu awamayala adiña Aroni+ niMosi.+ Ilaña Aroni nianyanindi awamayala ayaambwili haya nyaaka+ kulonda ajilikeña Mwajila Chikupu, nawa kulonda alambuleña nyilambu kumesu aYehova, kumukalakela nikukiswila antu mwijina dindi mpinji yejima.+ 14 Hakwila anyana awamayala avweliyi Mosi muntu waNzambi walala, ayichindilili kumuchidi wawaLevi. 15 Anyana kaMosi awamayala adiña Geshomu+ niEliyezeri.+ 16 Mudi anyana kaGeshomu awamayala, Shebuweli+ diwadiña nlomboli. 17 Mudi amuchisaka* chaEliyezeri, Rehabiya+ diyi wadiña nlomboli; Eliyezeri hadiñahu nawanyana awamayala amakwawuku, ilaña anyana kaRehabiya awamayala adiña amavulu chikupu. 18 Mudi anyana kaIzihari,+ Shelomiti+ diyi wadiña mukulumpi wamukala. 19 Anyana kaHebironi awamayala adiña Yeriya, diwadiña nlomboli, wamuchiyedi Amariya, wamuchisatu Yahaziyeli nawa wamuchiwana Yekameyami.+ 20 Anyana kaUziyeli+ awamayala adiña Mika, diwadiña nlomboli, halondela Ishiya.
21 Anyana kaMerari awamayala adiña Mahili niMushi.+ Anyana kaMahili awamayala adiña Eleyazari niKishi. 22 Eleyazari wafwili, ilaña havwelihu anyana awamayalaku, chiña awambanda hohu. Dichi, awa anyana asumbukili kudi antaña jawu,* anyana kaKishi. 23 Anyana kaMushi awamayala adiña asatu, Mahili, Ederi niYeremoti.
24 Awa diwu anyana kaLevi awamayala kwesekeja nanyitaña yawu, anlomboli janyitaña yawu. Ayisonekeli, ayichindili nikuyitanjika kwesekeja namajina awu nawa diwu azatileña mudimu wakwitala daYehova, kutachikila hadi adi nayaaka 20 kuya hewulu. 25 Muloña Davidi wahosheli nindi: “Yehova Nzambi yaIsarela nanookeshi antu jindi+ nawa wakashakama muYerusalema haya nyaaka.+ 26 Kubombelahu, aLevi hiyakasendaña cheñi tabanaka hela kusenda chuma chayu chejima hayuma yakuzatisha kumudimu wayuku.”+ 27 Muloña kwesekeja nanshimbi jaDavidi jakukumishaku, aLevi ejima adiña nayaaka kutachikila ha 20 kuya hewulu ayichindili. 28 Mudimu wawu wadiña wakukwasha anyana kaAroni+ awamayala kukalakala mudimu wakwitala daYehova, kwakamena malubanza,+ tupeka twakudiilamu, kutookesha yuma yejima yajila nimudimu wejima wakwitala daNzambi walala. 29 Akwashañeneña mumudimu wakwocha mankendi akulunjeka,*+ wawuña wawuwahi walembuluka wamulambu wambutu, wamankendi apapalala akadi iluñi,+ wamakeeki akwocha hachikañu, wachikanka chakubomba namanji+ nimudimu wejima wakupima kuvula nikutoha. 30 Emeneña ntetemena-hintetemena+ nakumusakilila nikumuhameka Yehova nawa dichiyelileñawu nimelela.+ 31 Akwashañeneña hampinji yejima yalambwileñawu nyilambu yakushita kudi Yehova hajiSabata,+ hatukweji twatuha+ nihayilaaka yayawija,+ kwesekeja nakuvula kwakeñekeleña munshimbi kutalisha hayumiyi. Elileña mwenimu mpinji yejima kumesu aYehova. 32 Adiña nakwakamena ninyidimu yawu yakwitenti dakubulakena, yamwiluña dajila nikukalakela amanakwawu anyana kaAroni awamayala azatileña mudimu wakwitala daYehova.