Yeremiya

43 Yeremiya chamanishiliyi kuhosha nawantu ejima mazu ejima afumini kudi Yehova Nzambi yawu, izu dejima damutemesheliwu kudi Yehova Nzambi yawu nindi ayileji, 2 Azariya mwana kaHoshaya, Yohanani+ mwana kaKareya niantu ejima adivwimba amulejeli Yeremiya nawu: “Mazu iwunakuhosha akutwamba! Yehova Nzambi yetu hanakutemeshi nindi wutuleji neyi, ‘Bayi muya kuEjipitu nakushakamakuku.’ 3 Ilaña Baruki+ mwana kaNeriya nakukushinjila nindi wutuhani kudi aKalideya, kulonda atujahi hela atutwali muwunkoli kuBabiloni.”+

4 Dichi Yehonani mwana kaKareya, akulumpi ejima awamashidika niantu ejima, akaanini kwovwahila izu daYehova nakushala mwituña daYuda. 5 Ilaña, Yehonani mwana kaKareya niakulumpi ejima awamashidika ayisendeli ashalahu ejima amuYuda owu afuntili nakushakama mwituña daYuda kufuma kunyuza yejima kwayipalañesheleliwu.+ 6 Asendeli amayala, ambanda, anyana, anyana kamwanta awambanda nimuntu* wejima Nebuzaradani+ mukulumpi wawatulama ashililiyi Gedaliya+ mwana kaAhikami,+ Ahikami mwana kaShafani,+ kushilahu nikaprofwetu Yeremiya niBaruki mwana kaNeriya. 7 Nawa ayili kwituña daEjipitu, muloña hiyovwahilili izu daYehovaku, nawa ayili nakushika nikuTapanesi.+

8 Kufumahu, izu daYehova denjili kudi Yeremiya kuTapanesi nawu: 9 “Sendaku malola amaneni muchikasa cheyi, wuyisweki mundaaka yamumatafwali akwaala kuwiñililu wetala daFwaru kuTapanesi iku aYudeya anakutalaku. 10 Kuhiñahu wuyileji neyi, ‘Yehova wamazaza, Nzambi yaIsarela, nahoshi nindi: “Inakutambika Nebukaneza* mwanta wakuBabiloni, kambuñami,+ nawa nukusha itanda dindi hewulu danawa malola innasweki, wukutandumwinahu itenti dindi dawanta.+ 11 Dichi wukwinza nakulukuka ituña daEjipitu.+ Wejima wakuchipupu chafwana wukufwa kuchipupu chafwana, wejima wakuwunkoli wukuya kuwunkoli, nawa wejima wakumpoku yakabali wukufwa kumpoku yakabali.+ 12 Nawa nukwocha matala* awanzambi aEjipitu nakesi,+ nawa yena wukuyocha nakuyitwala muwunkoli. Wukudipombeka ituña daEjipitu neyi chadipombekañayi kabiña chakuvwala chindi, nawa wukufuma kwenoku mukuwunda.* 13 Nawa wukuhumona yishimi yaBetishemeshi* muyikunku mwituña daEjipitu, nawa wukwocha matala* awanzambi amuEjipitu nakesi.”’”