Kwidika
19 Mukakweji kamuchisatu kufuma hafuminiwu aIsarela mwituña daEjipitu, hefuku dodimu ashikili mwisaña daSinayi. 2 Afumini kuRefidimi+ nakuya mwisaña daSinayi nawa atuñilili chilombu mwisaña. Kwenoku, aIsarela atuñilili chilombu kumbidi yampidi.+
3 Kuhiñahu, Mosi wakandamini hampidi kudi Nzambi walala nawa Yehova wamutambikilili hampidi+ nindi: “Awa mazu diwu iwatela kuleja amwitala daYakoba, dikwila nawu aIsarela neyi, 4 ‘Munadimweni enu aweni yuma yinayikoñeli aEjipitu+ kulonda niyisendi enu hampuula jawambuulu nakuyileta kudi ami.+ 5 Dichi neyi mukutiyilila chikupu mwizu dami nikuhemba chitiyañenu chami, chalala mukwikala iheta dami dadimena* hakachi kawantu ejima+ muloña iseki dejima dami.+ 6 Kudi ami mukwikala wanta wawatupristu nimuza wajila.’+ Awa diwu mazu iwukuyileja aIsarela.”
7 Dichi Mosi wayili nakutambika akulumpi jawantu nawa wayilejeli awa mazu ejima amulejeliwu kudi Yehova.+ 8 Kufumahu, antu ejima aditejeli nakwakula nawu: “Mwejima munahoshiyi Yehova, tuneteji kwilamu.”+ Hohenohu Mosi wayili nakumulejamu Yehova chakwiliwu antu. 9 Nawa Yehova wamulejeli Mosi nindi: “Tiyaña! Inakwinza kudi eyi mwivu diyila kulonda antu atweshi kutiya chinukuhoshaña naneyi nawa kulonda mpinji yejima akukuhweleleña nineyi.” Kufumahu Mosi wamulejelimu Yehova mazu ahosheliwu antu.
10 Kuhiñahu, Yehova wamulejeli Mosi nindi: “Yaku kudi antu nawa wuyijiliki dalelu nikumadiki nawa atela kukosa yakuvwala yawu. 11 Nawa atela kudiloñesha hefuku damuchisatu, muloña hefuku damuchisatu Yehova wakasuluka nakwinza haMpidi yaSinayi hamesu awantu ejima. 12 Yipulili antu jiñinza kunyeñumuka mpidi yejima nawa wuyileji neyi, ‘Bayi mukandama hampidi hela kukwata kuñinza yayuku. Muntu wejima wukukwata kumpidi chalala akumujaha. 13 Kwosi watela kumukwata owu muntuku, ilaña akumwasa malola hela kumusowa.* Hela hikanyama hela himuntu wukuhanda wanyi.’+ Ilaña chivumina chaluseñu lwamukoku wachizamba chichavuma,+ akanduki hampidi.”
14 Kufumahu Mosi wakunkumukili hampidi nakwinza kudi antu, watachikili kuyijilika antu nawa akoseli yakuvwala yawu.+ 15 Wayilejeli antu nindi: “Diloñeshelenu chadimu mutalileña ifuku damuchisatu. Bayi mukaama nawambandaku.”*
16 Hefuku damuchisatu nantetemena, kwadiña kudidima ninzaji, kwadiña niivu dashishita+ hampidi nichivumina chatiyakana chanseñu nawa antu ejima muchilombu atachikili kuzaala.+ 17 Dichi Mosi wafumishili antu muchilombu kulonda adibulakani naNzambi walala nawa emeni mwishina dampidi. 18 Mpidi yaSinayi yejima yakakumukili wishi muloña Yehova wenjili hampidi mukesi;+ wishi wayu wakakumukileña neyi wishi wamuchibili nawa mpidi yejima yakankileña chikupu.+ 19 Chivumina chaluseñu chichaswejeleña kuvuma nankashi, Mosi wahosheli nawa izu daNzambi walala damwakwili.
20 Dichi Yehova wasulukili nakwinza hewulu daMpidi yaSinayi. Kuhiñahu Yehova wamutambikili Mosi hewulu dampidi nawa Mosi wakandamini.+ 21 Kufumahu Yehova wamulejeli Mosi nindi: “Kunkumukaku wakayisoñamishi antu neyi bayi acheseka kudikanjikija kwinza nakuntala ami Yehovaku, neyi nehi amavulu hakachi kawu akufwa. 22 Niatupristu enzaña kwakwihi nanami Yehova mpinji yejima adijiliki awenawu kuchiina ami Yehova nakenda kayijaha.”+ 23 Kuhiñahu Mosi wamulejeli Yehova nindi: “Antu hiyakutwesha kwinza nakukandama haMpidi yaSinayiku, muloña eyi wunatusoñamishi dehi neyi, ‘Pulaku jiñinza kunyeñumwisha mpidi nawa yijiliki.’”+ 24 Hela chochu, Yehova wamulejeli nindi: “Yaña, kunkumukaku nawa wufunti cheñi kunu, eyi hamu naAroni, ilaña bayi wuyiteji atupristu niantu adikanjikiji kwinza kudi ami Yehovaku, kuchiina nakenda kayijaha.”+ 25 Dichi Mosi wakunkumukili nakuya kudi antu nawa wayilejeli.