Kwidika
30 “Wakatuñi kameña kakekali kakwochelahu insensi;+ wakakituñi namutondu wamuzenzi.+ 2 Kakesekani mumbadi jejima jiwana, mukuleha kyubiti yimu,* muwihi kyubiti yimu nawa mukuleha kwiwulu makyubiti ayedi. Nseñu jaku wakajituñili hamu naku.+ 3 Wakakilambwiji wuru yakadi majilu: hewulu daku, mumbadi jaku mwejima nikunseñu jaku; nawa wakanyeñumwishiku mukinkita wawuru. 4 Wakatuñiliku nituzeya tuyedi twawuru mwishina damukinkita waku kutubadi twejima tuyedi nawa itu tuzeya twakakwataña nyalachi yakazatishañawu kusendelaku kameña. 5 Wakasoñi nyalachi yamutondu wamuzenzi nawa wakayilambwiji wuru. 6 Wakakishi kwakwihi nehina dakujika nachu dakekala kwakwihi nachimbañu chaWunsahu,+ kwakwihi nachifwiku chachimbañu chaWunsahu, ohu hinakadimwekeshela kudi eyi.+
7 “Aroni+ wakwochaña insensi yevumba dadiwahi+ hakameña+ kulonda yakakakumukileñahu wishi hakaloñeshañayi manoñu+ ntetemena-hintetemena. 8 Cheñi, Aroni chabutulayi manoñu hakabwidibwidi,* wakwochaña insensi. Iwu himulambu wainsensi wumwakalambulaña mpinji yejima kudi Yehova mwakahita makiñu enu ejima. 9 Hanaka kameña bayi mwakalambwilahu insensi yabula kwitejawu+ hela mulambu wakushita hela mulambu wambutuku, nawa bayi mwakahuñunwinahu mulambu wavinyuku. 10 Aroni akalambwileña hanseñu yakameña mulambu wakubuta nachu hanshidi kamu hachaaka.+ Wakalambulaña mulambu wakubuta nachu hanshidi yaku kamu hachaaka mwakahita makiñu enu ejima, kuzatisha mashi amakwawu amulambu wahanshidi wakubuta nachu hanshidi.+ Hichuma chajila chikupu kudi Yehova.”
11 Kuhiñahu, Yehova wamulejeli Mosi nindi: 12 “Mpinji yejima yiwakasonekaña nikuchinda anyana kaIsarela awamayala,+ muntu-himuntu* watela kuhana ifutu dakukuula nachu wumi windi kudi Yehova hampinji yakusonekesha. Mwakelaña mwenimu kulonda neyi anayisoneki dehi chipupu chakabuli kwinza hadi wena. 13 Iyi diyuma yakahanawu ejima akasonekawu: lushekeli* lwachibalu kwesekeja nalushekeli lwatelela lwamwiluña dajila.*+ Magira* 20 esekana nalushekeli lumu. Lushekeli lwachibalu dichawaana chakuhana kudi Yehova.+ 14 Muntu wejima akasonekawu wakekala nayaaka 20 nakuya hewulu wakamwinka Yehova chawaana.+ 15 Waheta bayi akahana nakubadikishamuku, nawa kazweñi niyena bayi akahana jantesha kubadika halushekeli* lwachibalu kwikala chawaana chakumwinka Yehova kulonda abuti nachu hanshidi jamawumi enuku. 16 Wakatambuli mali asiliva kudi aIsarela akubuta nachu hanshidi nawa wakayihani akazatikeña kumudimu wakwiitenti dakubulakena kulonda chumichi chakekali chakuyanukilaku aIsarela kudi Yehova kulonda akabuti nachu hanshidi jamawumi enu.”
17 Yehova wamulejeli cheñi Mosi nindi: 18 “Wakatuñi beseni* yawuneñu mwakuwelela nihakuyitenteka;+ kufumahu wakayishi hakachi haneli iku itenti dakubulakena iku kameña nawa wakasheñamu menji.+ 19 Aroni nianyanindi awamayala akaweleleñamu kumakasa nikunyendu.+ 20 Neyi hiyakwiñila mwitenti dakubulakena hela hiyakuswina kwakwihi nakameña nakukalakala nikulambula nyilambu yakesi niyakufutumuna kudi Yehova, akaweleña namenji kulonda akabuli kufwa. 21 Akaweleña kumakasa awu nikunyendu yawu kulonda akabuli kufwa nawa chumichi chakekala lushimbi lwahaya nyaaka lwakalondelañawu, yena nianyanindi mwakahita makiñu awu ejima.”+
22 Yehova watwalekelihu kumuleja Mosi nindi: 23 “Kuhiñahu, wakanoni yuma yevumba dadiwahi chikupu: mora yadikwata yakushika mumashekeli 500 nachibalu, sinamoni yatowala yakushika mumashekeli 250, kalamasi yatowala yakushika mumashekeli 250, 24 nikasiya yakushika mumashekeli 500, yakupima kwesekeja nalushekeli lwatelela lwamwiluña dajila*+ hamu nahini* yimu yamanji amuolivi. 25 Kufumahu, kuyumiyi wakeñununiku manji akuwayisha nachu; watela kuyibomba hamu chiwahi nankashi.+ Akekala manji ajila akuwayisha nachu.
26 “Awa manji wakayizatishi kuwayisha nachu itenti dakubulakena+ nichimbañu chaWunsahu, 27 kushilahu nimesa niyipwepu yayu yejima, chakutentekahu manoñu niyipwepu yachu, kameña kainsensi, 28 kameña kakulambwilahu nyilambu yakushita niyipwepu yaku yejima, beseni* nihakuyitenteka. 29 Yumiyi wakayijiliki kulonda yakekali yajila chikupu.+ Muntu wejima wakakwata kuyumiyi chiña wajila.+ 30 Nawa wakamuwayishi Aroni+ nianyanindi awamayala+ nikuyijilika kulonda akankalakeli mudimu wawupristu.+
31 “Wakayileji aIsarela neyi, ‘Awa akatwalekahu kwikala manji ami ajila akuwayisha nachu mumakiñu enu ejima.+ 32 Awa manji bayi akayiwayisha hamujimba wamuntuku nawa bayi mwakela chuma chadifwana nanawa manjiku. Hichuma chajila. Akatwalekahu kwikala chuma chajila kudi enu. 33 Muntu wejima wakeñula manji adi neyi awa hela wakawayisha muntu* wejima abula kwitejawu, muntu yenowu akamujahi nakumufumisha hadi antu jindi.’”+
34 Kuhiñahu, Yehova wamulejeli Mosi nindi: “Nonaku maseka esekana ayumiyi yevumba dadiwahi:+ yasitakiti,* yaonika, yalibanumi nimanaña evumba dadiwahi akadi majilu. 35 Wakayili kwikala insensi;+ yuma yevumba dadiwahi yakubomba chiwahi nankashi, yakusha muñwa,+ yakadi majilu nawa yajila. 36 Yimu wakayitwi kulonda yakekali wuña nawa wuña wukwawu wakawishi kwakwihi nachimbañu chaWunsahu mwitenti dakubulakena kunakadimwekeshela ami aweni kudi eyi. Yumiyi yakekali yajila chikupu kudi enu. 37 Bayi mwakadilili insensi yenu kuzatisha iyi yuma yevumba dadiwahiku.+ Iyi yuma mwakayimoneña nenu hiyuma yajila kudi Yehova. 38 Muntu wejima wakela yuma yamuchidiwu kulonda akaditiyisheña kuwaha nevumba dayu, muntu yenowu akamujahi nakumufumisha hadi antu jindi.”