Ansompeshi
4 Ilaña Ehudi chafwiliyi, aIsarela atachikili cheñi kwila yuma yatama kumesu aYehova.+ 2 Dichi Yehova wayilandishili kudi yaYabini mwanta wakuKenani+ wayuulili muHazori. Sisera diyi wadiña mukulumpi wamashidika indi owu washakamineña muHarosheti+ wawakanyuza.* 3 AIsarela abileleli kudi Yehova+ muloña Yabini* wadiña namakalu anjita 900 adiña nampoku jajilehi jayikuñu kutufumbu,*+ nawa wayikabishili chikupu aIsarela+ hadi yaaka 20.
4 Dichi, Debora kaprofwetu wamumbanda+ ñoda Lapidoti, diyi wasompesheleña aIsarela hanoyu mpinji. 5 Washakamineña mwishina damutondu wamukoma waDebora hakachi kaRama+ naBeteli+ mwiluña damapidi daEfuremu; aIsarela ayileña kudi yena nakuyisompela nyiloña. 6 Watemesheli mazu kudi Baraki+ mwana kaAbinoyami kufuma kuKedeshi Nafitali+ nakumuleja nindi: “Yehova Nzambi yaIsarela nakuleji nindi, ‘Yaku* kuMpidi yaTabori nawa sendaku amayala 10,000 aNafitali niaZebuluni. 7 Nukukuletela Sisera mukulumpi wamashidika aYabini hamu namakalu indi anjita nimazanvu amashidika indi kukaloña* Kishoni,+ nawa ami nukumuhana muchikasa cheyi.’”+
8 Hohenohu Baraki wamulejeli Debora nindi: “Neyi wukuya hamu nanami, nukuya, ilaña neyi wukuya hamu nanami wanyi, nukuya wanyi.” 9 Yena wamwilili nindi: “Chalala nukuya hamu naneyi. Hela chochu, chuma chiwunakuya nakwila chikukuletela mpuhu wanyi, muloña Yehova wukumuhana Sisera+ muchikasa chamumbanda.” Kufumahu, Debora wanyamukili nakuya hamu naBaraki kuKedeshi.+ 10 Baraki watambikili Zebuluni naNafitali+ kulonda enzi kuKedeshi, nawa amayala 10,000 alondeleleña mumahaji indi. Debora niyena wayili hamu nindi.
11 Dichi, Heberi mwini Keni wadaambwili hadi aKeni,+ anyana kaHobabi muku waMosi weyala,+ nawa walemeneni itenti dindi kwakwihi namutondu weneni muZayananimi, musumba wekala muKedeshi.
12 Sisera amulejeli nawu Baraki mwana kaAbinoyami nayi kuMpidi yaTabori.+ 13 Hohenohu Sisera wapompesheli makalu indi anjita ejima 900, makalu adiña nampoku jajilehi jayikuñu kutufumbu* nimazanvu amashidika ejima adiñayi nawu kufuma kuHarosheti wawakanyuza nakuya kukaloña* Kishoni.+ 14 Dichi Debora wamulejeli Baraki nindi: “Nyamukaku, muloña dalelu didu ifuku dinakumuhanawu Sisera kudi Yehova muchikasa cheyi. Komana Yehova hanakuyañahu dehi hambidi yeyiku?” Nawa Baraki wakunkumukili haMpidi yaTabori hamu nawamayala 10,000 amulondeleleña. 15 Kuhiñahu, Yehova waluwañesheli+ Sisera nimakalu indi anjita ejima niamashidika indi ejima hamesu aBaraki kulonda ayijahi nampoku yakabali. Nkumininaku, Sisera wasulukili hekalu dindi nakutemuka lufuchi hamaseki. 16 Baraki wakumpishili makalu anjita niamashidika ndo-o nikuHarosheti wawakanyuza. Dichi amashidika aSisera ejima afwili kumpoku yakabali; kwosi niwumu washalilihuku.+
17 Ilaña Sisera watemukili lufuchi hamaseki nakuya kwitenti daYayeli+ ñoda Heberi+ mwini Keni, muloña hakachi kaYabini+ mwanta wakuHazori nawantu amwitala daHeberi mwini Keni hadiña kuwunda. 18 Kufumahu, Yayeli wedikili nakumukinkilila Sisera nawa wamwilili nindi: “Eyi mwanta wami iñilaku, twaya munu. Bayi wutiya womaku.” Dichi weñilili mwitenti daYayeli, nawa wamubutili mwemba. 19 Kuhiñahu, wamulejeli nindi: “Mwani, nyinkihu menji antesha ninwi, natiyi mpwila.” Dichi wakasunwini kwipakumuna dachitembi mwadiña mayeli nakumwinka kulonda anwi.+ Kufumahu, wamubutili cheñi. 20 Sisera wamulejeli nindi: “Imanaku hawiñililu wakwitenti, nawa neyi kukwinza muntu wejima wukukwihula nindi, ‘Hanu hadihu iyala?’ wumuleji neyi, ‘Hosi!’”
21 Ilaña, Yayeli ñoda Heberi wanoneli mpopu yakwitenti nisandu. Iku Sisera wudi mutulu twatweni nawa nazeyi, iwu mumbanda wamwebeli nakumupopa mpopu mumbulukutu nakuyihanwisha heseki, nawa wafwili.+
22 Baraki wayili kwenoku nakumukumpisha Sisera, dichi Yayeli wedikili nakumukinkilila nawa wamulejeli nindi: “Twaya nikuleji kudi iyala iwunakukeña.” Wayili hamu nindi mwitenti nawa wawani Sisera nafwi iku mpopu yakwitenti yinahanuki mumbulukutu yindi.
23 Dichi hanodu ifuku, Nzambi wamushindili Yabini mwanta wakuKenani hamesu awaIsarela.+ 24 Nawa aIsarela atwalekelihu kukola chikupu kubadika Yabini mwanta wakuKenani+ nichamujilumwiniwu Yabini mwanta wakuKenani.+