Kwidika
7 Kuhiñahu, Yehova wamulejeli Mosi nindi: “Talaña, nakwilishi kwikala neyi Nzambi* kudi Fwaru nawa manakweyi Aroni wukwikala kaprofwetu keyi.+ 2 Wukumuleja manakweyi Aroni yuma yejima yinukukuleja nawa yena wukuhosha naFwaru, kufumahu wukuyiteja aIsarela kufuma mwituña dindi. 3 Hakwila ami, nukuchinchikisha muchima waFwaru+ nawa nukuvulisha yinjikijilu niyihayamisha yami mwituña daEjipitu.+ 4 Hela chochu, Fwaru wukuyitiyilila wanyi nawa nakwolwela chikasa chami haEjipitu nakufumisha mazaza ami, antu jami, aIsarela mwituña daEjipitu nakubabesha kwasweja.+ 5 Nawa aEjipitu chalala akeluka nawu yami Yehova+ hinakwolwela chikasa chami haEjipitu nakuyifumishamu aIsarela mukachi kawu.” 6 Mosi naAroni elili mwayilejeliwu kudi Yehova; elili mwomwenomu. 7 Hahosheleñawu naFwaru,+ Mosi wadiña nayaaka 80 nawa Aroni wadiña nayaaka 83.
8 Dichi Yehova wayilejeli aMosi naAroni nindi: 9 “Neyi Fwaru ayili nindi, ‘Koñenu chihayamisha,’ eyi wumuleji Aroni neyi, ‘Nonaku mbwechi yeyi wuyinati heseki hamesu aFwaru.’ Yikubalumuka kapela wamuneni.”+ 10 Dichi aMosi naAroni eñilili mudi Fwaru nawa elili mwejima mwayilejeliwu kudi Yehova. Aroni wanatili mbwechi yindi heseki hamesu aFwaru niambuñindi nawa yabalumukili kapela wamuneni. 11 Dichi, Fwaru watambikili amayala akamaana, akakupanda niatutepa amuEjipitu+ niwena elili chuma chochimu nawaña wawu.*+ 12 Wejima wamu hamuntu-hamuntu anatili mbwechi jawu heseki nawa jabalumukili atupela amaneni; ilaña mbwechi yaAroni yaminyini mbwechi jawu. 13 Hela chochu, muchima waFwaru watwalekelihu kuchinchika+ nawa wayitiyililili wanyi neyi chahosheliyi Yehova.
14 Kuhiñahu, Yehova wamulejeli Mosi nindi: “Muchima waFwaru wunachinchiki.+ Yena nakaani kuyiteja antu kuya. 15 Wakayi kudi Fwaru nantetemena. Tiyaña! Yena wakedika nakuya kumenji! Nawa eyi wakemani kunsa yaKaloña Nile kulonda wakadibulakani nindi; nawa wakasendi muchikasa cheyi mbwechi yabalumukili kapela.+ 16 Wakamuleji neyi, ‘Yehova Nzambi yawaHeberu nantemeshi kudi eyi+ nawa nahoshi nindi: “Yiiteji antu jami ayeña kulonda ankalakeli mwisaña,” Ilaña eyi hiwunovwahiliku kushika niyinu mpinji. 17 Yehova nahoshi nindi: “Hamuloña wachumichi dihiwukuñilukila neyi yami Yehova.+ Tiyaña, inakweta menji amuKaloña Nile nambwechi yidi muchikasa chami nawa akubalumuka mashi. 18 Nawa inshi yidi muNile yikufwa, Nile wukununkaña ivumba datama nawa aEjipitu chikuyikalila kunwa menji muNile.”’”
19 Kuhiñahu, Yehova wamulejeli Mosi nindi: “Muleji Aroni neyi, ‘Nonaku mbwechi yeyi nawa wolweli chikasa cheyi hamenji amuEjipitu,+ hatuloña twindi, nyifwolu* yindi, majiya indi+ nimwahembelañayi menji mwejima kulonda abalumuki mashi.’ Mwituña daEjipitu mwejima mukwikala mashi nimuyipwepu yanyitondu niyamalola.” 20 Hohenohu aMosi naAroni elili mwayilejeliwu kudi Yehova. Wanyamwini mbwechi nakweta hamenji amuKaloña Nile hamesu aFwaru niambuñindi nawa menji ejima adiña mukaloña abalumukili mashi.+ 21 Nawa inshi jadiña mukaloña jafwili+ nawa kaloña katachikili kununka ivumba datama nawa aEjipitu hiyatwesheli kunwa menji amuNileku,+ mwituña daEjipitu mwejima mwekalili mashi.
22 Hela chochu, atutepa amuEjipitu niwena elili chuma chochimu nawaña wawu+ chakwila muchima waFwaru watwalekelihu kuchinchika nawa wayitiyililili wanyi neyi chahosheliyi Yehova.+ 23 Kuhiñahu Fwaru wafuntili kwitala dindi nawa iyi nsañu hayishili kumuchimaku. 24 Dichi, aEjipitu ejima apundileña mashima kunsa yaNile kulonda awani menji akunwa muloña hiyatwesheleña kunwa menji amuNileku. 25 Nawa mwahitili mafuku 7 kufuma heteliyi Yehova haNile.