Yoshuwa
2 Kuhiñahu, Yoshuwa mwana kaNuni watemesheli amayala ayedi mukuswamujoka akakwendesha ituña kufuma kuShitimi.+ Wayilejeli nindi: “Yenu mwakatali ituña, sweje-e Yeriku.” Dichi ayili nawa ashikeneni kwitala dachivumbi wejina daRahaba,+ nawa ashakamini kwenoku. 2 Mwanta wakuYeriku amulejeli nawu: “Tiyaña! Amayala aIsarela anenzi munu dalelu nawufuku nakwendesha ituña.” 3 Hohenohu mwanta wakuYeriku watemesheli mazu kudi Rahaba nindi: “Idishaku amayala enza nawa anakushakama mwitala deyi muloña anenzi nakwendesha ituña dejima.”
4 Ilaña iwu mumbanda wasendeli owu amayala ayedi nakuyisweka. Kufumahu, wahosheli nindi: “Eña, owu amayala enza kudi ami, ilaña neluka wanyi kwafumawu. 5 Nawa chiheyila hadiñawu kwakwihi nakushinka chiisu chamusumba, owu amayala edika. Neluki wanyi kunayiwu, ilaña neyi mukuyipupilila swayi-swayi, mukuyiwana.” 6 (Hela chochu, yena wayitwalili owu amayala hewulu detala nakuyisweka munsachi jafalakisi jaaliliwu munyisululu hewulu detala.) 7 Dichi owu amayala ayipupililili kukabadi kaya kuYodani kushika kunyaaba,+ nawa chelili akakuyipupilila anediki dehi, chiisu chamusumba achishinkili.
8 Henohu owu amayala kanda akaami, iwu mumbanda wayili kudi wena hewulu detala. 9 Wayilejeli owu amayala nindi: “Neluki nami Yehova wukuyinka ituña+ nawa tunakuyitiya enu woma.+ Antu ejima ashakamaña mudinu ituña anadihombi muloña wanenu,+ 10 muloña twatiyili chomishiliyi Yehova menji aKaluñalwiji Kachinana hamesu enu himwafumineña muEjipitu+ nichimwayilili anyanta ayedi awaAmori, aSihoni+ naOgi,+ ana imwajilumwinini kukabadi kakwawu* kaYodani. 11 Chitwatiyili chumichi, twatiyili woma nankashi* nawa muloña wanenu, kwosi muntu niwumu wukweti wulobuku,* muloña Yehova Nzambi yenu diyi Nzambi mumawulu nihanu hamaseki.+ 12 Dichi mwani, sanyikenu kudi ami mwijina daYehova nenu, chineli ami nayimwekesheli enu kukeña kwakashinshi, ninenu nawa mwakamwekeshi kukeña kwakashinshi kudi amwitala datata yami; nawa mwatela kunyinka chinjikijilu* chikuletesha nikuhweleli nami mwakela mumunahoshi. 13 Mwatela kupulwisha wumi watata yami niwamama yami, wawamanakwami niwawahelami niwaejima adiwu nawu, nawa mwatela kutwamwina* kukufwa.”+
14 Hohenohu, owu amayala amulejeli nawu: “Neyi twakabuli kwila mwenimu, Nzambi akatujahi.* Neyi mwakashimuna wanyi chuma chitunendeli, dikwila nawu twakamwekesha kukeña kwakashinshi nikwila mutunahoshi kudi eyi neyi Yehova atwinka dinu ituña.” 15 Kufumahu, wayisulwishilili hawindu* namwonji, muloña itala dindi dadiña hampwembu yamusumba. Kafwampi, yena washakamineña hewulu dampwembu.+ 16 Kuhiñahu, wayilejeli nindi: “Yenu kwiluña damapidi, muswami kwenoku hadi mafuku asatu kulonda owu anakuyipupilila abuli kuyiwana. Dichi neyi akakuyipupilila anafunti dehi, enu dihimwakanyamuka nakufunta kwenu.”
17 Owu amayala amulejeli nawu: “Twakekala akadi muloña kutalisha hansañu yiwunatusanyikishi+ 18 neyi chakwila hitwakenza mudinu ituña wakabuli kukasa iwu mwonji wawanda wuchinana nge-e muwindu* muwatusulwishila. Watela kupompesha hamu mwitala deyi, tata yeyi, mama yeyi, amanakweyi niejima amwitala datata yeyi.+ 19 Dichi neyi muntu wudi wejima edika mwitala deyi nakuya hanji, mashi indi akekala hamutu windi yomweni nawa etu twakekala akadi muloña. Ilaña neyi chuma chatama chimumwekena muntu wudi wejima wudi hamu naneyi mwitala, mashi indi akekala hanyitu yetu. 20 Ilaña neyi wakashimuni chuma chitunendeli,+ twakekala akadi muloña hakusanyika kuwunatusanyikishi.” 21 Yena wayilejeli nindi: “Chiikali momwenomu mumunahoshi.”
Hohenohu wayilejeli kuya nawa afuntili kwawu. Kufumahu, wakasili muwindu* mwonji wuchinana nge-e. 22 Dichi anyamukili nakuya kwiluña damapidi nawa ashakami kwenoku hadi mafuku asatu sampu nichafuntiliwu antu ayipupilileña. Akakuyipupilila ayikeñakeñeli owu amayala munjila jejima, ilaña hiyayiwaniniku. 23 Owu amayala ayedi akunkumukili kufuma kwiluña damapidi nawa azambukili kaloña nakufunta kudi Yoshuwa mwana kaNuni. Amulejeli yuma yejima yayimwekeneni. 24 Kuhiñahu, amulejeli Yoshuwa nawu: “Yehova natwinki ituña dejima.+ Kafwampi, antu ejima ashakamaña munidi ituña anadihombi muloña wanetu.”+