Yeremiya
39 Muchaaka chamu 9 chaMwanta Zedekiya waYuda, mukakweji kamu 10, Mwanta Nebukaneza* wakuBabiloni wenjili hamu nanjita yindi yejima kuYerusalema, nawa awukuchikili.+
2 Muchaaka chamu 11 chaZedekiya, mukakweji kamuchiwana, hefuku damu 9 dakakweji, alokweli mpwembu yamusumba.+ 3 Dichi ayilolu ejima amwanta waBabiloni eñilili nawa ashakamini muChiisu chaHakachi,+ adiña Nerigali Sharezeri ateneneñawu nawu Samigari, Nebo Sarisekimi ateneneñawu nawu Rabisarisi,* Nerigali Sharezeri ateneneñawu nawu Rabimagi* niayilolu amakwawu ejima amwanta waBabiloni.
4 Mwanta Zedekiya waYuda niamashidika ejima chayimweniwu atemukili,+ edikili mumusumba nawufuku nakuhitila njila yakwitempa damwanta, kuzatisha chiisu chadiña hakachi kampwembu jiyedi, nawa atwalekelihu kuya munjila yaya kuAraba.+ 5 Ilaña njita yawaKalideya yayikumpishili, nawa Zedekiya amuwaninini muyana yachinkalampata yaYeriku.+ Amukwatili nakumutwala kudi Mwanta Nebukaneza* wakuBabiloni kuRibila+ mwituña daHamati,+ kwamusompesheleliyi. 6 Mwanta waBabiloni wajahili anyana kaZedekiya kuRibila iku yena nakutalaku, nawa mwanta waBabiloni wajahili antu ejima alema amuYuda.+ 7 Dichi waputishili mesu aZedekiya, kufumahu wamuhatili mumpompa jawuneñu nakumutwala kuBabiloni.+
8 Kuhiñahu, aKalideya ocheli itala* damwanta nimatala awantu,+ nawa ahumwini nimpwembu jaYerusalema.+ 9 Nebuzaradani+ mukulumpi wawatulama wasendeli antu ejima ashalili mumusumba nakuyitwala muwunkoli kuBabiloni, antu ejima adibombeli nayena niejima ashalilihu.
10 Ilaña Nebuzaradani mukulumpi wawatulama washiyilihu atuzweñi chikupu amakwawu mwituña daYuda, abulilihu chuma hela chimu. Hadodenodu ifuku, wayinkeli nimatempa anyivinyu nimaha akuzatilamu.*+
11 Dichi Mwanta Nebukaneza* wakuBabiloni wamwinkeli Nebuzaradani mukulumpi wawatulama iyi nshimbi kutalisha hadi Yeremiya nindi: 12 “Musendi nawa wumuhembeña chiwahi; bayi wumwila chuma chatamaku, nawa watela kumwinka yuma yejima yikukulombañayi.”+
13 Dichi Nebuzaradani mukulumpi wawatulama, Nebushazibani ateneneñawu nawu Rabisarisi,* Nerigali Sharezeri ateneneñawu nawu Rabimagi* niamayala ejima alema amwanta waBabiloni ayitemesheli 14 nawa amufumishili Yeremiya muLubanza lwawaNhembi+ nakumuhana kudi Gedaliya+ mwana kaAhikami,+ Ahikami mwana kaShafani+ kulonda amutwali kwitala dindi. Dichi washakamini hamu nawantu.
15 Henohu Yeremiya wuchidi muLubanza lwawaNhembi+ mwamuhembeleliwu, izu daYehova denjili kudi yena nawu: 16 “Yaku wakamuleji Ebedi Meleki+ mwini Etiyopiya neyi, ‘Yehova wamazaza, Nzambi yaIsarela, nahoshi nindi: “Inakushikija mazu ami akuleta yihuñu hadi iwu musumba bayi yuma yayiwahiku, nawa hanodu ifuku eyi wakamona yumiyi chiyakamwekana.”’
17 “Yehova nahoshi nindi, ‘Ilaña eyi nakakupulwisha hanodu ifuku, nawa hiyakakuhana kudi antu iwachiinañaku.’
18 “Yehova nahoshi nindi, ‘Chakadi nikujina, nakakupulwisha, nawa hiwakafwa nampoku yakabaliku. Wumi weyi wakekala neyi chuma chinapuupiwu,*+ muloña wankuhweleleli.’”+