Kwidika
6 Dichi Yehova wamulejeli Mosi nindi: “Ichi dinu wukumona chuma chinukumwila Fwaru.+ Chikasa chañovu chikumukanjikija kuyuumbaku nawa chikasa chañovu chikumukanjikija kuyifumisha mwituña dindi.”+
2 Kuhiñahu, Nzambi wamulejeli Mosi nindi: “Yami Yehova. 3 Nawa nadimwekesheleña nami nidi Nzambi Wañovu Jejima+ kudi Abarahama, Isaka nikudi Yakoba, ilaña kutalisha hejina dami daYehova,+ hinayilejelidu jiikaku.+ 4 Nawa natiyañeni chitiyañenu chami nawena chakuyinka ituña daKenani, ituña mwashakaminiwu neyi añiinza.+ 5 Natiyi kwaaba kwawantu jaIsarela owu anakukabishawu muwuduñu nawa naanuki chitiyañenu chami.+
6 “Dichi, yileji aIsarela neyi: ‘Yami Yehova, nakayikuula kunyidimu yakola yawaEjipitu, nakayamwina kuwuduñu wawu,+ nakayipulwisha nachikasa chakwolola* ninakubabesha kwasweja.+ 7 Nakayitambula mwakekali antu jami nawa ami nakekala Nzambi yenu,+ chalala mwakeluka nenu yami Yehova Nzambi yenu wunakuyikuula kunyidimu yakola yawaEjipitu. 8 Nawa nakayitwala mwituña dinasanyikili* nami nakadihana kudi Abarahama, Isaka nikudi Yakoba; nakayinkadu dakekali iheta denu.+ Ami yami Yehova.’”+
9 Chimwahitili mpinji, Mosi wayilejeli aIsarela awa mazu, ilaña hiyamutiyilili Mosiku, muloña wachineñi chadiñawu nachu nihamuloña wakuyizatisha nyidimu yakola yawuduñu.+
10 Kuhiñahu Yehova wamulejeli Mosi nindi: 11 “Iñilaku wumuleji Fwaru mwanta wakuEjipitu neyi eteji aIsarela afumi mwituña dindi.” 12 Hela chochu, Mosi wamwakwili Yehova nindi: “Talaña! AIsarela anakaani kuntiyilila;+ indi Fwaru wakantiyilila ñahi chineli ami neluka kuhosha chiwahi wanyi?”*+ 13 Ilaña Yehova wayilejeli cheñi aMosi naAroni nshimbi yakuleja aIsarela niFwaru mwanta wakuEjipitu yakufumisha aIsarela mwituña daEjipitu.
14 Awa diwu anlomboli* amwitala datata yawu: Rubeni mwana kaIsarela wawedi,+ anyanindi awamayala adiña Hanoki, Palu, Hezironi niKarimi.+ Iyi diyi yisaka yaRubeni.
15 Anyana kaSimiyoni awamayala adiña Yamini, Ohadi, Yakini, Zohari niShawuli mwana kamumbanda mwini Kenani.+ Iyi diyi yisaka yaSimiyoni.
16 Awa diwu majina awanyana kaLevi awamayala+ kwesekeja nandonda yayisaka yawu: Geshoni, Kohati niMerari.+ Yaaka yejima yahandiliyi Levi yadiña 137.
17 Anyana kaGeshoni awamayala adiña Libini naShimeyi kwesekeja nayisaka yawu.+
18 Anyana kaKohati awamayala adiña Amuramu, Izihari, Hebironi niUziyeli.+ Yaaka yejima yashakaminiyi Kohati yadiña 133.
19 Anyana kaMerari awamayala adiña Mahili naMushi.
Iyi yadiña yisaka yawaLevi kwesekeja nandonda yayisaka yawu.+
20 Dichi Amuramu wasumbwili Yokebedi muhela atata yindi.+ Iwu mumbanda wamuvweleleli Amuramu aAroni naMosi.+ Yaaka yejima yahandiliyi Amuramu yadiña 137.
21 Anyana kaIzihari awamayala adiña Kora,+ Nefegi niZikiri.
22 Anyana kaUziyeli awamayala adiña Mishayeli, Elizafani+ niSitiri.
23 Dichi Aroni wasumbwili Elisheba mwana kaAminadabi, muhela aNashoni.+ Wamuvweleleli Aroni awa anyana, Nadabi, Abihu, Eleyazari niItamari.+
24 Anyana kaKora awamayala adiña Asiri, Elikana niAbiyasafi.+ Iyi yadiña yisaka yawaKora.+
25 Eleyazari,+ mwana kaAroni weyala wasumbwili mwana kaPutiyeli wamumbanda. Iwu mumbanda wamuvweleleli Eleyazari mwana weyala Finehasi.+
Awa diwu anlomboli janyitaña yawaLevi kwesekeja nayisaka yawu.+
26 Awa diwu aAroni naMosi owu alejeliwu kudi Yehova nindi: “Fumishenu antu jaIsarela mwituña daEjipitu, mumazaza-mazaza.”*+ 27 Awa aMosi naAroni+ diwu ana ahosheli naFwaru mwanta wakuEjipitu nawu eteji antu jaIsarela afumi muEjipitu.
28 Hadodina ifuku dahosheliyi Yehova naMosi mwituña daEjipitu, 29 Yehova wamulejeli Mosi nindi: “Yami Yehova. Wumuleji Fwaru mwanta wakuEjipitu yuma yejima yinnakukuleja.” 30 Kuhiñahu, Mosi wamulejeli Yehova nindi: “Talaña! Ami neluka kuhosha chiwahi wanyi,* hanu dinu Fwaru wakantiyilila ñahi?”+