Yoshuwa
3 Dichi Yoshuwa wahindukili nantetemena nankashi, nawa yena niaIsarela* ejima anyamukili kufuma kuShitimi+ nakuya kuYodani. Akaamini kwenoku henohu kanda azambuki.
2 Hanyima yamafuku asatu, anlomboli jawantu+ ahitañeni muchilombu 3 nawa alejeli antu nawu: “Chimwamona tuhu chimbañu chachitiyañenu chaYehova Nzambi yenu anachisendi kudi atupristu aLevi,+ mwatela kunyamuka nakufuma mumaluña enu nakuchilondela. 4 Ilaña mwatela kwikalila hahalehi hadi makyubiti kwakwihi na 2,000* nahadi chimbañu; bayi muswina hela chantesha kwakwihi nachenaku, kulonda mwakeluki njila yimwatela kuyamu, muloña muniyi njila kanda muhiteñamu dehi.”
5 Dichi, Yoshuwa walejeli antu nindi: “Dijilikenu,+ muloña kumadiki Yehova wakayikoñela yuma yakuhayamisha mukachi kenu.”+
6 Kuhiñahu, Yoshuwa walejeli atupristu nindi: “Nyamunenu chimbañu+ chachitiyañenu nawa mutwaminiku hambidi yawantu.” Dichi anoneli chimbañu chachitiyañenu nakutwaminaku hambidi yawantu.
7 Kufumahu, Yehova wamulejeli Yoshuwa nindi: “Dalelu nukutachika kukutuumbakesha hamesu awaIsarela ejima+ kulonda eluki nawu nukwikalaña naneyi+ neyi chinadiña naMosi.+ 8 Watela kuleja atupristu anakusenda chimbañu chachitiyañenu ilu lushimbi neyi: ‘Chimwashika kwakumina menji aYodani, mwatela kwimana kuka-a muYodani.’”+
9 Nawa Yoshuwa walejeli aIsarela nindi: “Twayenu kunu mutiyi chinahoshiyi Yehova Nzambi yenu.” 10 Dichi Yoshuwa wahosheli nindi: “Ichi dichimukwilukilaku nenu Nzambi wamumi wudi mukachi kenu+ nawa nenu hela chikukala ñahi, wakayitemwina aKenani, aHiti, aHivi, aPerizi, aGirigashi, aAmori niaYebusi kufuma kudi enu.+ 11 Tiyenu! Chimbañu chachitiyañenu chaMwanta weseki dejima chinakutwaminaku hambidi yenu nakwiñila muYodani. 12 Dichi tondenu amayala 12 munyichidi yaIsarela, mumuchidi-himuchidi mufumi iyala wumu,+ 13 nawa chikwila tuhu madatilu anyendu yawatupristu anasendi Chimbañu chaYehova Mwanta weseki dejima, akunka* hamenji aYodani, menji aYodani anakufuma kunsulu yakaloña akuleka kuhita nawa akwimana fwi-i neyi ijiya.”*+
14 Dichi antu chanyamukiliwu kufuma mumatenti awu henohu kanda azambuki Yodani, atupristu asendeli chimbañu+ chachitiyañenu atwamininiku hambidi yawantu. 15 Chelili tuhu akakusenda Chimbañu ashiki kuYodani niatupristu asendeli Chimbañu adati nyendu yawu kwakumina menji (mumafuku ejima akwaañula, Yodani wenzeleña kushika nikuyikumu yindi yejima),+ 16 menji afumineña kunsulu yakaloña emeni fwi-i. Emeni fwi-i neyi ijiya* kushika nikuAdama, musumba wekala kwakwihi naZaretani, nawa menji akunkumukilileña kuKaluñalwiji kaAraba, dikwila nawu Kaluñalwiji kaMuñwa,* omini. Alekeli kuhita, nawa antu azambukilili hatalañana naYeriku. 17 Atupristu asendeli chimbañu chaYehova chachitiyañenu atwalekelihu kwimana heseki dooma+ hakachi kaYodani iku aIsarela ejima anakuzambuka heseki dooma+ sampu nichazambukili muza wejima Yodani.